Хезмәт

Николай Романов: «Служить кареме сярысь тунсыкозэ но серемзэ гинэ тодам вайыны яратӥсько»

Романов Николай Иванович 1964-тӥ арын 17 октябре Пор-Кутеш гуртын вордскемын.

Анаез Ӟаныын дышетӥсь луыса ужам, атаез механизатор луэм. Жаляса верано, туннэ нуналэ соос кыкназы но кулэмын ини. «Мон семьяын самой покчи нылпи вал, вылаз ик одӥг гинэ пи — вить апайёсы вал. Соин Афганэ мынэмме тодэмез бере, анае туж сюлмаськем». 

1982-тӥ арын Николай агай Ӟаныысь школаын 10-тӥ классэз йылпумъя. Военкоматысен сое Казаньысь механик-водительлы дышетскыны лэзё. Куать толэзь ӵоже отын дышетскемез бере, Николай Иванович 31 мартэ 1983-тӥ арын арми радъёсы басьтӥське. «Армие кошкимы Кушкетысь Щербаков Сергеен ӵош. Нырысетӥ куинь толэзьзэ Узбекистанысь Термезын (со самой пӧсь точка вал) луи,  Термез — со ачиз Афганистан вал ини. Собере июнь толэзе Афганистанэ Пули-Хумри городэ ыстӥзы ини. Отын кык арлы матэ мотострелковой полкын служить кари», — тодэ ваёнъёссэ вера Николай Иванович. Машина нуллыны правоез луэм бере, Афганистанын со механик-водитель луыса служить каре.

Кышкасьёс пӧлысь ӧвӧл Коля агай. Соин Афганистанэ служить карыны мыноно луэмзэ тодэмез бере, со ӝож мылкыдэ уг усьы — кышкаса, пе, номыр карыны уг луы, котькуд пиосмурт солы оскем граждан долгзэ данэн быдэстыны, пе, кулэ. 

— Марлэсь кышканэз? Котькуд воргоронлы Атаймузъемез азьын долгзэ быдэстоно, кинлы ке арми аръёссэ (арзэ) секыт дыре но кышкыт интыын ортчытыны тупа, кинлы ке — умой интыын но каньыл условиосын. Кинлы кызьы удалтэ ни. Мыным тани Афганистанын служить кароно луиз…

Николай Иванович кӧня ке полкъёсын служить карыны вутске, собере сое гарнизонэ ысто. Нялтас вераса, Афганистанын со ик Щербаков Сергей агаен но кӧня ке пол адскыны вутско соос. Туннэ нуналэ но Афганистанын ӵош служить карем эшъёсынызы шер ке но, соос вераськыло, пумиськыло, огъя вераса, кусыпъёссэс уг ышты. Николай Иванович вера, эшъёсыз тросэз кыдёкын шуыса. Уноез Украинаын вылэм, одӥг эшсэ шедьтэм Белоруссиысь. Асьме ёросысь но Афганын служить карем воргоронъёсын кусыпъёссэс уг ышто вылэм — Арбаш гуртысь, Арборысь сослуживецъёсыныз герӟет возё.

Реклама

Сӧсырмонъёсыз сярысь вераськыны Коля агай уг яраты. 1985-тӥ арын 1 январе  солэн пыдыз сӧсырмем. Одӥг толэзьскын тупам. Эмъяськемез бере сое нош ик гарнизонэ службазэ азьланьтыны келяло. Ӵужектон выллем висёнъёссэ лыдъянэз но ӧвӧл ини — Афганистанысь калык пӧлын пӧртэм паласькись висёнъёс луо. Мугорысьтыз, ымнырысьтыз осколокъёссэ бертэм бераз но поттӥллям али. Нош кӧняез кылемын, дыр, али…

— Зэмзэ верано ке, служить кареме сярысь тунсыкозэ но серемзэ гинэ тодам вайыны яратӥсько, — азьланьтэ веранзэ Николай Иванович. — Жугиськон вал ке но, сыӵе моментъёс но ӧжыт ӧз луэ. Кылсярысь, огпол Украинаысь одӥг пияш верблюдэз адӟиз но, лев шуыса малпаськыса, бызьыса кошкиз. Туж серем вал со. Ми, егит пиос, пӧртэм сямен вакытмес ортчытыны тыршимы: кин ке концертъёсты дасяса возьматӥз, мон гитараен шудыны быгатӥсько вал. Спортэн эшъяськи, со сямме Афганистанын но ӧй вунэты.

Ожмаськон сярысь вераськемзы уг поты Афганын служить каремъёслэн, тае валаны но луэ — син азязы пуксё, дыр, жугиськонын ыштэм эшъёссы, сӧсырмыса бертэм тодмооссы, изьымтэ уйёссы… Коля агайлэн но трос ыштонъёсыз луиллям. Кыӵе секытэн солы сётскем тодмооссэ ыштон — со ачиз гинэ тодэ.

25 мае 1985-тӥ арын Романовез демобилизовать каро. Жугиськонын возьматэм батырлыкез понна со «За боевые заслуги» медален пусъемын. Та сярысь со ачиз серекъяса вера: «Кутэшъёс ушъяськыны уг ярато, уг быгато». Граждан улонлы Николай Иванович капчиен дыше. «Гуртэ бертэм бере ужано но ужано вал ини, ожмаськон сярысь малпаськыны дыр уг кыльы вал. Озьы верано ке, Афганистанын служба — служба вал ини со, мукет интыын кадь ик. Секытгес ке но, сыӵе ик служба вал со», — маде Николай агай.

Бертэмез бере куинь арскын, 1988-тӥ арын, Сала Кушкет гуртысь нылэз кышно пыртэ. Римма Петровна гуртысьтыз фермаын скал кыскись луыса тырше, ачиз но Николай Иванович «Дуслык» обществоын машина нуллӥсь луыса ужа. Кузпалъёслэн кык пиоссы вань, соос асьсэ семьяоссэс кылдытыса (одӥгез Казаньын, мукетыз — Челныын), анай-атайзэс кык внукен но одӥг внучкаен шумпоттӥзы ни.

— Жугиськон — жугиськон ини со. Пӧртэмез луиз. Вунэтыны ноку уз луы со дыръёсты. Но ӝожтӥськыса, кайгу-куректон сярысь гинэ малпаса улыны уг яра. Семья понна, матысь адямиосмы понна тыршыса улыны кулэ. Улонмы каньыл мед луоз, — йылпумъяз веранзэ Николай Иванович.

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: