Нянь ке вань, мылкыд но умой

30 коньывуонэ Ӟаны Починка гуртын «Выль нянь сиён»  улосвылкукспо удмурт йӧскалык фестиваль ортчиз. Со огазеяз Татарстан но Марий Эл республикаысь но Киров улосвылысь удмуртъёсты.

Фестивальлэн валтӥсь ужпумез — удмурт калыклэсь фольклор сям-йылолъёссэ утён но азинтон, творческой коллективъёслэсь этнокультурной кусыпъёссэс юнматон но опытэн вошъяськон. Со сяна, нош одӥгез валтӥсь ужпум — нянез данъян. Нянез асьме калык, котькуд мукет калык кадь ик, котьку данъям, гажам, яратэм. Но — шулдыръяськон. Мае-мае, нош шулдыръяськыны асьме калык быгатэ. Клубе пырыку ик ваньзэсты кырӟаса, юмшаса пумитазы карлыганъёс, ческыт табань но веръяны сётӥзы.

Асьме районысь та ужрадэ трос фольклор ансамбльёс пыриськизы. Соос пӧлын Ципьяысь, Сизнерысь, Дургаысь, Сырьяысь, Вуж Кушкетысь, Ӟаныысь, Вукогуртысь но Балтасьысь коллективъёс.

Гажано куноос пӧлын вал Мари-Турек муниципальной районысь лулчеберетъя, физической культурая но спортъя отделлэн кивалтӥсез Кузьминых Наталья Валерьевна, Мари-Турек клуб системалэн директорез Тырышкина Светлана Валерьевна, Мари-Турек муниципальной районлэн администрациелэн тӧроез Решетов Сергей Юрьевич. Куноос пусйизы фестивальлэсь кулэлыксэ, солэн удмуртъёслэсь кусыпсэс юнматонын но эшъяськон кусыпъёс возёнын бадӟым инты басьтэмзэ. Сергей Юрьевичлэн верамезъя, нянь Россиын котьку тӧршорын луэм, туала дыре но со озьы ик луэ. Вань лыктэм куноослы, коллективъёслы, залын пукисьёслы со сӥзиз ваньзэ умойзэ, нош фестиваль ӟеч традицилы мед пӧрмысал шуыса вераз.

Выль нянь — со удалтэмлэн, узырлыклэн, выль улонлэн символэз. Со сярысь ик вераськизы та ӝытэ Карлыганын фестивалез радъясьёс но, лыктэм куноос но. Соин ик сцена вылысен ческыт караваез Карлыган гурт поселениысь самой егит улӥсьлы — Ендылетова Варваралы — но солэн анай-атаезлы — кузьмазы.

Фестивалез усьтӥз культура удысысь сӥё-дано ужась, «Ӟардон» фольклор ансамбльлэн кивалтӥсез Главатских Мария Аркадьевна:

— Ачимес, удмуртъёс, туннэ люкаськимы татчы бадӟым празднике — элькункуспо удмурт калыклэн «Выль нянь сиён» фестиваляз. Гурт калыклэн ю-нянез утялтэмын, картошкаез гуын, бакча сиёнъёсмы выж улын — мар карод на шутэтскон сяна? Шутэтскыны но шулдыръяськыны гинэ кыле ни табере асьмелы. Ачимес, шошма удмуртъёс, ваньмы одӥг палан валче улӥськомы. Ваньмы огмылы-огмы матын улӥськомы. Ойдолэ валче гинэ азьпалан но эшъяськыса уломе, кимес кужмо кырмыса, пиньмес зол куртчыса, ойдолэ возьмалом асьмелэсь удмурт анай кылмес. Ум сётэ солы ышыны.

Шӧдӥськиз, котькудӥз сценае потэм коллектив рос-прос дасяськыса лыктэм вал шуыса. Ваньзы вайиллям сьӧразы туэ октэм урожайлэсь дасям удмурт калык пыжиськемъёсты, кудъёссэ жюри отын ик веръяз но дунъяз. Куд-ог сцена вылын кырӟасьёслэн, кыл верасьёслэн сюлмаськемысьтызы куаразы куалекъя вал ке но, соос асьсэ сярысь умой малпанъёс гинэ кельтӥзы. Туж паймытӥз, лэся, калыкез Дурга гуртысь кырӟась Ольга Камашева.  Сое асьме палан тросэз тодэ, дыр — сценае со ӵем потылэ. Но кырӟа со троссэ бигер но ӟуч кылъёсын. Нош татын со удмурт кылын кырӟаз. Аслэсьтыз берлогес «Кин бен луиськод тон национальностедъя» шуэм юанлы со таӵе ответ сётӥз: «Мынам атае удмурт, анае — крашин бигер. Нош мон... уг тодӥськы, мон удмурт но, бигер но, дыр. Та сярысь вераны но уг возьдаськиськы. Дорамы бигер кылын вераськиськомы, нош кырӟасько мон ӟучен но, бигерен но, удмуртэн но».

Оляез сцена вылысен кошкемез бере али кема кичабонъёсын келязы. Ма, Оляез гинэ ӧвӧл. Шумпоттӥзы кыдёкысь лыктэм куноос но, Нырьяысь вуэм «Сактон» коллектив, Лельвижысь «Купанча» ансамбль, Каксинвайись ансамбль «Вуюись», Вятской Полянаысь «Чипчирган» ансамбль. Карлыганъёс асьсэлэсь матысь луись адямиосты кадь пумитазы соосты, кичабонъёссэс ӧз жалялэ. Балтась районысь вуэм ансамбльёсты эшшо но кужмогес кичабонъёсын пумитазы кадь. Таиз юн шӧдӥськиз — нылкышноос кизэс чабо, пиосмуртъёс шулало. Берытскыса учки ке (нырысетӥ радын пуки ук) трос тодмо ымныръёсты адӟи — таиз Сизнерысь, таиз Дургаысь, таиз Кӧргемысь... Асьсэ гуртысь, асьсэлэн районысьтызы ансамбльёссэс поддержать карыны лыктӥллям вылэм, малпасько. Мар шуид ке но, сценае потӥсьёслы та трос кужым но оскон сётэм, дыр.

Зэмлыко веран понна пусйыны кулэ — ваньзы ужрадэ пыриськем коллективъёс дипломъёсын но синпель кузьымен пусйиськизы. Соин но нокин куашкам мылкыдын фестивальысь ӧз кошкы шуыса малпасько. Концерт номеръёс йылпумъяськем бере ваньзэсты нимаз висъям комнатаын витизы ӝӧк тыр ческыт пӧраськемъёс, сиён-юонъёс (таиз понна но нимысьтыз бадӟым тау карыны кулэ фестивалез радъясьёслы, озьы ик «Ӟардон» ансамбльлы»), нош собере ини — мызганэн юмшанъёс. 

Гожтэмме йылпумъяме потэ Леонид Дмитриевич Сапожниковлэн верам кылъёсыныз:

— Ми татчы, Ӟаны Починкае, олокытчы дят интые кадь ум лыктӥське, асьме матысь выжыосмы доры кадь гинэ лыктӥськом. Туж шумпотӥськомы, тӥляд таӵе ужрадъёсты ӵем луыло шуыса. Синмаськыса, данъяськыса, шумпотыса лыктӥмы таӵе шулдыр, шуныт пумиськонамы. Тау кариськомы сюлмысь та быдӟа пумиськонэз радъясьёслы, Мария Аркадьевналэн нимыныз вань кадь солэн коллективезлы.

Зэмзэ но, Карлыганъёс асьмелы матысь адямиос луо. Ог-огмы доры шер ке но куное концертъёсын ветлӥськомы, «Ӟырон быдтон» кадь бадӟым праздникъёсын но ӵыжы-выжыос кадь валче луиськомы. Азьпалан но со озьы мед луысал.