Хезмәт

«Нылпиосме визьнодаса, мон асме но визьнодай»

Вить нылпиез будэтӥсь анайлэн улонэз сярысь

Туала дыре трос нылпиё семья шер пумиськылэ — егит семьяос ӵемысь ӝожтӥсько улонлэн секыт луэмезлы, нылпиослэн кылзӥськисьтэм луэмзылы. Соин но туннэ статьяелэсь героинязэ, Бадӟым Лӧзялэн I-тӥ люкетаз улӥсь Анна Викторовна Филиповаез, герой нылкышно шуыны луэ. Малы? Анна Викторовна, ачиз али егит ке но, вить шудо нылпилэн анаез луэ ини! Кызьы со вутске нылпиоссэ утьыны, кин солы юрттэ, кызьы со будэтэ нылпиоссэ но маин Анна Викторовна улонын тунсыкъяське — ваньмыз сярысь нылкышноен интервьюын.

— Анна Викторовна, нырысь ик асьтэлэн семьяеныды, нылпиосыныды тодматэ вал.

— Милям семьяямы сизьым кузя адями вань. Кузпалэ Владимир, мон, но милям вить нылпиосмы. Самой быдӟымез, Дионисий, 8-тӥ классын дышетске, солы 14 арес. Собере нылмы Маша, солы 13 арес, со 7-тӥ классын дышетске. Филипп пимылы 6 арес, со али садике ветлэ, Катя нылмы но пичи али — солы вить арес гинэ. Нош самой покчиезлы, Елисейлы, 7 толэзь гинэ на. Сыӵе тӥни бадӟым милям семьямы.

— Семьяын одӥг гинэ нылпи будэ ке, со ачиз ассэ гинэ яратӥсь, эгоист луыса будэ шуэм веранъёсты кылэмды вань, дыр. Нош тани трос нылпиё семьяын нылпиос тужгес но эшлыко луо, шуо. Тӥляд вить кузя нылпиосты вань, ог-огенызы соос тупаса уло-а? Быдӟымъёсыз покчиоссэ возьманы юртто-а?

— Сыӵе веранъёсты мынам ӵемысь кылэме вань но мон соосын соглаш луисько. Милям нылпиосмы куспазы туж тупаса уло, соос куспын пӧртэм учыръёс луыло ке но. Ми кузпалэным соослы трос дыр висъяны тыршиськом, соос ог-огзэсты мед яратозы, ог-огзылы пичиысен ик оскон но пыкет мед луозы шуыса тыршиськом. Соос ведь ваньзы одӥг выжыысь агайёс-вынъёс но апай-сузэръёс! Нылпиосмы ог-огзылы уг но вожало, валало: ми соосты ваньзэсты огкадь яратӥськомы. Но покчиосызлы куд-ог дыръя тросгес дыр но висъяны кулэ луэ. Пиналъёсмы куспазы эшлыко уло бере, котьку ог-огзылы юртто, котьмазэс но куспазы люко, ми соизлы туж шумпотӥськомы…

Интервьюлэн быдэс вариантэныз «Азьлане» газетлэн 10-тӥ номераз тодматскыны быгатӥськоды.

 

 

Нравится
Поделиться:
Реклама
Комментарии (0)
Осталось символов: