Хезмәт

Одӥгеныз форуме пыриськись егит нылкышноен, Венгриысь Жофи Сиракиен (Zsofia Sziraki) вераськон

— Мынам вордскем кылы венгер ке но, мон со сяна удмурт, ӟуч, финн но англи кылъёсты тодӥсько.

— Жофи, нырысь ик вералэ вал, кытысен тӥ асьтэос но кызьы тӥ «БиГерд» форум сярысь тодӥды?

— Мон вордскемын Венгриын, Будапешт дорысь 100 иськемын. Будапешт университетын венгер кылэз но литератураез, озьы ик финно-угроведениез дышетски. Милям финн-угор кафедрамы туж умой вал, соин мон удмурт кылын но умой вераськисько, ачим чылкыт венгер луисько ке но. Али дыре Ижевскын Удмурт Кун Университетын венгер кылъя дышетӥсь луыса ужасько. Форум сярысь интернет пыр тодӥ, эшъёсылэсь.

— Кыӵе малпанъёсын но мылкыдъёсын татчы, Татарстанэ, вуиды? Форумлэсь ма витиськоды?

— Та форум — со туж умой малпан. Организаторъёс вуоно арын но мед радъясалзы сое но тросгес егитъёсты кыскыны мед тыршысалзы. Но, мон малпамея, форум кутскытозь ик интернет пыр умой реклама карыны кулэ, тросгес но тросгес егитъёс татчы мед вуылозы шуыса. Мылкыдъёс сярысь ма вералод — туспуктэмъёсъя но ваньмыз адске. Татчы шумпотыса вуи, Балтась ёросэн тодматски, аслым выль эшъёс но шедьтӥ.

— Жофи, удмурт кылын чылкак удмурт семьяын будэм адями кадь вераськиськоды...

— Туж секыт ӧй вал удмурт кылэз дышетскыны, малы ке шуоно венгер но, удмурт но кылъёс — финн-угор кылъёс ук. Мыным удмурт кылын вераськыны капчи, та кыл мыным туж кельше. Удмуртъёслэн трос данъяськымон адямиоссы но вань. Кылсярысь, Бураново гуртысь песянайёсты гинэ басьтомы. Кӧня ке фильмъёс но удмурт кылын потэмын, тросгес луизы ке туж умой луысал...

— Озьыен, удмурт кыл тодэмды тӥледлы пайдаё луэ?

— Мынам вордскем кылы венгер ке но, мон со сяна удмурт, ӟуч, финн но англи кылъёсты тодӥсько. Макем адями тросгес кылъёсты тодэ, сокем солэн культураез умойгес, визез тросгес шуыса малпасько мон. Кунгож сьӧр кылъёс гинэ бадӟым луонлыкъёс уг сёто. Тани, удмурт кылэз ӧй ке тодысал, оло, та форуме но ӧй пыриськысал...

Теги: БиГерд
Нравится
Поделиться:
Реклама
Комментарии (0)
Осталось символов: