«Пие, тыныд верасько — калыке, тон кылзы»

Удмурт калыклэсь лулчеберетсэ, сям-йылолъёссэ, калык сиёнъёссэ умой тодӥсь Марианна Кузнецова аслэсьтыз тодэмъёссэ куинь нылпиезлы но пыӵатыса кельтыны тырше. Кызьы бен ортчытэ нуналъёссэ кырӟаны но эктыны, ас кылзэ но сямъёссэ яратӥсь семья?

— Александр кузпалэным ми 1995 арын апреле семья кылдытӥмы. Солэсь азьло куать ар ӵоже эшъяськимы, гожтэтъёс гожъямы, — тодаз вайиз кышномурт. — Мон — Татарстанысь Менделеевск ёросысь, нош картэ — Удмуртиысь. Кузпалъяськеммылэсь азьло пумиськылӥмы, ӝыт шудонэ, мон доры лыктылӥз. Собере ӵош кариськыны малпамы. Сюанмы вань сям-йылолъёсъя ортчиз: одӥг нуналэз — ныл дорын, кыкетӥез — эмеспи дорын, вакчияк вераса, кык нунал ӵоже шулдыръяськимы.

Туннэ нуналэ Кузнецовъёс куинь нылпи — кык ныл но одӥг пи — будэто. Куиньназы но искусствоез ярато шуыса вера анайзы.

— Атаймы гинэ искусстволэсь палэнынгес, нош нылпиосмы но ачим кырӟантэк-эктонтэк улыны ум быгатӥське. Бадӟым нылмы но пимы искусствоосъя школаез йылпумъязы, дышетскыкузы но, али но дасоосын конкурсъёсы пырисько. Покчиез «Ля-ля-фа» вокальной студиын кырӟа. Бадӟым нылпиосмы но вӧзамы луон дыръя, семьяен выступлениос лэсьтӥськомы вал, быгатэммыя, конкурсъёслэсь но ӧм кыльылэ, — шуэ со.

Доразы соос тросгес удмурт кылын верасько. Яратыса калык кырӟанъёсты быдэсъяло, туалаоссэ но тодо.

— Возьыт но ини вераны, но пичиез нылмы удмурт кылэз туж умой уг тоды али. Песянай-песятай кулэм бере, гуртэ но шер бертылыны кутскимы, тупась дырез лэзимы угось. Зэмзэ ке верано, ачим но анай кылме бер дышетӥ. Школаын дышетскыку удмурт кыл милям ӧй вал. Педагогической колледже лыктыса, нимысьтыз курсъёсты ортчи, — вера Марианна.

Ӧнерезъя героинямы — дышетӥсь. 1993 арысен «пӧзисько», пе, ини та удысын.

— Туннэ нуналэ удмурт нылпиосын «Чингыли» воскресной школаын ужаськом. 2004 арысен удмурт кырӟанъя «Купанча» ансамблен но кивалтӥсько. Нош 2014 арын Менделеевск городысь удмурт национально-культурной автономиен кивалтыны тодмостӥзы. Вакчияк вераса, улонэ мынам удмурт лулчеберетэн герӟаськемын. Соин нылпиосы но отчы кыстӥсько. Дорамы, кылсярысь, люкаськыса калык чеберман арбериосты, айшет но дэрем вуриськом. Поколениысь поколение выжем небыт мертчан дэремъёсты но утьыса возиськом. Самой «егитэзлы» ини 50-лэсь трос ар, нош ми али но, соосты дӥсяса, сцена вылэ потӥськом!

Киужъёсын сяна, Марианналы муш вордонэн но вырыны кельше вылэм. «Азьло атайлы юрттыны яратӥсько вал. Табере ини гужем гинэ, но яратыса быдэстӥсько со ужез!» — шуэ кышномурт.

Сиён-юон дасян ласянь но усто вылэм со. Удмурт калык сиёнъёсын семьязэ ӵем куноя:

— Удмурт сиёнэз туж яратӥськом: зыретэн табань (йӧл кисель), йӧлын пӧзьтэм ӝук, тари кеньырен яке картофкаен кыстыбей, ӟазег сӥлен тари ӝук, шаньги, шуэн, кузятэмен, йыды яке чабей кеньырен пирог, губиен шыд… Ваньзэ тае анаелэн дышетэмезъя пӧрасько, — вера Марианна.

Кузнецовъёс — адӟем карымон семья. Соос кадь, ас сям-йылолъёссэс утьыса улӥсьёс гинэ ӧжытгес луэмын туннэ.

(«Ватаным Татарстан» газетысь берыктэмын)