Покчи Лӧзя гуртын улӥсь Кушаева Екатерина Степановна бадӟым юбилейзэ пусйиз

Екатерина Степановна вордскем нуналэныз ӟечкыланы лыктэм кунооссэ — Балтась ёросысь главалэсь воштӥсьсэ Наиль Сабирзяновез, ёросысь социальной дурбасьтонъя отделлэсь кивалтӥсьсэ Алу Гатиятуллинаез, Балтась ёрос больницаысь валтӥсь врачлэсь воштӥсьсэ Рашит Шафигуллинэз, Покчи Лӧзя гурт поселенилэсь главазэ Айдар Исмагиловез пальпотыса пумитаз. Соослэн шуныт кылъёссылы, ваем кузьымъёссылы, Россилэн Президентэзлэн ӟечкылан открыткаезлы но Балтась ёрослэн главаезлэн Таукарон гожтэтэзлы со сюлмысьтыз шумпотӥз.    

Улонэз яратӥсь, ӝожтӥськонъёсты тодӥсьтэм, матысь адямиоссэ яратӥсь Екатерина Степановналэн улонэз туннэ нуналэ каньыл, умой ке но, нылпи дырыз солэн, тросэзлэн огъёзъёсызлэн кадь ик, секыт луэм. Улын Ушма гуртын водскем нылашлы сизьым арес луыку, солэн атаез кулэм. Евдокия анаезлы сизьым нылпиоссэ (Екатеринлэн кык апайёсыз пичиысен тифен висьыса кулӥллям) огназ пыд йылазы султытыны капчи луымтэ.  Но кышномурт нылпиосызлы умой визьнодан гинэ ӧвӧл, ӟеч тодон-валан но сётыны тыршем. Екатерина Степановналэн кык агайёсыз — Алексей но Григорий — ёросысьтымы удмурт школаослэн директоръёссы но луиллям. Алексей Степанович — Покчи Лӧзя школаен, нош Григорий Степанович Гондыргуртысь покчиёзо школаен кивалтэм. Жаляса вераны кулэ, Быдӟым Атыкай ож соослэсь улонзэс куспетӥ карем: Алексей ивортэк ышем, нош Григорий кулэм.

Екатериналэн но пичи дырысеныз дышетскыны мылкыдыз юн луэм. Соин, 7-тӥ классэз йылпумъямез бере, 1943-тӥ арын, егит нылаш Урнякысь педучилищее дышетскыны пырыны малпа. Пыре ке но, семьяезлэн ускёез луымтэысь, со отын дышетскыны уг быгаты — сютэм улонлы чидатэк, со дораз берытске. Сюлмаз луэм секытсэ со нокинлы уг вера — ваньзэ пушказ возе, улонлэн умой луэмезлы гинэ осконзэ уг ышты. Но дышетскон мылкыдыз но нылашлэн туж юн луэ: одӥг арскын со Арчаысь медучилищее дышетскыны пыре ик. Общежитиын валче улоно нылъёсыныз ӵош со жугиськонлэн быремез сярысь иворез тодэ, та сярысь дышетӥсьсы комнатаязы пырыса черектэ:

— Нылъёс, султэ, султэ, жугиськон быриз!..

Со дырысен трос аръёс ортчизы ке но, та нунал но та кылъёс Екатерина Степановналэн пыраклы сюлмаз но йыраз кылиллям: ожлэсь секытсэ Екатерина Степановна, со дырысь мукет нылпиос но егитъёс кадь ик, туж умой ас вылаз шӧдэм ук…

1945-тӥ арын сӥзьыл, дышетсконзэ йылпумъяса, егит эмчи вордскем палъёсаз берытске. Ужаны интыяське Сосна гуртэ. Сизьым ар ӵоже со гуртысь калыкен ужа, сизьым ар ӵоже ик Покчи Лӧзя гуртысь медпунктын тырше. Пенсие потытозяз кема аръёс ӵоже, шонергес вераса 22 ар, Балтасьысь амбулаториын синъёсты эскерон кабинетын ужа. Ужзэ котьку яратыса, рос-прос быдэсъя, калыкын бадӟым гажанэ вутске, туж трос таукарон кагазъёсты басьтэ, ожысь но ужысь ветеран нимен но пусйиське.

1950-тӥ арын аслаз гуртоезлы, Улын Ушма гуртысь Филиппов Пётр Михайловичлы, бызе.  Кузпалъёс гумырзы ӵоже тупаса, эшлыко уло, куинь нылпиосты будэто: Василиез (1951 арын вордске, кулэмын ини), Григориез (1953 арын вордске, аслаз семьяеныз Улын Ушма гуртын улэ), Любовез (1956 арын вордске, улэ Покчи Лӧзя гуртын Николай кузпалэныз но анаеныз). Юбиляр 8 внукеныз но 18 правнукеныз ушъяськыны быгатэ.

— Пересьмон даурам матысь адямиосы вӧзам, монэ ярато, гажало, утё — та самой бадӟым шумпотонэ. Улонмы гинэ каньыл мед луоз, — шуэ Екатерина Степановна.    

Вордскем нуналзэ юбиляр матысь адямиосыныз, нылпиосыныз пумитаз. Шутэтскон нуналъёсы, праздникъёсы но внукъёсыз, правнукъёсыз песянайзэс шумпоттыны тыршо — куное бертыло. «Соослэн вӧзам луэмзы — мон понна самой бадӟым шумпотон», — ватытэк вера юбиляр.  

Анайзэ вордскем нуналэныз ӟечкыласа, нылыз Любовь Петровна шуиз:

— Самой матысь, улонмы ӵоже визь-кенеш сётӥсь, яратӥсь, валась, юрттӥсь адямимы — анаймы. Туннэ но, яратоно анаймылэн бадӟым юбилеяз, ӵуказе но, котьку — анаймылы милемыз будэтэмез, пыд йыламы султытэмез понна бадӟым тау шуомы. Али кема аръёс ӵоже сӧл-таза луыса, аслэсьтыз нылпиоссэ, внукъёссэ шумпоттыса улыны мед кылдоз солы. Нош ми ваньзэ лэсьтомы, анаймы пересьмон даурзэ каньыллыкын мед пумиталоз шуыса.

Гумырез ӵоже тазалыкез утён удысын ужам песянайлы, матысьёсыз, гуртоосыз но вань тодмоосыз понна котьку юрттыны дась луись эш луэм Екатерина Степановналы мон но юн тазалык сӥзисько. Котькуд нуналлы шумпотыса, кема аръёс ӵоже улыны мед кылдоз али!