Пуны — адямилэн эшез

Со дырысен пуны котьку адямиен артэ. Табере пуныос кунгожмес утё, кутьы возьмало, наркотикъёсты утчало, куашкам юртъёсысь адямиосты утчало... Берло 1941-45 жугиськон аръёсы 60 сюрслэсь уно пуныос Вормонэз матэктыны юрттӥзы: пуштытъяллязы поездъёсты, танкъёсты, минаосты утчаллязы, лушкем лыктӥсь тушмонэз шараяллязы, сӧсырмыны шедем солдатъёсты поттылӥзы, соос ик связистъёс но вал. Трос ӟеч ужъёсыз пунылэн, адямиен ӵош ке улэ!

Но адямиен ӵош улэмысь дугдӥз ке, пуны ӝог кыроме, туж лек луэ. Уг ни луы эш. Озьы 11 мартэ Москва дорысь Курсаковоын лэзем пуныос егит пиез ураса, куртчылыса вииллям, егит нылэз куртчылӥллям, секыт югдурын больницаын кылле. Соос ӵапак пуны уллё шоры сюриллям. Таӵе кышкытлык асьме котырын но вань гинэ. Тросаз гуртъёсын калгись пуныосын пумиськылыны тупа. Валаны кулэ, пуны — гурт живот. Кырын сиён мед шедьтоз шуыса лэзё-а, мар-а? Ма, сиён тырмытыны уд ке быгатӥськы, малы сое вордонэз. Калгыны ке лэзиськод, городын кадь сьӧраз гозыен ветлыны кулэ. Соослэн кузёоссы «уг куртчылӥськы» шуо. Пунылэсь визьзэ тодыны уг луы. Пуны адямилэн эшез шуид ке но, куддыр со кузёзэ но куртче. Калыкын юнме шуымтэзы, дыр: «Пуны — пуны со», «Пуны кадь лек». Ярам вылэм аслад гуртысьтыд 1-2 пуныос урам кузя калго ке. Кылсярысь, одӥг гурт пуме арлы быдэ!!! пуныосты яратӥсен чотась воргоронъёс чырткем, синмо кучапиосты но пуныосты куяса кельто. Туэ сӥзьыллань соос сизьым кузя луиллям. Гужеме потыса таосыд витен-витен пиязы ке, ма карыны кулэ? Ярам-ай толалтэе потэм бере, ыбылытӥзы. Талэсь азьло ваемъёсыз кылем гужем вылтӥ кӧня муртлэсь чипы-курегзэс изъянтӥзы. Кучапиосты, пуныосты вайыса кельтӥсьёслы, малпаськоды, гуртын улӥсьёс ӟеч кылъёс веразы, дыр? Кучапиосыз кулэ ӧвӧл ке, малы сое пиятытонэз? «Пиято ке, доразы чипы-курегзэс сюдыса мед возёзы, муртлэсьсэ медаз йӧтэ», — шуо гуртын.