Сизнер гуртысь бензовоз Миша (+фото)

Туала дыре машина адямилэн улоназ туж бадӟым инты басьтэ. Арысь аре, нуналмысь нуналэ сюрес вылын машинаослэн лыдзы будэ. Таин валче  транспортэн ветлон удысэн герӟаськем ӧнеръёслэн лыдзы но йылыса мынэ. Соин паймонэз но ӧвӧл, пӧртэм шаеръёсын, со чотын Россиын но, та ӧнеръёсын герӟаськем праздникъёс вань шуыса. Одӥгез сыӵе праздник — Автомобилистлэн нуналыз. Россиын со 1980-тӥ арысен коньывуон толэзьлэн берпуметӥ воскресеньеяз пусйиське.

Та праздникен валче 37 ар ӵоже руль сьӧрын ветлэм, техникалэсь котькуд чыры-пырызэ, яразэ тодэм, ас ужезлэн зэмос усточиез луыса дано шутэтсконэ потэм бадӟым стажен но опытэн водитель — Сизнер гуртысь Бураков Михаил Денисович — сярысь гожтэме потэ.

Михаил Денисович — ушъяськисьтэм, востэм, ужась но тыршись воргорон. Автомобилистъёслэн ӧнер праздниксы азьын со сярысь гожтон (2011-тӥ арысен дано шутэтсконын ини со, но ведь «азьло» водительёс уг луо) одӥгез муг гинэ луэ, мукетыз но вань — кемалась ӧвӧл воргорон 70 аресъем юбилейзэ пусйиз. Пиосмурт понна со сыӵе арлыд, куке, ортчем сюресэд шоры учкыса, «улонын мар умойзэ лэсьтыны быгатӥ, кыӵе пытьы кельтӥ» шуыса малпаськыны кутскиськод. Таӵе малпанъёс ласянь Михаил Денисовичлы сюлмаськыны уг тупа.

Кема аръёс ӵоже Ципья гуртысь мех фабрикаын ужам Нина апаен Сергей пизэс (нялтас вераса, со но туннэ нуналэ водитель луыса ужа), Елена но Ольга нылъёссэс будэто. Анай-атайзылэн шумпотонзылы, куиньназы но оскымон, йӧно нылпиос луо. Туннэ нуналэ Бураковъёслэн тямыс внуксы но вань ини. Гуртоосыз пӧлын но Михаил Денисович бадӟым гажанэ вутскем. Сизнеръёс тодо: кыӵе уж борды басьтӥськиз ке но, со сое пумаз-йылаз вуттоз. Сыӵе ик кылкутонэн аслаз ужез шоры но учкем Миша агай.

— 1971-1973-тӥ аръёсы армиын Подмосковьеысь строительной войскоосын служить карыса бертэме бере, 1974-тӥ арын февраль толэзе Смаиль гуртысь Шаумян нимо колхозэ ужаны интыяськи. Отысен монэ ДОСААФ-е шофёрлы дышетскыны лэзизы. Тӥни ӵапак со дырысен мон валай, техникаен вырыны мыным туж кельше но мон улонме та удысэн герӟало шуыса, — егит дыръёссэ тодаз вайыса вера Михаил Денисович.

Ӝыны ар ӵоже ДОСААФ-ын дышетскыса, егит ӧнерчи август толэзе машина нуллыны право басьтэ но колхозын ужаны кутске. Соку со уг но малпа, дыр, пенсие потытозяз но Шаумян нимо (берлогес «Смаиль» общество) колхозын тыршоз шуыса.

— Нырысетӥ ужам нуналме али кадь тодӥсько ук мон. 14-тӥ сентябрь, 1974-тӥ ар. Куазь гужем кадь шулдыр, шуныт вал со нуналэ. Мыным ГАЗ-51 грузовой машина сётӥзы. Вуж вал ке но, соин трос ӧй ужа ке но — ваньзэ-ӧвӧлзэ кык ар гинэ — со машинаез туж яратӥ. Соин нюлэскы пулы, эгырлы ветлӥ. 1976-тӥ арын ГАЗ-52 машинае пукси. Таиз бензовоз вал, та техникаен 1978-тӥ арозь солярка, бензин нуллӥ. Кыкетӥ грузовой машинае но выль ӧй вал, но мон солы кӧньыса ужай. Кулэ луыкуз, ачим ремонт но карисько вал, — азьланьтэ веранзэ водитель.

Кылкутӥсь ужасьлы 1978-тӥ арын выль техника оско — ГАЗ-53 машинаез. Сое Михаил Денисович ачиз, Пенза городэ мыныса, вае. Но та берпуметӥ техникаез уг луы али солэн — ог 7-8 арскын со молоковозысь бензовозлы переоборудовать карем ГАЗ-53 машинае пуксе (тунсыко, кема аръёс ӵоже бензовозэн ужам Миша агаез гуртоосыз но, Смаиль гурт калык но «Бензовоз Миша» нимен тодо). Собере кӧня ке ар молоковозэн но ужа. Нош пенсие ини 2011-тӥ арын ГАЗ-53 самосвал машинаен ужаса потэ.

— Тӥни озьы 37 ар ӵоже грузовой машинаосын ужай, — шуэ Михаил Денисович. — Ужме яратӥ, та ӧнерез быръеме сярысь ноку ӧй жаля. Сюлмы монэ техника борды кыскиз. Веранэз ӧвӧл, уже кылкутымон, но со дыре ик тунсыко вал. Мынам мукет техникаен ужаме но ӧз поты. Кылсярысь, тракторен. Малы ке шуоно мыным сюрес вылэ потыны, мае ке выльзэ адӟыны, инкуазьлэн чеберезлы выльысь но выльысь синмаськыны кельше вал. Мон уг вераськы, туж кыдёке кытчы ке поталляй шуыса — самой кыдёке мынэме Можга луиз, дыр, Казане но трос пол ветлылӥ. Но одӥг тодмо сюрестӥ ветлон сярысь пӧртэм интыосы вуон мон понна трослы тунсыкогес вал. Кытчы гинэ мыноно ӧз луы уж ласянь…

Но зэмзэ верано ке, уж ласянь гинэ ӧвӧл, гуртоосызлэсь куаразэс кылзыса юрттон понна но туж трос пол сюрес вылэ потон дыръёсыз луо шофёрлэн. Михаил Денисович ужаны кутскон вакытэ но, берлогес но, гуртъёсын техника ӧвӧл шуымон, чиньыен лыдъямон гинэ вал. Сизнерын, кылсярысь, кык гинэ техника луэм — Миша агайлэн бензовозэз но Тарасов Филимон агайлэн ДТ тракторез.

— Такси интыын вал ини. Клубын кино учкыса пукон вакытэ но, дорысь кыӵе ке ужъёсты ужаку но — нуналлэн котькуд вакытаз — гуртоослы юрттон понна машинаям пуксьыса кошкыны тупалляз. Роддоме гинэ кӧня пол нылпи вайись нылкышноосты нуллӥ но, вайи но… Огпол но нокинлы отказ ӧй сёты, котьку адямилэсь югдурзэ валаны тырши, — вера та сярысь Михаил Денисович.

Дасо аръёс ӵоже тыршыса ужам водительлэн трос грамотаосыз, данъян кагазъёсыз вань. Сое «Ударник коммунистического труда» нимен но пусйиллям. Арлы йылпумъян лэсьтон отчётъёсын, Сабантуйын но ӧнер праздникъёсын герӟаськем ужрадъёсын Миша агаез трос кузьымъёсын пусйиллям. Но тужгес бадӟым кузьым со понна — гуртоосызлэн таукарон кылъёсыз. Солэсь лэсьтэм ӟеч ужъёссэ гурт калык али но уг вунэты.

— Ноку но таукарон кылъёсты кылон яке кузьымъёсты басьтон понна ӧй ужа. Оскем ужез котьку рос-прос но дыраз быдэстыны тырши. Капчи ӧз луы: техникаын со дыре нокыӵе каньыллыкъёс ӧй вал, сюрес вылын но пӧртэмез луиз. Гараж ӧй вал бере, техникаез урамын тупатъяны тупалляз зор улын но, толалтэ кезьытэн но. Кортэз кие пӧзьы поныса но ремонт карыны уг луы вал ведь, — секыт ужан аръёссэ тодае вае воргорон.

37 ар ӵоже руль сьӧрын ветлэмез но, кезьытэн гольык киын кортэн выремез но али тазалыказ шӧдӥськем — Миша агайлэн киосыз но, пыдъёсыз но висьыло. Но 1970-тӥ аръёсы берытскыны луысал ке, нош ик со вуж ГАЗ-51 машиналэн руль сьӧраз пуксьысал, шуэ…