Хезмәт

«Сюрес вылын лябесь пыдъёс но кыдало»

Удмурт гуртъёстӥ но удмуртъёс улоно интыостӥ велопробегез ортчись воргорон сярысь

«Нырысетӥ сентябрь. Мон ини куинь арня ӵоже сюрес вылын, куинь шаеръёсы вуылӥ. Та дыр куспын Хельсинкиысь, Сипполиысь, Таллинысь но Санкт-Петербургысь удмуртъёсын тодматскыса вутски. Котькытын монэ туж ӟеч но шуныт пумитазы, асьсэ доры кӧланы кельтӥзы но туж ческыт сюдӥзы». Тазьы гожтэмын «ВКонтакте» вотэсбамысь «Велопробег Хельсинки-Чемурай» группаысь страницаын. Нош страницалэн кылдытӥсез, со ик велопробеген ортчись но, Дмитрий Бушмакин луэ. Дмитрий Удмуртиысь воргорон, кудӥз кышкатэк потэм велосипедэн 7000 иськем ортчыны но сюресын пӧртэм улосъёсысь удмуртъёсын тодматскыны. Солэн ужпумез —  философской. Удмуртъёсын тодматскыса, Дмитрий ассэ но удмуртэз кадь «шӧдыны» малпа. ВКонтакте вотэсбамысьтыз со сярысь ӧжыт информация лыдӟыса валай: мыным одно ик Дмитриен тодматсконо. Тодматски. Дмитрий туннэ нуналэ но сюрес вылын ке но (туннэ-ӵуказе Казане но вуоз), мыным интервью сётыны соглаш луиз. Вераськеммылэсь одӥг люкетсэ тӥледлы но ӵектӥсько.

— Дмитрий, нырысь лыдӟисьёсмес асэныды тодматэ вал. Кытын тӥ вордскиды, кытын улӥськоды, кин луыса ужаськоды?

— Мон ачим Удмуртиысь Дебёс районысь луисько. Дебёсын ик улӥсько но. Сибир трактлэн историезлы сӥзем музейын ужай, но район кивалтэтэн лулчеберет синпелетъёсты быдтон политикаен герӟаськем соглаш луымтэосыным сокращение улэ шеди. Соин но, али трос ваньмон дыре вань бере, мон дунне вылтӥ ветлыны кошки. Мон туспуктыны туж яратӥсько, путешествовать карыны, яратӥсько оген улонэз, путешествиын ӵапак сыӵе дыр трос луэ.

— Велопробег радъяны кытысен малпанды кылдӥз? Кема-а со сярысь малпаськиды? Малы велопробегдэс удмурт гуртъёстӥ гинэ ортчытӥськоды?

— Вообще, мон малпаськем вал дунне котыртӥ путешествие ортчытыны, кытын вань удмуртъёс. Озьы мынам потэ вал егитъёслы возьматэме, макем паськыт удмуртъёслэн географизы. Нош малпан мон доры лыктӥз, куке мон Сибирьысь удмуртъёс сярысь тодӥ — та монэ туж паймытӥз. Бадӟым путешествие малпасько вал, но грантъёсты вормыны быгатытэк, аслам люкам уксёелы пичигес путешествие кошки.

— Кытчы тӥ туннэ нуналэ вуылӥды ни? Кытын тӥледлы тросгес кельшиз?

— Финляндилэн, Эстонилэн сюресъёстӥз ортчи ни, озьы ик Ленинградской, Тверской, Новгородской улосъёсы вуылӥ. Сюресъёс но водительёслэн велосипедист шоры учкемзы мыным тужгес но Финляндиын кельшиз. Тужгес кышкыт Россиын ветлыны. Татын тон водительёслэн ветлэмзылы йыркуръяськыса, путешествилэсь чеберзэ, шӧмзэ но валатэк кылиськод. Сюрес вылын радъям сервисъя ваньмыз огкадь, шуыны луэ. Одӥг шаерын но велосипедъёсты пуктон инты (парковка) ӧй вал, Норвегиын сяна, отын вань каньыллыкъёс но луизы — туалет, ӝӧкъёс но жаг куян контейнеръёс. Но, зэмзэ верано ке, ӵошатон понна мыным дыр ӧз тырмы. Эстониез пыр-поч ӧй учкы. Таиз шумпотымон: Финляндиысь пулэсь лэсьтэм архитектурной музейёс выллем объектъёсты, Россиысь Новгородской Кремлез, Питерысь Васильевской шормуӵез, бадӟым архитектурной синпелетъёсты но трос мукетсэ бушын учкыны луэ. Нош Таллинысь Вуж город — со туж чебер но паймымон инбам улын музей, кудаз адямиослэн юртъёсазы пырыса бушын вуж галереяосты но учкыны луэ. Нош кыӵе шуныт монэ пӧртэм интыосын пумитазы!

— Кыӵе пумитазы? Вералэ-ай кылдэм мылкыдъёсты сярысь.

— Финляндиын мон Эдуард Хакимовен но Светлана Едыгароваен тодматскыса вутски. Соос та шаерын улэмзылы шумпото но мукет интые улыны кошкыны уг малпало. Мыным соос мадизы Финляндиысь ӧжыт лыдъем удмуртъёс сярысь но. Татысь удмуртъёслэн кусыпъёссы матын ӧвӧл вылэм, пумисько соос  кыӵе ке финн-угор праздникъёсын гинэ. Нош тани Удмуртие ялан ветлыса уло вылэм. Светланалэн нылпиосыз куинь кылын верасько: фин, француз но удмурт. Нош тани мукет удмуртъёслэн нылпиоссы, кудъёсыныз мон татын пумиськыны вуи, удмурт кылын уг верасько ни, кӧня ке кылъёсты гинэ тодо. Таӵе югдур Эстониын но Питерын. Таллинын удмуртъёслэн «группазы» туж активной. Соослэн вань асьсэ огазеяськонзы, «Ошмес» ансамбльзы но. Та понна кивалтӥсьсылы, Муш Надилы, бадӟым тау каро татысь удмуртъёс, малы ке шуоно вань кадь костюмъёсты со ачиз вуре. Таллинысь но Тартуысь удмуртъёс ӵем пумиськыло, ог-огзы доры куное ветлыло, ма соос трос но вылэм (кинъёсын мон пумиськи, веразы, ог 400 матын удмуртъёс вань шуыса). Удмурт кылэз тодо ке но, тросгес ӟуч кылын верасько. Соос но Эстониын улэмзылы шумпото, Россие берытскемзы уг поты. Но озьы ик Удмуртие ӵемгес куное бертыны тыршо. Ма, асьсэос но Удмуртиысь куноосты концертъёсы, фестивальёсы яке огшоры куное витё. Питер — туж бадӟым город. Отын вань кык инты, кытын егит удмурт землячество (солы али куинь ар гинэ) люкаськонъёс но репетициос ортчытъя. Тунсыко: одӥгез Питерысь пиосмурт, Пётр, удмурт кылын вераськон манеръёсыз воштӥськизы ни шуыса вераз. Но озьы ке но, со умой вераське удмурт кылын. Егит землячествоысь удмуртъёс ваньзы, шуыны кулэ, умой тодо удмурт кылэз, но тросгес ӟучен верасько. Тани кыӵе йылпумъян мон аслым лэсьтӥ: йӧскалык лулчеберет котькытын популярнойгес луэ. Финляндиын студентъёс финн-угор ӝытъёс ортчытъяло, Эстониын но егит удмуртъёслэн землячествозы азинтӥське, Питерын кык адямиос, кудъёсыныз мон тодматски, удмурт лулчеберетэз утён но азинтон борды басьтӥськыны малпало. Та мон понна туж шумпотымон. Котькуд пумиськон бере мон мукет городэ сюресме кутылӥ, нош мынам аслам но йырам малпанъёсы удмурт кылын бергазы ни.

— Шӧдӥське, удмуртъёслэн улонэнызы тунсыкъяськиськоды шуыса. Тӥ бен асьтэос удмурт-а? Вераськиськоды-а удмурт кылын?

— Мон удмурт. Пичи дыръя удмурт кылын вераськисько вал. Но собере анае монэ тросгес ӟуч кылын вераськыны дышетӥз. Школаын но ваньзы ӟуч кылын вераськизы. Озьы мон но ӟучоми. Туннэ нуналэ удмурт кылын секытэн вераськыны быгатӥсько, но азьпалан удмурт кылэз дышетско но умой валаны кутско шуыса оскисько.

— Дмитрий, сыӵе бадӟым сюресэз велосипедэн ортчыны быгатон понна туж умой физической дасьлык луыны кулэ, дыр. Тӥ спортсмен луиськоды шат?

— Мон профессиональной спортсмен ӧвӧл. Сюрес вылын велосипедэн ветлон понна спортсмен луыны кулэ но ӧвӧл. Сюрес вылын лябесь пыдъёс но кыдало. Мон спортэн вырисько но умойтэм сямъёсын уг эшъяськиськы. Одӥгез гинэ вань: мон бер изьыны выдӥсько. Малы мон велосипед бырйи? Малы ке шуоно соин туж кужмо ветлыны уг луы, сон но инкуазь чеберлыкез адӟыса вуттыны луэ. Озьы ик велосипед экономичной — бензинлы, техосмотрлы, страховкалы уксё поттоно ӧвӧл, кунгож сьӧрын ветлон понна право но басьтоно ӧвӧл. Али со сяна велосипед тазалыкез но юнматэ — тӥни мамында «плюсэз».

— Ку бен тӥ велосипедэн путешествовать карыны кутскиды?

— Ог дыре Алтаез туж учкем потэ вал, но дунтэмгес мед луоз шуыса. ??? Автобусэн туж дуно усе. Соин но ми юлтошеным велосипедъёс, кулэ луись снаряжение басьтӥмы но кошкимы. Со вал нырысетӥ велопутешествие, кудӥз 1600 иськемлы кыстӥськиз. Республикалэн бадӟым музейёсаз но луимы — Телецкой тыын но, Тюнгурской тропаын но. Огъя лыдӟид ке, поездэ билетъёсын ӵош та сюресмы милемлы 11 сюрс манет тыр усиз. Воксё дунтэм ук. Со сяна, мугоредлы но трос пайда, сюрес вылын адямиосын но тодматскиськод...

— Таӵе бадӟым путешествие ортчытэм бере туж трос адямиосын тодматскыса вуиллямды, дыр. Пӧртэм интыосысь удмуртъёсын вераськем бере, удмурт кыллэн туннэ нуналэ югдурез сярысь но солэн азьланез сярысь мар вераны быгатысалды? Мар малпаськоды та сярысь?

— Мон малпасько, удмурт кыл воштӥськоз шуыса. Оло, куке воксё ышоз, но али дыре гинэ уз. Малы ке шуоно сое котькытын кельтыны мылкыд карозы ?. Но лулчеберетэз кельтыны гинэ тыршоно ӧвӧл, сое азинтоно. Та учыре гинэ удмурт кыллэн азинсконэз луоз шуыса малпасько.

— Мыным дыр шедьтэмды но вераськемды понна бадӟым тау, Дмитрий. Малпасько, тӥляд кышкатэк бадӟым путешествие потэмды ми палась удмуртъёсты паймытоз но, шумпоттоз но. Удмуртъёс пӧлын но сыӵе кышкасьтэм адямиос вань вылэм шуозы.

 

Реклама

Текстын «ВКонтакте» вотэсбамысь «Велопробег Хельсинки-Чемурай» группаысь басьтэм Дмитрийлэн гожъямъёсыз но вань.

Нравится
Поделиться:
Реклама
Комментарии (0)
Осталось символов: