«Та кылъёсты тодыса, мон одӥг гуртын но сютэм уг кулы»

Выжыезъя крашин бигер луись Вылын Субаш гуртын вордскем Александр Фёдоров ини кема аръёс ӵоже удмурт гуртын улэ — нырысь Улын Ушмаын семьяенызы инъяськиллям, собере улонзэ Шор Ушмаын азьланьтэм. Соин но зэмос бигер луэмез шоры учкытэк (анаез но, атаез но крашин бигеръёс), туннэ нуналэ со удмурт кылын но, ӟуч кылын но эркын вераське. Вордскем кылзэ но уг вунэты.

Ушма палъёсы Фёдоровъёсты улон 1980-тӥ аръёсы вуттэ — соку Александрлэн анай-атаез ёросын дано луись Улын Ушма гуртысь кирпич заводэ ужаны интыясько, улыны но со гуртэ ик выжо. Александрлы соку тямыс арес луэ.

— Ушмае улыны выжон дырмы школае мыноно дырлы тупаз. Соин покчи классъёсты ини Улын Ушмаысь школаын дышетски. Ӵапак удмурт кылэз но со дыре дышетски шуыны кулэ. Сое дышетскон мыным секытэн ӧз йӧты, малы ке шуоно гуртысь вань кадь юлтошъёсы удмурт кылын вераськизы, соосын ӵош шудыса, удмурт кылын вераськыса будӥ, — маде Александр Ильич.

Бигер пияшез чылкак удмурт гуртысь школаын удмурт кыллы дышетымтэзы, но со аслаз кулэ каремезъя урокъёсы ветлэм. Эшъёсыз урокын пукыку, солэн ужтэк пукемез потымтэ. Озьы со удмурт кылэз умой валаны но тодыны кутскем.

— Пичиос иворез губка кадь асьсэлы пыӵато ук, мынам но озьы луиз. Покчи дырысен дышетскемысь, умой тодӥсько удмурт кылэз. Урокъёсын пукыса дышетски. Мыным оценка ӧз пуктылэ ке но, дышетскон тунсыко потэ вал, — валэктэ Александр Ильич.

Тямысэтӥ классозь дышетсконзэ Александр Покчи Лӧзяысь школаын азьланьтэ. Собере  Урнякысь СПТУ-ын куинь ар ӵоже дышетске. Отын удмурт кылэз уг дышетскы ке но, нуналмысь вераськоназ удмурт кылэз со ӵем кутэ. 

1991-1993-тӥ аръёсы Александр Ильич армиын служить каре. Дораз бертэмез бере, со но анай-атаез кадь ик кирпич заводэ ужаны интыяське. Та уж солы тодмотэм уг луы ни: пичи дырысеныз, 5-тӥ классэ йылпумъямез дырысен, Александр со заводэ ужаны ветлэм (со дыръёсы пиналъёс тросэз гужемзэ кытчы ке но ужаны интыяськиллям) — я заводэ, я колхозэ, я эшшо кытчы ке но.

— Ӟучъёс верало ук «Где родился, там и пригодился» шуыса. Та кылъёс мыным туж тупало. Зэмзэ верано ке, мон школаын но умой дышетски, но дышетсконме азьланьтыны ӧз кылды ни. Гуртам кыли, татын улонэ радъяськиз. Со сярысь жалясько шуыса вераме уг луы, — шуэ Александр Фёдоров. — Улон ас ӧраз пыриз, дышем сямъя одӥг графикъя ужаськод, со режимез воштэм уг поты вылэм ини дышем бере. Дорамы пудо но вордӥськомы, улонмы тыр.

Табере куать ар ӵоже ини Александр Ильич «Сурнай» обществоын валтӥсь энергетик луыса тырше. «Сурнайын» пӧртэм калыкысь адямиос ужало — бигеръёс но, ӟучъёс но, удмуртъёс но. Соин кылъёсты тодэмез Александр Ильичлы ужаз но ялан юрттэ. Валче ужано эшъёсыз но удмурт кылын вераськемезлы кемалась уг паймо ни — дышиллям.

— Зэмзэ верано ке, пичи дырысеным мыным удмурт кылын ӧвӧл, бигер кылын вераськон шуг-секытъёсты кылдытэ вал, малы ке шуоно Ушмае улыны лыктэммы бере, вань тодмоосы я удмуртъёс, я ӟучъёс луизы. Бигер кылын анай-атаен гинэ вераськи. Серемес но, малпаськытӥсь но факт. Ушма выллем гуртъёсын, кытын валче тупаса пӧртэм калыкысь адямиос уло, тросэз удмуртъёс бигер кылын умой верасько, бигеръёс — удмурт кылын. Та паймымон но ӧвӧл кадь ини. Та милемлы нокыӵе но уг йӧты — дышиськеммы, — шуэ нош ик собеседнике.

Сомында ар ӵоже куинь кылын вераськем бере, Александр Ильичлэн  нимысьтыз «языковой переключателез» туж умой ужа ини. Верасько кытын ке удмурт кылын — со удмуртэн ик вазе, бигеръёс ке вӧзазы — бигер кылэн вераськыны кутске, ӟучъёсын ке валче луэ — ӟучен вераськонзэ мытэ. Вылаз ик семьязы но соослэн сыӵе, трос йӧскалыко. Варманаез, кылсярысь, пор вылэм — Татьяна Терентьева Улисьялысь луэ, Улын Ушмае картлы кошкем. Туннэ нуналэ со но удмурт кылын туж вольыт но эркын вераське. Варматаез, Валерий Терентьев, удмурт. Терентьевъёслэн семьязы нимысьтыз ик ушъямон. Кык нылъёссы но, Олеся но Инна, удмурт, пор, бигер, ӟуч кылъёсты тодо.  Александр Ильичлэсь кузпалзэ, Олеся Валерьевнаез, удмурт кышномурт шуыны кулэ (анаез пор, атаез удмурт). Нялтас вераса, вуоно кузпалэныз Александр пичи дырысеныз тодмо луэм. Соос валче шудӥллям, валче будӥллям, пичи дырысенызы куспазы пӧртэм кылын вераськиллям.

— Анае но атае пӧртэм калыкысь ке но, мон ачим тросгес удмурт кылын вераськыса будӥ. Удмурт гуртын улэмысь озьы луиз, дыр, со. Анае но, пор луэмез шоры учкытэк, ньыль кылын эркын вераське. Соин мон но, Инна сузэры но, со кадь ньыль кылъёсты тодӥськомы — удмурт, пор, бигер, ӟуч кылъёсты. Тодӥськомы гинэ ӧвӧл, вераськиськомы но. Иннаен куспамы удмурт кылын вераськиськомы.  Мон пор кылын туж ик уг вераськиськы, малы ке шуоно татын, Шор Ушмаын, пор кылын вераськыны адямие но ӧвӧл. Нош егит дыръя ӵемысь Улисьялэ, анайлэн вордскем гуртаз куное ветлӥсько вал но отын егитъёсын, аслам эшъёсыным пор кылын вераськисько вал. Соин ачим кулэ каремысь, тунсыкъяськемысь гинэ пор кылэз дышетски шуыны кулэ. Табере Улисьялэ ветлыны но дыр ӧвӧл ини — гуртын уж ноку уг быры.., — вераськонамы итӥське Александрлэн кузпалыз Олеся.

Олеся Валерьевна ини кызь арлэсь кемагес «Сурнай» обществоын тырше, Ушма гуртысь фермаын скалъёсты кыске. Аслэсьтыз ужзэ со кулэезъя быдэсъя. Инна сузэрыз Казаньын аслаз семьяеныз улэ. 

Александр но Олеся Фёдоровъёслэн кык нылъёссы вань. Соос но удмурт, ӟуч, бигер кылъёсты тодо, валало, нош семьяязы тросгес ӟуч кылын верасько вылэм. Шор Ушма гуртын кӧня ке ар талэсь азьло гинэ улыны кутскем семья, со дырозь Улын Ушмаын улӥллям.

— Татарстанын улӥськомы бере, тросэз адямиос, йӧскалыксы шоры учкытэк, бигер кылэз умой тодо. Соин, кылсярысь, кыӵе ке компаниын куинь удмурт но одӥг бигер адями вань ке, вераськон одно ик бигерен луоз, озьы ведь? Та асьме адямиослэн виразы пыӵамын ини, асэрказ озьы вераськиськомы ини асьмеос. Та урод ӧвӧл шуыса малпасько. Мынам тани мае вераме потэ: кылъёсты тодон нокинлы ноку но уг люкеты. Со дыре ик мон уг вераськы, бигер яке удмурт кыл мынам яратоно кылъёсы шуыса. Но одӥгзэ малпаськытэк ик вераны быгатӥсько: та кылъёсты тодыса, мон одӥг гуртын но сютэм уг кулы. Та самой валтӥсез, — ас малпанъёссэ вуттӥз Александр Фёдоров.

Кыӵе компаниын гинэ ӧз луэ ке но, Александр Ильичез но, Олеся Валерьевнаез но котькытын ӟеч пумитало. Малы ке шуоно соосты «асьсэлэсь» адямиоссэс кадь пумитало ини. Бигерез соосты бигеръёс шуэ, удмуртэз удмурт каре. Асьсэос но кузпалъёс талы шумпото: матысь адямиосынызы, тодмоосынызы, эшъёсынызы  пӧртэм кылын вераськыны быгатэменызы котькин ушъяськыны уг быгаты ведь.