Хезмәт

Таӵе адямиос вылын возисько гуртъёс...

«Колхозын вордски, колхозын ужасько, колхозын улӥсько», — Юрий Назаров

Таӵе адямиос вылын возисько гуртъёс...

Кыӵе гинэ удысэз эн басьты, уж умой мед мыноз шуыса, нуналлы быдэ тыршыны кулэ. Пичи вамышен ке но, азьлань вамышъяно. Арысь аре улонмес каньылгес, капчигес кареммы но потэ. Но вань сыӵе удысъёс, кудъёсаз ужъёсты капчиёмытыны уг луы, кудъёсаз котьку адямилэн сак луэмез, ужлы сётскемез кулэ луэ. Малпасько, одӥгез сыӵе удыс — гурт удыс. Туннэ тӥледыз гурт удысын кема аръёс ӵоже тыршись, «Сурнай» обществоысь  усто механизаторен но сварщикен тодматэммы потэ.

«Колхозын вордски, колхозын ужасько, колхозын улӥсько», — Юрий Назаров

Статьяелэн нырысетӥ героез Юрий Якимович Назаров ачиз сярысь серекъяса тазьы вераз. Солэн ужан сюресаз тросэз луэм: пӧртэм техникаосын ужан, бусыын техникаез ремонт карон, уйин ужам сменаос... Бен, таӵе «адӟонъёс» пыр ваньзы механизаторъёс пото, дыр. Нош Юрий Якимович кадь дас куинь аресысен бусыын ваньзы уг ужало шол. Пичиысен техникаен вырыны яратӥсь воргорон улонзэ аслыз матын луэм удысэн герӟаны быгатэм: со кема аръёс ӵоже «Сурнай» обществоын механизатор луыса тырше ини.

Юрийлэн пичи дырысеныз техника борды кыстӥськемез валамон но: солэн атаез но ас дыраз колхозын комбайнэн ужам. Соин егит дырысеныз ик Юрийлэн атаез сьӧры ужаны ветлэмезлы паймонэз но ӧвӧл.

— Мон 1979-тӥ арысен комбайнэн ужасько ини шуыны луэ. Мыным соку ваньзэ-ӧвӧлзэ 13 арес гинэ вал. Дышетскыны но, ужаны но вутски. Атаен ӵош ужаса, гужембыт дырме бусыын ортчытӥсько вал, комбайнёрлэн юрттӥсез луыса озьы тӥни вить сезон ӵоже ужай, — валэктэ Юрий Якимович.

Школазэ йылпумъямез бере, 1983-тӥ арын, тракторен ветлыны право басьтон понна дышетскыны малпа но со арын ик колхозын ужзэ азьланьтэ егит воргорон (соку «Сурнай» общество Ленин нимо колхоз шуыса нимаськем — Н.Ж.). 1984-тӥ арын ини Юрий агайлы комбайн но оско — вить ар ӵоже бусыын ужам егит пиез кивалтэтэз синйылтэ но выль «Нива» комбайнэн ужаны ӵектэ. Но та комбайнэн кема ужаса уг вуы — 1985 арын Юрий Назаровез арми радъёсы басьто. Украинаын служить карыкуз но шофёр луэ со. 1987-тӥ арын дораз бертэ но колхозын ужзэ азьланьтэ.

— Бертэме бере ӝыны арлы матэ бензовозэн ужай но, собере комбайнэ ужаны пукси. Со дырысен комбайнэн ини. Тулыссэ МТЗ-80 тракторен ужасько, толалтэ слесарьлэсь ужзэ быдэсъясько, ремонт ужъёсты нуисько, гужемзэ комбайнэн ортчытӥсько ни. Пичиысен техника борды дышемын бере, ваньмыз та ужъёс сюлэмъя, — шуэ Юрий Якимович.

Нош тани егитъёс «Сурнайын» трос ӧвӧл вылэм. Та сярысь Юрий Якимович сюлмаськыса шуэ: «Ӧвӧл егитъёс, колхозын ужамзы уг поты. Ӵош ужась эшъёсы но шоро-куспо арлыдъем яке арлыдоос. Мыным аслым но вуоно аре 55 арес тырме ни. Кин азьпалан ужалоз — уг тодӥськы». Ачиз сярысь со нош серекъяса вера: «Гужем мон «один в поле воин». Малы ке шуоно «Сурнайын» одӥг гинэ «Макдон» маркаё комбайн вань вылэм, но со комбайн Юрий Якимовичлэн. Та «эшеныз» соос дас одӥг ар ӵоже валче ужало ини. Юрий агайлэн верамезъя, туала дыре ужаны но капчигес, малы ке шуоно туала техника ужез капчиёмытэ. Соин солэн ӝожтӥськыны  мугез ӧвӧл. Тани интервью басьтон азьын звонить карыку но губияны мынэм вал — зоремысь, комбайнёрлы кӧня ке шутэтскон нунал сётӥллям. «Шутэтскисько ке но, ужын мынам ваньмыз боевой дасьлыкын», — серекъя ачиз механизатор. «Сурнайысь» валтӥсь агроном Фарид Мухамметзянов но та кылъёссэ зэматӥз. Туннэ нуналэ Юрий Якимович семьяеныз Покчи Лӧзяын улэ. Кузпалэныз Иринаен соос кык нылъёсты — Оксанаез но Ларисаез — будэтӥзы. Кык внукъёссы но вань ини, матысь дыре куинетӥез но вордскоз. 

«Сурнай» обществоысь ужасьёс умой валало, гужем уж тросгес луэ шуыса. Слесарьёс вань техникаез — сеялкаосты, культиваторъёсты — ремонт карыса радъяло, ужаны дасяло. Механизаторъёс ӵукнаысен ӝытозь бусыын. Огъя вераса, котькин аслэсьтыз ужзэ умой тодэ.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: