Таӵе адямиос вылын возисько гуртъёс-2

Владимир Антонов: «Гужеме комбайнъёс дорын ортче»

Гуртын ужась адями ваньзэ чида, куддыръя луонтэмзэ но лэсьтыны быгатэ шуо. Та веран кылъёс туж тупало одӥгез ушъямон сварщиклы Владимир Владиславович Антоновлы но. Вордскемын Владимир Владиславович Улын Ушма гуртын 1975-тӥ арын. Балтась школаын дышетске, собере Нурмаысь СПТУ-ын ӧнер басьтыса 1993-тӥ арын армие кошке. 1995-тӥ арын, службазэ йылпумъяса, гуртаз бертэ. …нерезъя тракторист-машинист луэ ке но, ассэ пӧртэм интыужъёсын утем со, нокыӵе ужлэсь кышкамтэ. Но кызьы вера ачиз Владимир Владиславович, техникаен ужанлэсь но умойгесэз со понна ӧвӧл. Туннэ нунуалэ Бадӟым Лӧзя I люкет гуртын улӥсь воргорон «Сурнай» обществоысь тужгес усто ужасьёслэн одӥгез. 2007-тӥ арысен та обществоын со сварщик луыса ужа ни. Владимир Антонов передвижной сваркаен ветлыса ужа. «Гужеме комбайнъёс дорын ортче, — шуэ со. — Лумбыт бусыын, комбайнъёс умой ужало ке но. Тодыны уг луы ук, ку соос тӥяськыны быгато. Мар ке луиз ке, соку ик юрттӥсько». Котькуд ужан нуналыз дышем графикъя ортче ке но (ӵукна сизьым часлы  гараже лыктэ, кинлы маин юрттыны кулэ — ремонт кароно-а, мае ке варить кароно-а — юрттэ, собере бусые сюрес кутэ), Владимир Владиславович аслэсьтыз ужзэ яратӥсько шуыса оскытӥз. Кельшымтэ ужын, пе, ужаны секыт.

Воргоронлэн поддержкаез но умой. Солэн кузпалыз Наталья но «Сурнайын» ужа — кунян сюдэ вылэм. Кузпалъёслэн кык нылпиоссы будо — Игнат (5-тӥ классэ выжиз), Даша (2-тӥ классэ выжиз).

Юрий Назаров но, Владимир Антонов но адӟем карымон ужасьёс. Юнме гинэ соосты газет бамъёсы поттыны ӧм малпалэ: воргоронъёс котькыӵе ужлы но усто, ужлэсь пегӟыса но уг ветло. Техника но соослэсь кылзӥське, асьсэос но соосты утьыса гинэ возё. Кивалтэтэн но, ӵош ужась эшъёсынызы но кусыпъёссы умой. Азьпалан но воргоронъёслы ужазы но улоназы шудбур сӥзисько.