Тагашур гуртысь Раимова Зоя Сергеевналы — 90 арес

Балтась районлэн главаезлэн воштӥсез Наиль Сабирзянов, Балтась районысь «Наз» центрлэн директорез Гульнара Ахмадиева, «Труд» обществолэн председателез Рашид Хадиев, Ципья гурт поселенилэн главаез Азат Нотфуллин Зоя Сергеевнаез ӟечкыланы лыктӥзы. Сӥзизы солы юн тазалык, кузь гумыр но каньыл пересьмон нуналъёс. Кузьмазы РФ-лэн Президентэзлэсь ӟечкылан открытказэ, район главалэсь Таукарон гожтэтсэ, сяська керттэт но мукет кузьымъёс.

...Зоя Сергеевна 1930-тӥ арын Дурга гуртын трос нылпиё крестьян семьяын вордске. Пичиысен гурт улонлэсь шуг-секытъёссэ адӟе, нылпи дырысеныз пиосмурт ужъёсты ужаны дышетске.

Быдӟым ож кутскыку, Зоя ньылетӥ классэз йылпумъямын луэ, дас одӥг аресъем нылаш. Жугиськон кутскем бере дышетскыны быгатымтэ ни. Войнаен сэрен дышетскон дырыз гинэ ӧвӧл, пинал дырыз но йылпумъяське — кутске выль бадӟым улонэз... Со улонын — пумтэм-йылтэм уж, сютэм улон. Жугиськон йылпумъяськытозь Зоя нюлэс погыръяны ветлэ, тодаз вае ужзы вискын сисьмем картофка сиемзэ (соиз но ку луэм, ку — луымтэ). Ваньзы, ожын луэмъёс но, тылэ кылемъёс но, оскиллям, война кема уз кыстӥськы шуыса, нош улон ваньзэ ас сяменыз радъям.

Нюлэскын ньыль ар ӵоже пиосмурт ужъёсты быдэстэм Зоя жугиськон бырем бере ини нокыӵе ужлэсь но уг кышка — со ваньмызлы дась луэ.  Улон ачиз каллен-каллен ваньзэ ас интыяз пуктэ. Одӥг пол, Тагашур гуртэ апаез доры куное мыныкуз, Зояез татын вуоно кузпалэз синйылтэ но сое лушка (та луэ 1953-тӥ арын). Со нуналысен нылмуртлэн кутске выль улонэз, со кылдытэ ас семьязэ (жаляса верано, кузпалыз Павел Эшманович кызь ар талэсь азьло кулэм ини). Гуртысь фермае ужаны интыяськыса, Зоя Сергеевна отын пенсие потытозяз тырше. «Труд» колхозэ уженыз пыртэм люкетэз вераса быдтонтэм: Зоя Сергеевна, сомында аръёс ӵоже валъёсты сюдэмез сяна, мукет трос пӧртэм ужъёсты но быдэстэм — мае косӥллям, сое карем.

Зоя Сергеевналэн но Павел Эшмановичлэн луиллям куать нылпиоссы, кыкез кулэмын ини. Со сяна, соос нош одӥг нылэз вордыны басьтӥлям. Туннэ нуналэ юбиляр улэ Валентин пиезлэн семьяеныз (пенсиын ини), Лариса кенэныз («Труд» обществоын ужа), мукет нылпиосыз ас семьяоссэс кылдытыса уло. Гажано песянайлэн  вань дас куинь внукез но укмыс правнукез.

— Песянаймылы ини 90 арес тырмиз, ми куспын 70 арес. Песяе котьку шумпотэ мынам вормонъёсылы, со шумпотэ мынам дорам бертэмелы, со котьку мыным ӟечсэ гинэ сӥзе. Со милям туж чидась но тыршись. Быгатӥз куать нылпиослы улон сётыны. Мон соин туж данъяськисько. Тау бадӟым, яратоно песяе, эн висьы, али кема-кема милемыз шумпоттыса улы, — сӥзе Зоя Сергеевналы Саша внучкаез.    

Бен, аръёс ӝог ортчо — арлыдо кышномуртлэн  йырсиез пурысьтам, кужымез бырем, синъёсыз уг адӟо, пельёсыз уг кыло... Но озьы ке но, та дуннеын пересьмыса улон но — бадӟым шуд. Тае Зоя Сергеевна бадӟым праздникеныз ӟечкыланы вуэм куноосты 95 аресъем юбилеяз но вите шуыса верам кылъёсыныз юнматӥз.