Туж лачмыт сямо но каньыл мылкыдо вал

Отысен ас мылкыд каремезъя 1939-тӥ арын армие кошке. 9 ар ӵоже Чус океанысь (Тихоокеанской) Военно-Морской флотын служить каре. Отысен Япон жугиськонэ пыриське. Жугиськон бере службазэ азинтэ. 1948 арлэн пумаз армиысь бертэ. 1949 аре со семья кылдытэ Макарова Мария Ивановнаен. Сое Гондыргуртэ Арча педучилищеез йылпумъямез бере 1940 аре дышетӥсь карыса ужаны лэзё. Со дырысен пенсие потытозяз 1975 арозь Мария Ивановна ужаз Гондыргурт начальной школаын. Атае армиын дыръяз ик Коммунистической партилэн радаз пыре. Армия бере со трос аръёссэ партийной ужлы сӥзе. Кык но ӝыны ар партилэн Балтасьысь районной комитетаз пропагандист луыса ужамез бере, 1951 арын партилэн областной комитетаз кылдытэм 2 аръем республиканской партийной школае дышетскыны пыре. Та школаез йылпумям бере, партилэн Ципьяысь районной комитетаз библиотекалэн заведующиез луыса ужа. Нош 1954 арын Гондыргуртын М.Горький нимо колхозлы председателе быръё. Татын со туж кема ик уг ужа. Отысь кошкем бераз сое Покчи Лӧзя школае историен дышетӥсе тодмояло. 1958 арысен журналистикаен герӟаське но редакциын ужаны кутске. Татын со 4 ар ӵоже районной газетлэн редакциезлэн гожтэтъёсъя отделэныз кивалтэ. Гужем 1962 арын район Арчае выже, соин валче газетлэн редакциез но. Озьы Арчаын удмурт кылын газет потыны кутске. Отын со 3 ар переводчик но редакторлэн заместителез луыса ужа. Мурт дорын квартираын улыса ужанлэсь, толалтэ сюрес вылын трактор дӧдьыын кынмыса (соку автобусъёс уг ветло вал али) шутэтскон нуналъёсы бертыса ветлонлэсь «шулдырзэ» соку атае уно адӟиз. Шутэтскон нуналзы одӥг гинэ вал, али кадь 2 нунал ӧй вал. Ми 5 нылпиос, анаймы, атаймылэн анаез, песяймы, песяйлэн сузэрез (со но ми дорын улӥз) — ваньмы чидатэк витиськом вал атайлэсь бертэмзэ. Со субботаяз ӝытсэ бертэ но понедельнике вазь ӵукна ик кошке вал. Атай бертыса пыриз ке, кыӵе шумпотон луэ вал милям семьялы, тужгес ик нылпиослы. Милемыз со туж яратэ вал, небыт, капчи мылкыдо вал, огпол но тышкаськыса уз вера вал.

Район центр 3 арскын выльысь Балтасе берытске. Газетлэн выльысь Балтасьын потыны кутскемезлы шумпотӥз ке но, атайлэн улонэз олома ӧз капчиёмы. Нуналлы быдэ, кыӵе куазь но уг луы вал Гондыргуртысен лыктыны, нош ӝытсэ бер гинэ бертыны кулэ, вылысьтыз кажанэз уг усьы вал. Тулыссэ но, сӥзьылзэ но зор-котъёслэсь возьма вал, нош толалтэ кезьыт тӧлъёслэсь, гӧпъёслэсь. Нышырлы но адямиослы кадь дораз бертыса пӧсь сиён уг йӧты, унозэ столовое ветлӥз, ярам ай соку хоть столовой ужам. Аръёс мынэмъя, мӧйымемъя сюрес вылын ветлонъёс шугомо, уйинлы но бертытэк редакциын кӧлыны кылем нуналъёс ӵемгес луыло,озьы тӥни ӝыт шыд но «кӧс» сиёнлы пӧрме. Гондыргуртозь соку нокыӵе транспорт но уг ветлы вал гурт палэнын бере, куке-соку гинэ гуртысен валэн лыктозы вал. Гужемзэ, сӥзьылзэ велосипедэн ветлӥз, куазь кӧс дыръя. Нош редакциын кӧлон понна раскладушка басьтӥз, тӥни сыӵе комфортной вал солэн кӧлан «диванэз». Тӥни озьы басьтӥз сиён пурты висён, отысен ини гумыр вакчиёмон.

Атае туж лачмыт сямо но каньыл мылкыдо, огъя ужлы лулзэ-сюлэмзэ сётыны дась улӥсь адями вал. Аслаз валтӥсь ужез сяна, общественной ужъёсын туж активной вал. Кема аръёс ӵоже «Алга» колхозын пропагандист луыса бадӟым уж нуиз. Чиданлыкез гинэ ӧвӧл, ужын огшоры луэмез, мукетъёсты гажанэз но пумтэм вал солэн. Со дырлы солэн 4 внукез вал, соосты со туж яратӥз, возь вылэ, шур дуре, нюлэскы ветлӥзы валче. Соос али но ӵем-ӵем верало бабайзы сярысь.

1965-тӥ арысен «Азьлане» газетлэн редакторезлэн заместителезлы тодмоямын вал, пенсие кошкытозяз но та ужез быдэсъяз. Азьло дырын ужзы али кадь капчи ӧй вал, наборщицаос киын бичаса газетэз дасяло вал, газетсэ но дыраз поттоно, арнялы 3 газет потэ вал.

Пенсиозь чидало ни шуыса ужаса ветлӥз вал. Нош пенсизэ кема аръёс ӵоже басьтыса, шумпотыса, шулдырзэ адӟыса улыны ӧз кылды солы. Ваньзэ-ӧвӧлзэ 1 ар но ӧз басьты со пенсизэ. Та югыт дуннеысь со туж вазь кошкиз, секыт висён сое вормиз.

Светлана Гайсина

Балтась посёлок