Удмурт калык сямъёс но йылолъёс: Вӧй праздник

Та йылолэз пусйыло, выль ар бере сизьым-тямыс арня ортчыса, тулыспаллэн пумаз — южтолэзьлэн кутсконаз.

 Азьло дыре шулдыръяськыны-кунояськыны кутскиллям покчиарняе (четверге),  нош йылпумъяллям ӟучарня (воскресенье) нуналэ.

Юмшаны кутско вылэм покчиарняе. Со нуналэ ӵукна ик нянь, табань, мильым пыжылӥллям. Нуназе егитъёс шудо, кырӟало урам кузя валэн вортто, пе, вал. Валъёссэс пужыятэм ӵушкон, гырлы ошыса, шобретэн шобыртыса чебермаллям. Ӝытазе пересьёс юмшало, кырӟало вылэм, нош егит муртъёс, соослэсь эктэмзэс-кырӟамзэс учкыса, сьӧразы ветлӥллям.

Егитъёс куасэн нискылаллям, пичи дӧдьыосын, вал дӧдьыосын, юри тупатэм скамьяосын, черсон кубо вылын.

Юмшанлэн тужгес шулдыр дырыз луэм ӟучарня. Та нуналлы мӧйыос нимысьтыз дасяськиллям: брага но сур пуктылӥллям, картошка, мильым дасяллям, кык-куинь пӧртэм шыд пӧзьтӥллям. Вӧй келянэ мӧйы кышноос люкасько но уйбыт коркась корка ветло вылэм. Озьы Вӧй келянзы югыт луытозь кыстӥськылэм.

Али дыре но Вӧйдырез пусйыны тыршиськом. Одно ик табань, мильым пыжиськом, нош куд-ог гуртъёсын нимысьтыз шулдыръяськонъёс но ортчыто. Кылсярысь, Покчи Лӧзя гурт. Кӧня ар радысь ини отын та праздниклы сӥзьыса шулдыр ужрад радъяло.