Укмыс арес бере гинэ дышетскыны мынӥ...

Монэ бускель бабай, Демеев Семён агай, вазь ӵукна ик 2 часэн сайкатэ вал. Мон, ведра йыгаса, колхозникъёсты сайкатылӥ. Кутгозыен чыртые ошем ведраез бодыен йыгаса ветлӥсько вал, бабай чутэ вал, бодыен ветлӥз. Уин соку туж кышкыт вал. Самолётъёс гурт йылтӥ котькуд нунал ургетыса лобазы. Мыным соку бабай вера вал, соос, пе, Иж но Казань городъёсты утчало. Кыӵе кышкыт вал со. Мон бабайлэн дукес пушказ но пегӟылӥ. Ми соин 1941-1945 аръёсы 6 май толэзёзь озьы ветлӥмы. Нош 6 мае 1945 аре ӵукна ньыль часэн Левитан радиотӥ жугиськонлэн дугдэмез сярысь вераз. Соку бабай выдыса музъемез чупаз но султыса куинь пол кирос кариз. «Милямъёс вормизы!» шуыса, монэ кужмо карыса ӟыгыртӥз но чупаз.

Ӵукна 3 час бере кутьы но потэ, анайёс но соку ини бусые кошко вал. Геры кыскаса гыро, киын кизё вал. Берто вал ӝыт 10 часэн.

Мар бен сиимы? Чуньыбыж куарен пӧзьтэм шыд, поттурын, пушнер, сисьмем картофка. Дорысь картофкаез лапша карыса вандылыса куасьтылӥм жугиськонэ лэзён понна. Сое уйбыт паласа вандылыны тупа вал.

Пуэз бен кытысь? Толалтэ салазки, нош гужем уробо кутыса нюлэскы улвайлы ветлыны тупаз, со понна но куто вал. Вот тыныд улон!

Гужем нуназезэ сельсовет председатель котькуд коркась пиналъёсты бусые кизем ю вылэ жагтурын урыны улля вал. Со Арча палась лыктэм мурт луиз, кема ӧз улы пегӟиз. Со милемыз жугылӥз но.

Жугиськон потытозь Ципья район кылдэм гинэ вал (1938 ар). Соку ми мар но ӧм адӟе. Быдэс выль лыктэм муртъёс кузё луизы, тужгес но кышнооссы но нылпиоссы. Милемлы магазинысь нянь ӧз йӧты шуид ке но луэ, соослэн нылпиоссы кузё вал, милемыз жуго вал. Магазинысь ческыт сиён басьтыны ӧм быгатэ. Сьӧдчабей кеньырез, макаронэз. Ваньмыз соос понна вал. Клубе мыныны уг луы вал, рогаткаен ыбылӥзы. Вот умой улон.

Мон укмыс арес бере гинэ дышетскыны мынӥ. Книга, тетрадь ӧй вал, вуж книгаосты линовать карыса гинэ гожъяськимы. Милям дышетӥсьмы нырысетӥ классын Анфиса Филипповна Тарасова вал. Ми кык класс, 1-тӥ но 4-тӥ классъёс, огазе дышетскимы. Соку дышетскись пиналъёслэсь, жугиськонын юрттон понна, быдэн одӥг манетэн уксё люказы.

Кыкетӥ классын дышетӥзы Медведева Любовь Ивановна но Барышникова Мария Петровна, 3-тӥ классын — Демеева Анисия Семёновна. 4-тӥ классын Демеева Фёкла Ивановна вал. 10 июне 1943 арын И.В.Сталинлэсь Таукарон телеграмма вуэ: «Благодарность И.В. Сталина. из Москвы 39998, 10 июнь 43 г. Правительственная. Ципья. Тат. АССР. Секретарю Ципьинского райкома ВЛКСМ Волковой. Помощнику начальника полит отдела комсомольской организации Дмитровской МТС тов. Галиевой. Передайте комсомолам и пионерам Ципьинского района, собравшим 100 000 рублей на строительство военных машин для Красной Армии, мой горячий привет и благодарность».

Милемыз гужем каникул дыръя но тэк ӧз возе. Гужембыт колхозын ужамы. Ӵукна 5 часэн кутскыса ӝыт 11 часозь комбайнын. Шеморданэ ю-тысь поттыто вал, амбарын ужамы. Милемыз бушын ужатӥзы. Кӧт сюмаса бӧрдылӥмы. Песяй жаляса вералоз вал: «Нылы, ву ю, ву ю. Ву юид ке, кӧт тыре». Песяй одӥг ведра ву поныса пуртыын шыд пӧзьтоз вал. Марлэсь бен вал со шыд? Одӥг ведра вулы 1 чарка йӧл, 1 чарка пызьлэсь лэсьтэм чумер, кӧмын ик картофка, сылал. Палам картофка кӧм но поноз вал, пушнер куар. Яра Ципья базар вал али соку. 1 чарка сылал 3 манет сылэ вал, 1 йырванка пызь (400 г луэ со) но 3 манет. Чабей кеньыр, йыды кеньыр но со ик дун. Вот та шыдэз лумбыт сииськод ини, мар карод...

Елизавета Абрамова

Ципья черкогурт