Улисьялын куасэн бызьылӥсь спортсменъёс пӧлын ӵошатсконъёс ортчизы

Туэез сыӵе вожвылъяськонъёс ортчизы кылем шутэтскон нуналъёсы, 24 тулыспалэ. Та чебер но калыклы кулэ луись спорт ужрадэз радъязы Балтась ДЮСШ-лэн Ципья ёзэтысьтыз тренер Роман Никитин но Улисьял клублэн кивалтӥсез Виктор Фёдоров. 
— Ӵошатскисьёс вожвылъяськонэ гинэ ӧз пыриське, со сяна соос ческыт шурпа сиыны, табанен чай юыны но быгатӥзы, — шуэ Роман Никитин. 
Та спорт ужрадэ мылпотыса пыриськизы школьникъёс но, студентъёс но, бадӟымъёс но, нылпи садэ ветлӥсьёс но. Асьме гуртъёсысь спортсменъёс сяна (Ципья, Сырья, Сосна но кӧня ке мукет гуртъёс), вуизы кыдёкысь куноос но — Марий Эл республикаысь но Киров улосвылысь. Организаторъёслэн верамзыя, ужрад сыӵе бадӟым масштабен ортчиз социальной вотэсъёс пыр та ӵошатсконъёс сярысь ивор паськыт вӧлмытэмысь. Таӵе вожвылъяськонъёсы пыриськисьёс пӧлын арысь аре пичиослэн лыдзы, бадӟымъёсын ӵошатыса, тросгес луэ. Роман Валентинович тае покчи классъёсын дышетскись нылпиослэн дырзы тросгес луэмен валэктэ. 
Туэ ӵошатсконъёсы ог 50-лы матэ спортэз яратӥсь адямиос люкаськизы. Ваньзы соос грамотаосын пусйиськизы, со сяна, вань номинациосъя вормисьёсты но призёръёсты медален но коньдонкузьымен шумпоттӥзы на. Тае радъяны луиз «Активист» СХПК-лэн кивалтӥсезлэн Р. Н. Закиевлэн но Кугунур гурт поселенилэн юрттэменызы. 
Таӵе шумпоттӥсь фактэз пусйытэк уг луы: Улисьялын туж трос спортэн вырыны яратӥсь адямиос. Ӵапак та ик куасэн ӵошатсконъёсты котькуд аре Улисьялын ортчытэмез но валэктэ. Пичи гурт луэмез шоры учкытэк, калык татын активной улонэн улэ (спорт ласянь гинэ но ӧвӧл). Улисьялъёс тае клубзылэн кивалтӥсьсылэн, Виктор Фёдоровлэн, тыршись луэменыз валэкто. Но татын вань гурт калык ушъямон: ӵошатсконъёс ортчон нуналэ трос адямиос, урамын люкаськыса, лыктэм куноос понна но, асьсэ гуртооссы понна но ческыт сиёнъёс дасязы. Молодцы!