Хезмәт

Улон туж ӝог вамыштэ азьлань

Улон, аслэсьтыз ӧрзэ басьтыса, туж ӝог вамыштэ азьлань. Соин ӵош ик асьме улонын но ваньмыз воштӥське: улон-вылос, юрт котырын, озьы ик дорын ужан тӥрлыкъёс.

Туннэ нуналын асьмеос трос ужъёсты ужаськомы электротокен. Нош асьме пала нырысьсэ электричество вуиз 1963 арын. Соку мон сизьыметӥ классын дышетскисько вал. Котькуд коркан нырысь одӥг точка — лампочка гинэ вал. Ӧжыт дас одӥг часын кысылӥзы, кысэмлэсь азьло куинь пол кысо вал, со дырозь вань ужъёсты тыршылӥзы ужаны. Пиналъёс малпалозы, кызьы бен тылтэк улӥзы? Керосинэн лампа но озьы ик фонарь вал. Утюгез но эгырен ӟырдатыса утюгаськимы. Нош туннэ нуналын магазинын кыӵе гинэ утюг ӧвӧл. Кӧттыр но гурын пӧзьтылӥзы. Мар со ухват асьме улонын вунӥз, луоз, ини. Тросэз шыд, ӝук гур пыдсын чугунын пӧсьтылӥзы. Сое собере ухватэн басьтылӥзы. Коркаос но, шуыны луэ, огкадесь вал кадь, туж ик бадӟым ӧй вал, малы ке шуид гурен гинэ шунтӥзы. Соин ик но, дыр, котькуд коркан сэндра вал. Шуныт вылэ тубе угось, соин ик озьы ужазы, луоз. Ми будыкумы борддорын пичи гинэ радио вал, уйвӧтын но ӧй вал магнитофон, телевизор, планшет, компьютер но мукет сыӵе арбериос. Тодэ лыктэ, укмысэтӥ классын дышетскыку, физика кабинетын нырысьсэ «Снежок» телевизорысен «Кавказский пленник» кино учкимы. Солэн экранэз пичи вал, со цветной ӧй вал, со дыре тӧдь но сьӧд суредэн потылӥз. Соиз сюлэме юн пыӵаса кылиз, туж шыпыт, ӵашетытэк, шумпотыса учкимы. Телефон но туж ӝог вуиз асьме дорамы. Дорын вераськон понна, нырысь ик заказать кариськом вал почтае мыныса, нош туннэ пичиезлэн но бадӟымезлэн кияз телефон, котькуд интыысен луэ вераськыны. Кин умойгес улӥз, гуртамы велосипед но вуиз. Туж ветлэме потэ вал, эшелэн велосипедэныз ветлыны дышетски, кыӵе шумпотыса ветлӥзы эшъёсы. Ӵукна чай юыку тодам лыктэ самоварен чай юэммы, кыӵе ӝӧкез ик чебер каре вал кадь самовар; анае шуоз вал: «Йӧлын чай юыку, нырысь йӧл, собере напсэ пононо, озьы чай эшшо но ческыт луэ». Озьы ик но вань, дыр, со. Малы гожтэмын та кылъёс валамон ини. Асьме улонамы нош ик вылез вуиз — газ, табере газ плита вылын пӧзьтӥськом ваньзэ, соин ик самовар кыл но вуныса мынэ, луоз. Куке но коркаос огкадь пичиесь вал, нош туннэ нуналэ, сюлэм шумпотэ, туж бадӟымесь, кыӵе чебер, синмыд ик мальдоз сыӵе юртъёс ужало: бруслэсь, блоклэсь, кирпичлэсь, корка газэн шунам бере. Огшоры гинэ велосипед сярысь ӧй гожты. Вань вал сыӵе дыръёс, гуртамы велосипед луэмлы но шумпотӥмы. Туннэ котькуд хозяйствоын машина, куд-огезлэн грузовоез, тракторез, яке мотоблокез. Нырысь паймыса учконо вал, нылкышно руль сьӧрын луиз ке. Нош туннэ пиналэсь гинэ нылъёс, озьы ик тросэз нылкышноос, воргоронэн огкадь руль сьӧрын. Гожтӥд ке, лыдъяса быдтонтэм та улонын воштӥськонъёс, нош куд-ог дыръя малпано кадь, шонер-а меда та улонамы куд-ог ужъёсты лэсьтӥськомы? Азьло улонэн туннэзэ ке ӵошатӥсько, калыклэн но улон шоры учкемез туж воштӥськиз. Азьло куанер ке но улӥм, калык котьку но капчи мылкыдын, ымныразы но серекъян ӧз быры, вераськыку но серекъяса вераськизы. Кытчы ке ужаны мыныку но кырӟаса ветлӥмы. Туннэ таӵе умой улэмлы шумпотыса, котькуд вордскем нуналлы куриськыса гинэ улоно кадь. Соку ик малпаса басьтоно, малы таӵе луимы, кытчы меда ышиз ымнырысь серем тус? Гуртын но бускельзэ уг тоды, ог-огзылэсь кышкаса кадь уло? Кыӵе шумпотыса учкиськом, асьме пичиосмы анай кылэз уг ни тодо, ӟучен гинэ верасько. Со дырын ик малпаса басьтоно: уг луы-а меда каллен гинэ аслад кылыдлы но дышетыны? Тазьы ик малпано кадь ас поннад, кӧня ке аръёс ортчыса, асьмелэн удмурт калыкмы тазьы ик кулэсмоз. Татын пичиос чик но янгыш ӧвӧл, бадӟымъёслэсь адӟыса будо кадь соос. Лыдӟись шонер мед валалоз, асьмемыз анай-атай будэтӥз, соин ик асьме кылмес вунэтытэк азьланьтоно: ӟучен ӵош ӧжытак дорын мед пыроз вал асьмелэн яратоно удмурт кылмы. Калыкын верало: «Умой ӧд ке тоды анай кылдэ, калыкез уд вала гажаны». Озьы ик но, дыр, со! Соку оло улон эшшо но капчигес но умойгес луоз, ӵуказе нуналлы юн осконлык кылдоз.

Мария Александрова

Башкортостан

Шудек гурт

Реклама
Нравится
Поделиться:
Реклама
Комментарии (0)
Осталось символов: