Хезмәт

Балтач районы

18+
2024 - Гаилә елы
Азьлане

«Ужаса но вуимы, шулдыръяськыны но дырмы кыле вал»

«Азьлане» газетлэн историез люконтэм герӟаське редакциын но типографиын ужасьёсын. Малы ке шуоно соос газетэз кылдытӥллям, ӝутӥллям, историзэ гожъяллям.

85 ар куспын «Азьланелэн» историяз пырем муртъёс трос ик луиллям — кин ке дасо аръёсын газет поттон бордын тыршем, кин ке — кӧня ке ар гинэ. Улоназы соос асьсэды пӧртэм ӧнеръёсын утиллям.

Таяз учыре сюрес кутӥмы Лельвиже — татын улэ Зинаида Филипповна Фёдорова (Букашева), «Азьлане» газетын наборщица луыса ужам нылкышно.

Пусйыны кулэ, Зинаида Филипповна егит дыръяз гинэ Балтасьысь типографиын ужам, но озьы ке но милемын пумиськыса ужан аръёсыз сярысь вераны шумпотыса соглаш луиз. Нырысь со мадиз аслаз типографие ужаны пыремез сярысь.

— Мынам ӵужапае Ципьяын редакциын ужа вал (Агафья Фёдоровна Самсонова. Редакциын кема аръёс ӵоже редактор должностен ужам — ред.). Аслам вордӥськем гуртам шор классъёсты гинэ дышето вал бере, 8-10-тӥ классъёсты дышетскыны кошки Ципьяе, ӵужапае доры. Со монэ шуныт пумитаз, утиз, юрттӥз. Татын дышетсконме йылпумъяме бере нош ик гуртам, Лельвиже, бертӥ, заочно Можгаысь педучилищеез куинь ар дышетскыса йылпумъяй. Одӥг ар нокытын ӧй ужа, апайлы колхозын юрттыса ветлӥ — уж шедьтыны соку но секыт вал. Собере уж луымтэысь Агафья ӵужапаелэсь юай, мыным но типографиын уж уз шедьы меда шуыса. (Ципья районэз Балтасен огазеямзы бере но «Азьлане» газетлэн редакторез Агафья Самсонова вал. Со газет сьӧры Ципьяысен Балтасе кошке — Н. Ж.), — тодаз вае Зинаида Филипповна.

Озьы, 1959-тӥ арын, сентябрь толэзе, Зинаида ужаны кутске типографиын. Сое киын бичась карыса тодмосто. Татын со юн эшъяське Евгения Плотниковаен, Алима Барышниковаен (берлогес та эшеныз ӵош Арчае ужаны но кошко). Ӵужапаез нош племянницаезлы ужаз но котьма ласянь юрттэм, та понна Зинаида Филипповна али но солы пумтэм тау каре — егит дыръя ужлэсь радзэ валаны юрттӥсьёстэк уг луы шол.

Агафья Фёдоровна, племянницаезлэн верамезъя, туж визьмо но туж зэмлыко нылкышно луэм. Аслэсьтыз ужзэ валаса быдэсъям, котькуд ужасез шоры огкадь учкем. Агафья Самсонова редакциын пенсие потытозяз тыршем, кема аръёс ӵоже, соин келяны но сое бадӟым карыса келяллям. Но ачиз Зинаида типографиын кема ужамтэ.

— 1962-тӥ арозь гинэ ужай мон, — шуэ со. — Тани кызьы вал со. 1962-тӥ арын май толэзе милемыз, ужасьёсты, отпуске шутэтскыны лэзизы. Отпуск йылпумъяськем бере ӧтизы но ваньместы Балтасе люкаса юазы, Арчае газет сьӧры ужаны мынӥськоды-а шуыса. Ми, Алимаен вераськыса, «Мынӥськом, ужаськом» шуимы — ма бен милемлы? Соку кыкнамы ик егит вал, семья кылдытымтэ. Кык толэзь (июль-август) ужай но Арчаын, собере монэ Лельвиже ужаны ӧтизы. Мон соглаш луи, мар шуид ке но, мынам аслам гуртам улэме потӥз, сюлмы котьку отчы кыскиз. Озьы тӥни мон Лельвижын школаын дышетӥсь луыса ужаны кутски.

— Тӥ кема аръёс ӵоже школаын ужаллямды шуыса тодӥсько, нош типографиын ужам аръёсты сярысь кыӵе мылкыдъёсты, малпанъёсты кылизы? — юасько.

— Милям егит дырмы туж шулдыр вал. Типографиын ужам аръёсы ӵапак со дырлы учыразы. Ужмы туж ӝег вал ке но, букваосты одӥген-одӥген бичаса тыроно луиз, яратыса ужамы. Табере со ужез быдэстыны трослы капчигес ни, компьютеръёсын гинэ ужаськоды, — ответ сётэ Зинаида Филипповна. — Котьма ке но, ужаса но вуимы, шулдыръяськыны но дырмы кыле вал. Ми туж яратӥмы туспуктэме усьыны, тани коллективен но ӵем-ӵем туспуктэме усьылӥмы (туспуктэмъёссэ возьматэ — Н. Ж.).

— Лельвижын школаын тӥляд агайды директор луыса ужам, — шуисько, туспуктэмъёсыз пӧлысь Зина апайлэсь агаеныз туспуктэмзэ синйылтыса. — Со ик тӥледыз ужаны дораз ӧтиз-а? Агайды но редакциын «Азьлане» газетын ужам шуыса кылэме вань...

— Агае, Иван Филиппович Букашев, зэмзэ но ужаз типографиын. Валтӥсь редакторлэн воштӥсез вал со. Но кема ӧз ужа — мон кадь ик, кӧня ке ар гинэ. Кыӵе аръёсы ужамзэ тодам но уг вайы ини... Со вордскиз 1924-тӥ арын. Газетын ужаз, куке со Балтасьын интыяськемын вал али. Агае вань улонзэ нылпиослы сӥзиз, школаын ужаз. Со ик монэ гуртэ ужаны но ӧтиз. Кыкнамы ик дышетӥсьёс вал ми. Тани та туспуктэмын но агаеным, — мыче киысьтыз туспуктэмзэ Зинаида Филипповна.

Али кема ми туспуктэмъёсты учкыса пуким, Зинаида Филипповна тодэ ваёнъёссэ вераз. Нош Балтасе вуыкуз одно ик редакцие куное пыро шуыса оскытӥз.

Наталья Жукова

 

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

2

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: 85 аресъем юбилей

2
X