Вакытлэн чуръёсыз

Акылба шуыса нимаське со. Дуртӥз, жильыртыса, Арборка шурлы кужым сётыса ваське пичи Янгурчи шур. Кыдёкын ик ӧвӧл, Арборка шур дурын, интыяськемын вашкала шайзы. Али дыре бырон калэ вуэмын. Гуртын коркаос ӧжыт. Урамазы трос нылпи куара но уг чузъяськы ке но, мӧйы муртъёслэн тодазы вань, дыр, али вашкала улон дыръёссы сярысь. Статьяын кыл мыноз ӵапак Янгурчи гуртлэн вашкала дауръёсыз сярысь. Малы сое шуиллям Янгурчи, но кызьы та гурт герӟаськемын Сурья (Сӧрья, Сэрья, Сырья) выжыысь (воршудысь) удмуртъёсын но кинъёс улӥллям татын ог 300 ар талэсь азьло. Материалын кутэмын Шадрова Антонина Степановналэн (1953 арын вордскемын, али дыре улэ Ӟаны гуртын), Сергеева Ольга Сергеевналэн (1928 арын вордскемын, али дыре улэ Ципья гуртын), Волкова Феодосия Михайловналэн (1937 арын вордскемын, али дыре улэ Ципья гуртын) верамъёссы. Вазиськемезлы но юрттэмезлы одно ик тау верасько. Озьы ик информация басьтэмын Киров архив материалъёсысь, Островскийлэн 1873 арын потэм «Вотяки Казанской губернии» книгаысьтыз но википедия сайтысь.

1601-1603 аръёсы кужмо кезьытъёсын сэрен Россиын ю-нянь уг удалты.  Куанер, сютэм улон аръёс вуо. Со дырысь кивалтэт курон сётэ нырысь лыдъяны но эскерыны кизёно, гыроно но турнано музъемъёсты. Музъем лыдъясьёс асьме пала но вуо. 1599-1619 аръёслэн музъем лыдъян книгаяз гожтэмын: Янгул гуртын улӥсь чувашъёс Байбек Еналеев, Тубулай Шакулов, Бехтемир Колчурин, Уразгильдей Максимов музъем лыдъясьлы верало но пукто ас тамгаоссэс верамзы улын: «Арбар шур дурын вань буш инты, Каринская но Енгурчинская шуръёс вӧзын кизёно бусыос...» Озьыен, асьмелы нырысь тодмо луэ Енгурчи (Янгурчи) шурлэн нимыз. Берло со интыез ӟучъёс Сенные покосы шуыса но гожтозы. 1710 арын, асьме палан адямиосты лыдъян-чотан ортчем бере, пумиськыны кутске удмурт гуртлэн нимыз: «На сенных покосах что вышли из деревни Сырья». 1710 арын ортчем переписья гуртын лыдъяськем 6 корка. 1716 арын ортчем Ландрат переписья, гуртын 5 коркан улэм 20 мурт, соос пушкысь 12-ез пиосмурт, 18-эз нылкышноос. Нырысетӥ коркан улэм 45 аресъем Шайчур Бачурин нылпиосыныз. (Кышноез Кулбейка кулэм 1716 арын). Пиосыз 20 аресъем Тохтагул но 17 аресъём Аднагул. Нылъёсыз Аднаш (10 арес) но Аднасалтан (8 арес). Тохтагуллэн луэм кышноез — Кебенеева Гульняр (18 арес) но 6 толэзьем Токбулат пизы. Шайчурлэн 40 аресъем  выныз Акчюр улэм мукет коркан 45 аресъем Сулзян кышноеныз. Пиоссы Акмур (8 арес) но Бекбулат (6 арес), нылзы Гулзян (6 толэзь). Мукет коркан улэм 35 аресъем Кебеней Юлыш 30 аресъем кышноеныз Иштанбей Ивановаен. Уразай Боскин (35 арес), улэм 65 аресъем анаеныз Бийка Янборисоваен. Выныз Уразмет Боскин (30 арес) улэм 25 аресъем кышноеныз Тойсул Ишкееваен. Соослэн нылпиоссы 8 аресъем Канабей нылзы но Келмяч пизы (3 арес). Тохтамыш, Крымбай, Токбай Тохташ кошкемын кышноосынызы мукет гуртэ. Со кылдэм гуртлэсь нимзэ 1710 арысен 1760 арозь Сенные покосы шуыса гожъяло. 1761-тӥ арысен гожтыны кутско «Янгурчи шур кузя Сенные покосы» шуыса.

1782 арын лыдъяло 6 пиосмурт, нылкышноослэн лыдзы пыремын ӧвӧл. 1795 арын лыдъяське 18 мурт. 1811 арын ортчем переписья, Янгурчи шур кузя уло 13 пиосмурт. 1859-1873-тӥ аръёсы Янгурчи гуртын улэ 88 мурт. 1891 арын — Янгурчи гуртын лыдъяське 166 улӥсь.

Тодосчиос Янгурчи нимез валэкто тюрк калыкъёслэн пиосмурт Ямгырсы нимыныз. Малпаны луэ, та дырозь Казанской ханство дыръя та интыосын булгар я мукет тюрк калыкъёс улэмын шуыса. Башкириын Стерлибашевской районын вань Янгурчи нимын мишаръёслэн гуртсы. Янгурчи гуртысь удмуртъёс луо Сурья (Сӧрья, Сэрья, Сырья) выжыысь (воршудысь) удмуртъёс. Сурья выжылэн пытьыосыз Индиысен кутскыса, Алтай но Урал вамен асьме пала вуо. Шошма удмуртъёслэн ог 4 гуртэз потэмын та выжыысь. Та выжы ним пумиськылэ коми, ханты, манси но мукет финн-угор калыкъёсын. Озьыен, валаны луэ, та выжы ним туж вашкала ни, вуэмын нырысь финн-угор калыкен.

Гуртын вань нош трос тунсыко интынимъёс: Ципьяысь потэм бере Гожон шур, со шур улӥын луэм куркуян (асьме палан «кыркуян» — кулэм муртлы корос лэсьтон понна кутэм беризьлэсь курзэ куян инты), Кӧс нюк, Починка нюк (куспазы Поршай), Бегеш тыло нюк, Така куш нюк, Извесь нюк, Трошка возь нюк, Луд вӧсь, Куяськон инты, Бельгы, Вужшай, Акылба нюлэс, Эшмат дюрт ошмес: Янгурчи гуртысь пересьёслэн верамзыя, отын валлян дыръя коркаос но луиллям. Кин тодэ, оло, со ошмес инты палан ик луэм, дыр, Сенные покосы гурт. Поршай вашкала удмурт шай луыны но быгатэ, археологической ужъёс ортчытэмын ӧвӧл. Тагашур гуртын улӥсь Тукаева Гульбике Эшматовналэн (1925 ар) верамезъя, азьло Сэрья выжыос интыяськиллям Кутёш нюк йылэ. Скалъёссы гольык вордӥськыны кутскемысь, соос кошкиллям мукет интые. Соин ик та верамен но луэ ортчытыны герӟет. Нош ик Ципья музейысь асьмелы вуэ калыкысь легенда Яныш но Каныш сярысь, одно ик сыӵе нимо адямиос вашкала дыръя улӥллям, дыр, гуртазы. Гуртазы луиллям, дыр, Акашка ортчытон интыос, Гершыд ортчытон инты, Луд утисьлэн нимыз одно ик луыны кулэ, коркалы быдэ сылӥллям, дыр, куалаос, йыр-пыд сётон интыос... Та сярысь тодыны ӧй быгаты. Коркалы быдэ пусъёс но луэмын, тодӥсь муртъёс шедизы ке, умой луысал. ВКонтакте вотэсбамын «ВужМем» нимо группаын кельтэмын ссылка удмурт интынимъёслы сӥзем онлайн спутниковой карталы. Со картаез адӟыны быгатэ котькуд мылкыд карись мурт, котькыӵе дыре но вакытэ, со понна уксё тыроно ӧвӧл. Картаез 2017 арысен али дырозь учкемын 25 сюрс пол. Тунсыкъясько историкъёс, этнографъёс но мылкыд карись муртъёс но. Та шошма удмуртъёслэн пичи интернет проектсы. Асьтэос учкыны ӧд быгатэ ке, егитъёсты одно возьматыны быгатозы. Эскерымтэ гуртъёс трос на, соос пӧлын Вуж Кушкет, Ӟаны, Пор-Кутеш, Ушма гуртъёс, Лӧзя гуртъёс, Ярак-Чурма, Гондыргурт, Вукогурт, Кетэк гуртъёс, Порез гурт. Али дыре ог 300 интыослэн нимъёссы тодмо ини, соос пӧлысь ог 50 история ласянь кулэлыксы бадӟым луэм интыос. 30-40 вӧсяськон интыос, ог 5-6 вужшай интыос, ог 20-лы матэ бельгы интыос, 5-6 семык возьёс, 3-5 вужгуртъёслэн интыоссы но мукетъёс. Озьыен, гажано лыдӟисьёс, тунсыко ке лыдӟыны таӵе исторической статьяос, тодэмды потэ ке гуртты сярысь, одно ик кулэ юрттэт, быдэстыны интынимъёслы сӥзем картаез. Ужам уж кулэ луоз будӥсь поколениослы но учёнойёслы мургес валаны асьме калыклэсь улон дауръёссэ.

Сенные покосы гуртлэн нимыз одӥг тунсыко донесениын но шараяськиз. Донесение гожтэмын В.Островскийлэн «Вотяки Казанской губернии» книгаяз, потэмын 1873 арын. Кукмор ёросысь Чура черклэсь документъёссэ эскерыкуз, Островский Казанской духовной консисторие донесение шедьтэ, кудзэ отын ужась священник Ефим Григорьев гожтэ 1768 арын. Тани мар со гожтэ: «1 май 1768 ар, монэ чортӥз ас корказ Выль Чипья гуртысь Максим Иванов, крашине пыртыны али вордӥськем пизэ. Мон диаконэн Памфил Никитинэн мынӥм со гуртэ. Крашине пыртэм бере Максимлэсь пизэ, солэн корказ ик вуиз Сенные покосы гуртысь Матвей Тимофеев. Со курыса лыктэм висись атайзэ исповедовать карон понна. Ми диаконэн кошким со гуртэ, ми сьӧры ик Выль Чипья гуртысь мынӥз выльысь крашине пырем Петрушка. Сенные покосы гуртэ вуон дыръя, бусыын нюлэс дурын адӟи ӵын. Со ӵынэз адӟыса отчы мынӥм. Лыктыса вуон дыръя кӧня ке адямиос нюлэс пушкы бызизы, нош кӧнякеез кылиз. Лыктыса вуэм бере адӟи выльысь крашине пыремъёсыз Василий Яковлев — удмурт сямен Елвей, Матвей Иванов — удмурт нимыз Маматал, Козма Борисов —Демьян, Никита Иванов — Мякта, Андрей Гаврилов — Аису, Трофим Ильин — Инька, Иван Иванов — Камай, Яков Егоров — Байбакта. Вить пуртыын курег пӧзьто вал. Артэ вӧлдэмын тӧдьы басма со вылын сылал, кеньыр, табань понэмын. Тае адӟем бере мон соослэсь юай мар тӥ татын кариськоды шуыса. Андрей Гаврилов (удмурт нимыз Аису) мыным вераз: мукет гуртъёсын скалъёс куло, ми татын вӧсяськиськом асьмен медаз кулы шуыса. Сое кылэм бере мон соослэсь 4 пуртызэ басьтыса сётӥ Петрушкалы. Нош витетӥзэ басьтыса вуттӥз Мякта, солэсь таланы турттыку со монэ шуккыны вырэ вал кортэн. Соин басьтыны ӧй быгаты. 4 пуртыез басьтыса мынӥм Сенные покосы гуртэ но вазиськи старостаезлы Ефим Прокофьевлы но выль крашине пыремлы Давыдов Савелийлы. Соос азьын лыдъяса пӧзьтэм 22 курегез, ас сьӧрам нуон понна, тыри одӥг пуртые. Келяса кельтон понна ас сьӧрам басьтӥ выль крашине пыремез Тимофей Тимофеевез, но солэсь вынзэ Иван Тимофеевез. Яков Тунгузинлэн корка шораз вуэм бере, солэн азбарысьтыз бызьыса потӥзы ог 20 пала мурт. Соос таласа басьтӥзы ас сьӧрам понэм пуртыез но курегъёсыз. А именно таласа басьтӥзы: Алексей Андреев — удмурт сямен Бали, Козма Матвеев — Конайдзе но Трофим Иммудзин».

Духовной консисториен та учыр сярысь следствие ӝутэмын, маин со быремын, тодмо ӧвӧл.

Алексей Шмелёв

P.S. Та статья ватсанъёсты, шонертонъёсты, комментарийёсты вань ке, статьялэн автореныз герӟаськыны яке Вконтакте вотэсбамысь «ВужМем» группае вазиськыны быгатӥськоды.