Вӧй келян шулдыр ортчиз

Вӧй арнялы йылпумъян лэсьтыса, ёросысьтымы тросаз удмурт но ӟуч гуртъёсын Вӧй келян праздникез ортчыто — та ӟеч сямлы пӧрмиз ини. Туэ нырысетӥзэ сыӵе праздникез Ципьяын но ортчытӥзы.
Праздник Ципьяысь Святой Гурийлэн но Пресвятой Троицалэн черкъёсаз настоятель луыса кемалась ӧвӧл ужаны кутскем отец Сергийлэн но гуртысь библиотекаын но клубын ужасьёслэн тыршеменызы туж шулдыр радъяськиз. 26 тулыспалэ, черкын воскресной служба йылпумъяськем бере, Святой Гурийлэн храмезлэн территорияз люкаськизы вань мылкыд карисьёс — нылпиос но бадӟымъёс, черк служба бере кылем прихожанъёс, песянайёс, бигер калыкысь гуртоосмы но, шумпотымон, палэнэ ӧз кыле.
Праздниклэн программаяз вал пӧртэм шудон-шулдыръяськонъёс, палэнын нокин ӧз кыльы. Люкаськем адямиосты пӧсь чаен но ческыт табанен куноязы.
— Кыӵе мыло-кыдо адямиос уло асьмелэн гуртамы! Туж шулдыр Вӧй келян праздникез ортчытӥмы. Сомында калыкъёс уло ке но, куспамы тупаса но эшлыко улыны, праздникъёсты но валче пусйыны быгатӥськомы. Ваньмы одӥг бадӟым семья кадь, туж шумпотымон. Та выллем праздникъёсты, кудъёсыз калыкъёсты, нылпиосты но бадӟымъёсты, огазеяны быгато, ӵемгес но тросгес ортчытъяны кулэ, — праздник сярысь мылкыдъёссэс вуттӥзы Вӧй келянэ пыриськемъёс.
Пусйыны кулэ, праздникысь буш киын бертӥсьёс ӧз луэ — конкурсъёсы но шудонъёсы пыриськемъёсты умой кузьымъёс витизы (та понна гуртысь спонсоръёслы тау шуыны кулэ).