Хезмәт

Балтач районы

18+
2024 - Гаилә елы
Азьлане

Визьмоесь но, чебересь но, вылаз ик мызганчиос но!

25-тӥ толшоре Россиын Студентъёслэн нуналзы пусйиське. Та нуналэз Вылӥ тодон-валан сётӥсь юртъёсын дышетскись студентъёс гинэ ӧвӧл, колледжъёсын, техникумъёсын дышетскись нылъёс-пиос но пусъё.

Студентъёслэн сессизэс йылпумъямзы но та праздниклэн тодметэз луэ кадь — табере соос сюлмаськытэк ӧжыт шутэтскыны но быгато. Ӵапак сыӵе дышетсконлэсь «шокчон» вакытазы, студентъёслэн нуналзылы сӥзьыса, асьме районысь кык студентъёсын, кык Алёшаосын вераськи. Одӥгез Алёша Карек-Сермаысь, кыкетӥез — Ципьяысь.

— Пиос, нырысь лыдӟисьёсты асэныды тодматэ вал. Кытын тӥ вордскиды, кыӵе тӥ семьяысь, школа дыръёсты кызьы ортчизы?
А. З.: Мон Алексей Зубарев, Ципья гуртын вордски, Ципья школаын тодон-валан басьтӥ. Атае, Сергей, «Труд» колхозын тырше, Елена анае «Наз» санаторийын ужа. Али дыре Казаньысь ветеринарной академиын ветеринария ӧнеръя 1-тӥ курсын дышетскисько. Дышетсконме йылпумъяме бере ветеринарной врач луо. Школаын ударник луыса дышетски. Котькуд предметэз ас сяменым яратӥсько вал.
А. И.: Мынам нимы Алексей Иванов. Вордӥськи Карек-Серма гуртын. Анае, Людмила, «Бурнак» обществоын валтӥсь экономист луыса ужа, Валерий атае — Шор Кушкет школаын география но технология урокъёсты нуэ. Школаын мон но умой дышетски, нырысь «5»-лы гинэ, нош бадӟым классъёсын ударник луи. Ӟуч кылъя, математикая но физикая экзаменъёсты сётыса, КГАУ-э дышетскыны пыри. Ӧнеръя мон технической сервисысь инженер луо.

— Школаын кыкнады ик умой дышетскиллямды вылэм. Секыт вал-а нош студент улонлы дышыны? Кызьы тӥ вутскиськоды огдыре дышетскыны но, ас улондэс радъяны но?
А. И.: Секыт вал шуыса ӧй верасал. Мон Казаньын одноклассникъёсыным ӵош дышетскисько но, улыны но валче улӥськомы. Соиз ласянь шуг-секытъёс ӧвӧл. Котькытчы вутсконо ни со. Школаысен спортэн вырыны яратӥ, волейбол, баскетбол шудӥськомы вал. Районын ӝӧквыл теннисъя соревнованиосы пыриськи ас дыраз. Бадӟым классъёсын дышетскыку хоккеен вырыны кутски. Азьло Починкаын быдэс команда люкаськиськом вал, нош али егитъёс кин кытын, соин но бурнакъёслэн командаязы шудӥсько. Та нуналъёсы гинэ но Гилазутдиновлэн призэзлы хоккеен турнирын 1-тӥ инты басьтӥмы. Со сяна, Казаньын ми, удмурт пиос, люкаськиськом волейбол шудыны, та кылем арысен традицилы пӧрмиз. Асьме районысь удмурт пиос гинэ ӧвӧл, Кукморысь, Ижевскысь пиос но лыктыло.
А. З.: Дышетскыны кошкыку котькинлы нырысь секыт луэ, дыр. Но ваньмызлы собере дышиськод. Студентъёс тросэз сыӵе активной улонэн уло ук — дышетско но, ужало но, спортэн но выро, эшъёссылы но дыр шедьто. Сотэк кызьы бен? Мон, кылсярысь, трос дырме дышетсконын ортчытӥсько, юлтошъёсын нош буш вакытам пумиськыны луэ. Шутэтскон нуналъёсы яке ӝытпал. Кулэ карид ке, ваньмызлы дыр шедьтыны луэ шуыса малпасько мон.

— Дышетскон но юлтошъёсыныды пумиськылон сяна, тӥ али кыкнады но общественной ужъёсын но выриськоды ук... Казаньысь Калыкъёслэн Эшъяськон юртазы но ветлӥськоды шуыса тодӥсько. Отчы кызьы вуиды?
А. З.: Кылем гужеме егитъёслэн «БиГерд» форумазы пыриськем бере, мон Казаньысь Калыкъёслэн Эшъяськон юртысьтызы егит нылъёсын но пиосын тодматски. Собере, Казане дышетскыны пырем бере, ик ачим но ветлыны кутски со юртэ.
А. И.: Калыкъёслэн Эшъяськон юртсы сярысь азьло ик кылэме вань вал ни мынам. Алёша ик мыным со сярысь вераз, со монэ кылем арын, октябрь толэзе, егитъёслэн пумиськоназы мыныны ӧтиз. Мон соглаш луи, та пумиськонэ вуон понна берпуметӥ параысь куриськыса но кошки. Но нырысь пумиськонын кык Маринаосын гинэ тодматски — Марина Иванова но Марина Матвеева.

— Мар тӥ отын кариськоды?
А. З.: Лыктэмен валче ик монэ конкурсэ пыриськыны ӧтизы — ми ведь отын ог-огенымы пӧртэм малпанъёсынымы вошъяськиськомы, олокыӵе но мероприятиослы дасяськиськомы, пӧртэм праздникъёсын выступать кариськомы. Тани, кылсярысь, Выль ар азьын «Толэзьлэн тусыз» удмурт мюзикл пуктӥмы. Егитъёсын гужемысен тодмо ке но, ачим отчы али октябрь толэзе гинэ ветлыны кутски, соин но туж ик трос ужрадъёсы пыриськыны ӧй вуы на.
А. И.: Нырысетӥ пумиськонын ик кык Маринаос мынэсьтым мылкыдъёсме, малпанъёсме юалляськизы но удмурт мюзикл пуктыны малпаськом шуыса веразы. Мон но отчы пыриськыны мылкыд кари. Озьы кутскиз мынам Калыкъёслэн Эшъяськон юртэнызы эшъяськонэ. Татын туж умой коллектив, соос пӧртэм конкурсъёсы, фестивальёсы ӵем пыриськыло. Ваньзэсын но вакчи дыр куспын огъя кыл шедьтӥмы. Но, Алёша кадь ик, трос ужрадъёсы ӧй пыриськы али. Самой кельшымонэз но тодэ кыльымонэз — со удмурт мюзикл, дыр.

— Молодцы! Та мюзиклэз адӟемъёс туж синмаськиллям вал тӥляд быгатэмдылы. Андрей Сергеевич Герасимов но, Татарстанысь удмуртъёслэн НКА-зылэн кивалтӥсез, «ВКонтакте» вотэсбамын тазьы гожтэм: «Калыклэн шумпотэмезлы пумыз ӧй вал, сокем умой мюзикл пуктӥзы егитъёс. Данъяськиськом!». Нош Казаньысь сценаын сяна, асьме районысь ужрадъёсы но пыриськиськоды-а? Гуртын ортчись праздникъёсы, кылсярысь?
А. З.: Мон туж ик ӵем сцена вылэ уг потӥськы, толэзьлы кӧня ке пол, яке огпол. Но сыӵе учыръёс луизы ке, сценаын ӵемысь мызганэн шудӥсько, Выль арын эктонъёсы пыриськисько.
А. И.: Котьку тыршисько гуртын ортчись ужрадъёсы пыриськыны, куддыръя район ужрадъёсы но. Ӵемысь кырӟаськомы, эктӥськомы. Кылем арын тани спектакль но пуктӥмы. Выль ар кадь праздникъёсы гурт калык люкаськыку, соосты мызганэн шудыса юмшатӥсько. 2017-тӥ арын Гуртлэсь нуналзэ ортчытыку но мызганэн шудӥ.

— Пиос, кыкнады но вераськоды, мызганэн юмшаськоды шуыса. Малы бен одно ик мызганэн шудоно кариды? Туала дыре, мон тодэмъя, егитъёс пӧлын гитара популярнойгес лыдъяське, лэся, ук? Яке, тӥляд семьяяды кин ке крезьгур инструментъёсын шудэ-а?
А. И.: Семьяямы нокин но крезьгур инструментъёсын уг шуды ни, мон сяна. Мынам, зэмзэ ке верано, малпанъёсы но ӧй вал, мызганэн шудыны кутско шуыса. Кык ар талэсь азьло атай мызган басьтыса вайиз но, мыным амалтэм шудыны дышетсконо луиз (серекъя). Мон «кызьы меда дышетском ни шудыны» шуыса сюлмаськи, огшоры кыллёз шат ваем мызган? Озьы, интернетысь учкыса, ачим ӟуч кырӟанъёсты шудыны ӧдъяй. Собере ини, крезьгурезъя подбирать карыса, удмуртъёссэ но каллен дышетӥ. Гитараен нош мон мызганэз кие кутытозь ик шудыны быгатӥсько вал ини — 7-тӥ классын ик дышетскыны кутски. Милям гуртысь пиос гитараен шудыло вал. Соослэсь адӟыса мынам но дышетскеме потӥз.
А. З.: Мынам туж мызганэн шудыны дышетскеме потӥз, куке мон двоюродной вынылэсь (Артём Антонов — Сизнер гуртысь егит мызганчи — Н. Ж.) шудэмзэ адӟи. Али ке но малызэ уг тодӥськы — сокем мыным солэн шудэмез кельшем, дыр. Соку мон 8-тӥ классын дышетскисько вал. Артёмен ӵош ик дышетски собере мызганэн шудыны, ӵужанаен ӵужатайёс дорын, Сизнер гуртын. Али ке но куддыръя песянаен ӵош пуксьыса пӧртэм кырӟанъёсты кырӟаськом. Али дыре гитараен но шудыны дышетскыны малпасько. Мыным туж кельше удмурт но ӟуч калык кырӟанъёсты шудыны, но со дыре ик туала кырӟанъёслэсь но бере кылеме уг поты.

— Паймоно кадь: кыкнады ик музыкальной, творческой адямиос. Но со дыре ик воксё мукет ӧръёсын дышетскиськоды — ветеринар но инженер. Музыкальной тодон-валан басьтэмды ӧз поты шат?
А. З.: Мызганэн музыкальной тодон-валан басьтытэк но шудыны быгато шуыса малпай, соин мукет ӧръя дышетскыны пыри. Дышетскон юртам тодо, мон мызганэн шудӥсько шуыса, академилэн вокально-инструментальной ансамбляз но ветлӥсько.
А. И.: Нош мынам дышетскон юртам уг тодо, мон мызганэн шудӥсько шуыса. Мон ведь ачим гинэ дышетски шудыны, нотаосты но уг тодӥськы. Тодысал ке, оло, музыкальное дышетскыны но пырысал... Но кызьы луиз — озьы луиз. Мон уг жаляськы, инженерлы дышетскыны пыри шуыса.
 

P.S. 2017-тӥ арын Алёшаос кыкназы ик школьникъёс вал али. Мызганчиос сярысь статья гожтыку, соос сярысь но кӧня ке кыл вераськем вал. Соку ик пиос школа улонэ но, гурт улонэ но активно пыриськизы ини, кырӟазы-эктӥзы, мызганэн юмшазы. Табере соос — Казаньын дышетскись студентъёс. Пиос, сюлмысь ӟечкыласько тӥледыз бадӟым улонэ вамыштэменыды. Студент улон — со улонлэн одӥгез тужгес яркыт вакытэз шуо. Та дырдэс юнме эн ортчытэ. Туннэ нуналэ кадь ик котькытчы вутскыны тырше, шулдыръяське, юмшалэ, тыр улонэн улэ!

Фото: автор

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

2

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: Татьянин день

2
X