Визьнодась — ӧнер ӧвӧл, визьнодась — Инмарен сётэм устолык

Тросэз визьнодасьёс но дышетӥсьёс али дыре, тодмо мугъёсъя, доразы пуко. Соослэн берло дыре яратоно яке дорысь ужъёсынызы вырыны  тросгес дырзы луиз. Но астэ ачид нимаз висъян (самоизоляция) — дышетон программалэсь палэнтӥськоно шуэм кыл ӧвӧл. Дышетскон ар йылпумъяськытозь трос дыр ӧз кыльы ук!

Выль форматэн нылпиосты дышетонлэн но визьноданлэн аслаз плюсъёсыз но минусъёсыз, азьбуръёсыз (преимущества) но тырмымтэосыз вань. Тужгес но секыт, дыр, школаез но садикез йылпумъясь нылпиосын — выпускникъёсын ужасьёслы, соослэн анай-атайёссылы но визьнодасьёслы (дышетӥсьёслы). Малы ке шуоно выпускной экзаменъёсты нокин но отменить ӧз кары.

Покчи Лӧзя садикын ужась визьнодась, Наталья Вячеславовна Никитина, самоизоляция вакытэ нылпиосын интернет пыр ужамез сярысь, нылпиосын кусып воземез сярысь вераз. 

Наталья Вячеславовналэн нылпиосын ужам опытэз бадӟым ини — 13 ар. Казаньысь педколледжын визьнодасьлы дышетскыса потэмез бере, 2005-тӥ арын со Покчи Лӧзяысь садике визьнодась луыса ужаны интыяське. Со арын ик заочно Казаньысь вылӥ тодон-валан юртэ логопедлы дышетскыны пыре. Озьыен, кызьы Покчи Лӧзя гуртысь садикын нылпиосын ужаны кутскиз, али но отын ик тырше. Соин паймонэз но ӧвӧл, таӵе кылдэм ситуациын (кыдёкысен кусып возьыса визьнодан сярысь вераськон мынэ) аслэсьтыз быдэстоно ужъёссэ туж умой но дыраз быдэсъя шуыса. 

— Аслэсьтым ужме туж яратӥсько, озьы ӧй ке луысал, сомында ар нылпиосын ужаны ӧй быгатысал, дыр. Гуртын, мар шуид ке но, городэн ӵошатыса, ужаны каньылгес. Татын анай-атайёс но валасесь, нылпиос но кылзӥськисьгес. Нырысь ужаны кутскыку гинэ секытгес потэ вал, нош собере дыши. Зэм, кагаз ужъёсмы трос, но та ужлэсь куштӥськон понна муг ӧвӧл. Уждэ яратӥд ке, номыр секытэз но ӧвӧл, — шуэ Наталья Вячеславовна.

Туннэ нуналэ опытэн визьнодась подготовительной группаен ужа. Та нылпиосын (нош соос солэн 26 кузя, группаяз вань Покчи Лӧзяысь, Ушмаысь, Бадӟым Лӧзяысь, Балтасьысь нылпиос) Наталья Вячеславовна ясли группаысен кутскыса ужа ини. Соин али но, самоизоляция вакытэ, нылпиос азьын кылкутонэз бадӟым шуыса умой вала. Вылаз ик нылпиосыз туэ школае мынозы — кызьы соосты асьсэ понна кельтод? Соин та учыре юрттэ дистанционной дышетскон.

Но зэмзэ ке верано, дистанционной амалэн школае ветлӥсь нылпиос дышетско шуыны шонергес луоз. Нош садике ветлӥсь нылпиос сярысь верано ке, соослэн со дышетскон ик ӧвӧл — визьнодасьёслы нимысьтыз кыӵе ке чурыт  куронъёс ӧвӧл. Но визьнодасьёс асьсэ нылпиоссы сярысь уг вунэто, соослы пӧртэм ужъёс сётъяло. Тани Наталья Вячеславовна но шуэ:

— Котькуд визьнодась, быгатэмезъя, тырше аслаз группаысьтыз нылпиосыныз маин ке но вырыны, соосты кызьы ке но дышетскон яке творческой уже кыскыны. Кылсярысь, мон подготовительной группаен ужасько бере, нылпиосы школае умой тодон-валанъёсын мед мынозы кадь потэ. Соин пӧртэм источникъёсын пайдаяськыса тыршисько нылпиосын кусып возьыса улыны. Анай-атайёсын кылдытэм ватсапын группамы вань, отчы нылпиослы тунсыко луись пӧртэм ужъёсты лэзисько. Ютубысен шедьтыса пӧртэм видеоосты но отчы ик лэзисько. Суреданы пӧртэм суредъёс но сётӥсько. Нылпиослэн вордскем нуналзы ке луиз, соку но та группаын ик ӟечкыласа гожтӥсько. Туж шумпотӥсько, куке нылпиос но, анай-атайёссы вамен, монэным кусып возё.

Огъя вераса, котькуд нуналзы нылпиослэн тунсыко но пайдаё мед ортчоз шуыса тыршо визьнодасьёс. Котькуд визьнодась умой вала: самоизоляция вакытэ но нылпиослы визьнодасьёслэн сюлмаськемез но юрттэтэз кулэ. Но анай-атайёслэсь висъям саклыксэс но палэнэ кельтыны уг луы. Наталья Вячеславовналэн верамезъя, котькуд анай-атай  кылдэм ситуациез валаны, визьнодасьлы юрттыны тыршиз. Сётэм ужъёсты нылпиосынызы дыраз быдэстыса, дорысь ужъёссэс фото но видео форматэн уськытыса, визьнодасьсылы келяло вылэм. Яра али интернет вань. Туала дыре котькуд книгалэсь, дышетскон пособиослэсь — ваньмызлэсь но электронной ӵектоссэ шедьтыны луэ. Таин ик пайдаясько дышетӥсьёс но визьнодасьёс. Туала дыре мукет сямен ужаны уг луы. Улон тае куре. Нылпиосты яратӥсь визьнодась, Наталья Вячеславовна, аслэсьтыз нылпиоссэ дышетон понна но интернет источникъёсын пайдаяське. Кузпалэныз Анатолиен соос Евгениез (6-тӥ классын дышетске) но Романэз (1-тӥ классын дышетске) будэто.

— Секыт-а, ӧвӧл-а, ваньмызлы дышиськод. Улонлэн куронэз бере, нокытчы уд пыры, — шуэ Наталья Вячеславовна. — Самой валтӥсез — анай-атайёс валась, нош нылпиос кылзӥськись мед луозы. Соку котькинлы — дышетӥсьёслы, визьнодасьёслы, анай-атайёслы, нылпиослы но — ваньзылы умой луоз но нокыӵе дистанционной дышетскон, визьнодан секытэн уз сётскы.