Возьмаськом трос буёло «Азьланез»

Шуг-секыт аръёсы куспетӥ но луылӥз (Балтась ёросэз Арча районэ пыртэм бере удмурт редакциез быдтӥллям вал – ред.), собере нош ик вордӥськиз. Котькыӵе аръёсы но чидатэк возьмазы, луоз, лыдӟисьёс газетлэсь котькуд номерзэ. Туэ аръёсы но лыдӟисьёслэн «Азьлане» газеттэк кылемзы уг поты.

Тодам лыктэ кызьы вожмаськыса почта ящикысь пыртылӥзы «Азьлане» газетмес но озьы ик вожмаськыса лыдӟылӥзы мынам анае но атае. Атае шуылоз вал анаелы: «Вай, сёт мыным газетэз, тон каллен лыдӟиськод, нырысь мон лыдӟо, собере тон» (анае 4 классэз гинэ йылпумъямын, зэм но каллен лыдӟылӥз). Анае: «Дугды ай, мон заголовокъёссэ гинэ ке но лыдӟо ай, собере тыныд сёто». Атае: «Тазьы вожмаськытозь, «Азьланез» кык экземпляр басьтоно-а мар-а». «Ӟечбур!» газетын ужаны кутскеме бере сое но яратыса лыдӟылӥзы, вожмаськонзы но быриз.

Гуртам бертэме бере ик киям сёто люкам газетъёссэс, тодо угось, газетэз лыдӟисько кутсконысеныз пумозяз. Ёрос газетмес туж тунсыкъяськыса киям кутӥсько, нырысь ик учкисько оформлениез, вёрсткаез шоры, собере авторъёссэ синйылтӥсько, йыръянъёссэ. Огдыре туж йыры кур луылӥз, ӝоже усьылӥ ризограф амалэн печатлакузы ӟечлыкез туж урод луиз шуыса. Удмуртъёсты кур каро, газетмы уз улӟы-а, мар-а ни малпалляй. Но, ӟеч адямиослэн тыршеменызы, дыр, ваньмыз интыяз берытскиз, газет нош ик кие кутымон пӧрмылэ. Табере возьмаськом ини трос буёло «Азьланьмес», со понна трос гожтӥськисьёс луыны кулэ. Одно ик гожтӥське, эн ыштэ таӵе сӥё-дано аресъем газетэн кусыптэс.

Озьы ик мылысь-кыдысь лыдӟо газетэз палэнын улӥсьёс но. Ӵем дыръя со но та гожтэмъёсты, гожъясьёсты но ог-огенымы эскериськом, мылкыдмес вераськом.

Та йӧно арлыдо газетмес мед лыдӟозы пиналэз но, мӧйыез но, гуртын но, городын но, тиражез бадӟым мед луоз. Редакциын ужасьёслэн задор мылкыдзы ноку но медаз сӥя.

Вера Лобанова

Ижкар