Вукогуртын улӥсь ветеранлы 90 арес тырмиз

Район советлэн председателезлэн воштӥсез Наиль Сабирзянов, социальной дурбасьтонъя отделлэн кивалтӥсез Алсу Гатиятуллина, Ципья гурт поселенилэн главаез Азат Нотфуллин, «Труд» обществолэн кивалтӥсез Рашид Хадиев юбилярез ӟечкыланы лыктӥзы. РФ-лэн Президентэзлэсь ӟечкылан открытказэ, район главалэсь Таукарон гожтэтсэ но трос кузьымъёс сётэм сяна, юбилярлы «Быдӟым Отечественной ожын вормонлы — 75 ар» юбилейной медаль кузьмазы.   

Елизавета Ивановна 1930-тӥ арын Вукогуртын трос нылпиё крестьян семьяын вордске. Атаез гынсапег лэсьтӥсь луэм, ужам агротехник луыса, анаез гумырыз ӵоже Вукогуртын колхоз бакчаын тыршем. Ларионовъёслэн куать нылпиоссы вордско (вить ныл но одӥг пи), но, жаляса верано, соос пӧлысь ньылез пичиысен висьыса кулэ. Елизаветаез Инмар улонлэсь уг люкы ке но, солы та улонын трос эскеронъёс пыр ортчоно луэ. Жугиськон аръёсы бусыын валэн, ошен ужамез сярысь ӵем тодаз вайылэм Елизавета Ивановна. Тэльмырыса, сиёнлы ёрмыса улэм аръёсыз сярысь кин бен вунэтыны быгатоз... Мискинь Елизаветалы, синмыз пичи дырысеныз висемысь, школаын дышетскыны но йӧтымтэ. Адӟем ке но со, синъёсыз котьку синвуаськиллям но гордэктӥллям. Озьы ке но, аръёс ортчыса Елизавета Ивановналэн ӧнер басьтэм — ас дыраз со вуриськисьлы дышетскыны быгатэм.

1949-тӥ арын Ларионовъёс семьяенызы Малмыж ёросысь Каксинвай черкогуртэ улыны кошко. (Отын соку леспромхоз усьтӥське, нош татын соос пулы, ужлы ёрмыса улӥллям. Елизавета Ивановна нылызлы вераллям, азьло Вукогуртын трос семья ёрмыса улэм но мукет интые улыны кошкем шуыса — Н. Ж.). Татын Елизавета Ивановна вуриськись луыса ужа. Дэремъёс, костюмъёс — ваньзэ вурыны усто луэм Лиза апай. Таӵе устолыксэ тодыса, трос адями со доры дӥськут вурыны ветлыны кутскем. Нокинлы отказ сётымтэ вуриськись. Картлы кошкымтэ Елизавета Ивановна, адӟонэз сыӵе луэм, дыр. 1957-тӥ арын Раиса нылыз вордскем. 1983-тӥ арозь Каксинвайын улыса, Лиза апай нылэныз ӵош Свердловск улосвылэ улыны кошке. Татын со машина лэсьтонъя заводын подсобной ужась луыса тырше. Татысен ик дано шутэтсконэ потэ. 1989-тӥ арын Раиса нылыз Вукогуртысь пиосмуртлы картлы бызе но отчы улыны кошке. Куать арскын, 1995-тӥ арын, Елизавета Ивановна но вордскем гуртаз бертыны малпа. Нырысь 10 ар огназ нимаз коркан улэ, нош берпуметӥ 15 арзэ — нылызлэн семьяеныз ӵош.

— Анайлэн котьку вордскем гуртаз берытскемез потэ вал. Котьку Вукогурт сярысь вераз. Шумпотымон, со ини кема аръёс татын милемын ӵош улэ. Висёнлы гинэ сётскиз ни... 90 аресозь улэмезлы но туж шумпотӥсько, — шуэ Елизавета Ивановналэн нылыз Раиса Семёновна, анаез шоры учкыса.

Туннэ нуналэ Елизавета Ивановна Раиса нылыныз, Пётр эмеспиеныз но Валерий внукеныз улэ. Валерий сяна, вань Елизавета Ивановналэн нош одӥг внучкаез — Светлана. Солэн нылыз но вань ини.

— Бадӟым таукарон кылъёсме вуттэме потэ Ципья участковой больницаысь врачьёслы Татьяна Филипповалы, Нурия Фазлыевалы, участковой медсестраослы Маргарита Васильевалы но Тагзима Саляхиевалы. Соос ӧй ке юрттысалзы, ӧй ке утьысалзы анайме, 90 аресозь улыны, оло, ӧй но быгатысал, — шуэ Раиса Семёновна. — Анайлы нош сӥземе потэ тазалык, тыныч но шудо-буро улон.

Раиса Семёновналэн ӟечкылан кылъёсызлы итӥськиськом но оскыса кылиськом, Елизавета Ивановналэн 95 аресъем юбилеяз но вуомы шуыса.