Вуж Кушкетысь Пётр Карабаевлы — 95

95 арес — кузь гумыр. Таӵе бадӟым юбилейзэ пусйыны, одӥг даурлы матэ улон сюресэз ортчем Пётр Ивановичез районлэн кивалтӥсез Рамиль Нутфуллин, районысь социальной дурбасьтонъя отделлэн кивалтӥсез Алсу Гатиятуллина, «Яна тормыш» обществолэн кивалтӥсез Магсумзян Сайфутдинов, Янгул гурт поселенилэн главаез Раниль Габдрахманов ӟечкыланы вуизы. Соос юбилярлы Россилэн Президентэзлэсь ӟечкылан открытказэ но район администрацилэсь Таукарон гожтэтсэ кузьмазы. Самой матысь адямиосыз, ӵыжы-выжыосыз но со доры люкаськизы.

Карабаев Пётр Иванович вордске 19 толшоре 1925 арын Вуж Кушкет гуртын. 1932 арын нырысетӥ классэ дышетскыны пыре. Со аръёсы гуртын школа луымтэысь Карабаевъёслэн юртазы дышетско (Пётр Ивановичлэн ӵыжы-выжыосыз дорын). Пётр та юртын 7 классозь дышетске но собере колхозэ ужаны интыяське.

1941 арын Быдӟым Отечественной ож кутске. Гуртысь егит пиосты ожмаськыны басьто, нош Пётр Иванович соослэн радазы уг шедьы: военной билетэз луымтэысь сое оже уг келяло. Но тылын улӥсьёслы капчигес луымтэ шол, оло, секытгес но, дыр... Гуртысь фронтэ басьтымтэ пиосты келяло Свердловск улосвылэ окопъёсты гудӟыны. Отын егитъёс сиён понна ужало, нош сиён нуналаз кык пол гинэ йӧтэ. Озьы ортче Пётр Ивановичлэн куинь улон арез. 1944 арын, гуртаз берытскемез бере, егит воргорон колхозэ ужаны пыре, валъёсты сюдэ. 1946 арын фермаын кочегар луыса ужаны кутске. Та ужын со пенсие потытозяз тырше ини.

1949 арын Пётр Иванович Сизнер гуртысь нылэн, Бидаева Матрёна Николаевнаен кузпалъяське. Валче соос кык нылъёсты — Зинаидаез но Алевтинаез будэто. Али дыре нылъёссы асьсэ семьяосынызы уло. Зинаида Петровна — Ципьяын, Алевтина Петровна — Казаньын. Туннэ нуналэ 95 аресъем юбилярлэн 8 внукез но 11 правнукез вань. Аресэз шоры учкытэк, Пётр Иванович али, син медаз усьы, ассэ ачиз утьыны но быгатэ, газет но лыдӟе, лыдӟе Евангелиез но. Пельыз гинэ начар кылэ ини. Но Пётр Иванович, огназ улэмез шоры учкытэк, шудо адями. Нылъёсыз ӵем-ӵем со доры куное вуыло, со сяна, лыктылэ социальной ужась Римма Павлова но. Со Пётр Ивановичез уте, солы сиён пӧзьтэ.

— Анаймы кулэм дырысен, дас ар ӵоже, атаймы огназ улэ ини. Улонэзлы уг ‡ожтӥськы, котькуд нуналзэ вӧсяськонысен кутске но вӧсяськонэн йылпумъя. Атаймы туж йӧно адями вал азьло дырысен. Пичи дыръямы тросэзлэн нылпиослэн, огъёзоосмылэн атайёссы юылӥзы, нош милям атаймы ӧз. Кыӵе шуг-секытъёсты ӧз адӟы ке но, ӧз сётскы, улонзэ азьланьтӥз. Осконэз солы юрттӥз, дыр. Анаенымы но 61 ар ӵоже куспазы туж умой улӥзы, милемыз будэтӥзы. Внукъёссэс но соос будэтӥзы, шуыны кулэ. Соин атаймы азьын музъемозь йыбырттӥськомы. Район кивалтэтысь вуэм куноослы но пумтэм тау кариськом, пересьёсты сыӵе дано каремзы понна, — шуизы юбилярлэн нылъёсыз.