Хезмәт

Яратоно дышетӥсьлы

Милемлы сыӵе шуд усиз — Ольга Михайловна Перфилова нылмылэн нырысетӥ дышетӥсез луиз. Ольга Михайловнаез чик тодытэк мынӥмы ми со доры нырысетӥ классэ.

Нырысетӥ люкаськонын ик со милемыз синмаськытӥз: каньыл, лачмыт, туж огшоры но матын, визьмо вераськись, ас ужзэ умой тодӥсь. Нылмылы но Ольга Михайловна нырысь дышетскон нуналъёсысен ик туж кельшиз. Со понна со пырак дырлы нырысетӥ яратоно дышетӥсез луыса кылёз.

Нырысетӥ дышетӥсь — али воксё покчи нылпидэ школаын анай луыса пумитась адями. Со котырысь дунне сярысь нырысь валатонъёсты сётэ, лыдӟиськыны но лыдъяськыны сяна, дышетэ котырысь чеберез адӟыны, умойзэ но уродзэ валаны. Та тодон-валанъёс нылпилэн вань улонэз ӵоже бордаз кылё. Ольга Михайловна милемлы улонлы но, дышетсконлы но юн инъет сётӥз. Со валэктӥз, кызьы ми дышетсконмес радъяны кулэ. Визьноданъёссэ али но тодамы возиськом, вуоноын но улонамы кутомы...

Ноку ассэ вылӥ ӧз пукты, ноку ӧз ушъяськы. Но ас учкемъёссэ сокем зэмлыко вералляз, соку ик солы оскылӥд, адями ма сярысь верамзэ тодэ шуыса валалляд. Ужзэ со котьку пыр-поч быдэсъяны дышемын вал, мукет муртъёслэсь но, дышетскисьёслэсь но сое ик витьылӥз. Котьку вералоз вал: ужано, тыршоно, астэ ӧвӧл жаляно — соку азинскон одно шӧдӥськоз. Тыршись нылпиосты котьку ушъялляз, пичи ке но азьпал вамыш лэсьтӥсьлэсь — со витьлы дышетскись луиз-а, яке «кыкысь» «куине» выжись-а — котьку азинскемзэ пусйылӥз.

Ваньзэ тае ми дунъямы, шӧдӥм солэсь кужмо дышетӥсь луэмзэ, тыршыса дышетскимы, солэн тыршеменыз вормонъёсы но вутскылӥмы, валамы, нылмы зэмзэ туж шудо вылэм сыӵе дышетӥсь дорын дышетскеменыз.

Шумпотӥсько, милемыз дышетыкуз юбилеез тупамен валче, со сярысь газетэ гожтӥмы вал (2017 ар, 17 номер). Соку но бен Ольга Михайловна туж возьдаськыса но курыса-курыса гинэ соглаш луиз — ӧз яраты со ачиз сярысь вераськыны. Статья потэм бере но «мултэссэ ушъяды» шуыса вераз вал. Соку аслыз но валэктӥ, али но озьы ик верасько: со ушъян ӧвӧл, со — мур гажанэз возьматон мылкыд.

Ольга Михайловнаен матысь дыре одно ик пумиськомы шуыса ялан малпай. Одно ик вань ӟеч кылъёсме аслыз верало шуыса, жингыртытэк но улӥ. Но ӧз кылды ини адӟиськыны... Ольга Михайловна Перфилова кошкиз та дуннеысь, дано шутэтсконэ потэмез бере улыса но вуытэк... Асме буйгатӥсько, берло, телефон пыр ке но, тау каронъёсме вераны вуи шуыса... Яратоно, гажано, дуно адямилы ӟеч кылъёсты вераны муг но инты утчано ӧвӧл вылэм. Котырысь адямиосмылы ӟеч кылъёсмес, таукаронъёсмес соос вӧзамы дыръя ик вуттоно.

«Нырысетӥ дышетӥське мон туж яратӥсько. Шумпотӥсько, со доры дышетскыны тупай шуыса. Малпасько, бадӟым будӥ ке но, дышетӥсьме уг вунэты шуыса», - тазьы гожтӥз вал Ольга Михайловна дорын дышетскем нылмы, сое юбилей статьяын ӟечкыласа. Сыӵе яратоно дышетӥсь луыса ик, чебер тусбуйын мед кылёз син азямы Ольга Михайловнамы.

Ӵыжы-выжыоссэ, матысь адямиоссэ яратоно муртсы сярысь умоесь кылъёс ӧжыт ке но мед буйгатысалзы, секыт кайгузэс мед люкысалзы.

Екатерина Салтыкова

Балтась посёлок

Реклама
Нравится
Поделиться:
Реклама
Комментарии (1)
Осталось символов:
  • 9 ноябрь 2018 - 20:57
    Без имени
    Кытын дышетиз та дано но гажамон дышетись?