Ӵын тылтэк уг луы! (Фото)

Полигонысь ӵынэз тӧл вуттӥз Ципья но Тагашур пала. Татын улӥсьёс солэсь кӧня ке нунал ӵоже курадӟизы. Укнооссэс пытсаса, гуртын улӥсьёс ӝожтӥськизы:

— Ваньмыз ӵын пӧлын, адямиос курадӟо. Нош ваньмыз та шуг-секыт шоры нырысь часъёсысен ик кылэезъя учкымтэ бордысь потэ, вань кышкытсэ валамтэысь.

Нош кин та юан шоры кулэезъя ӧз учкы? Кин кыл кутэ жаг куян интыын радлык понна? Тае тодон понна жингыртӥмы Ципья поселенилэн главаезлы, Азат Нотфуллинлы. «Территоримы бадӟым. Но жаг куян инты понна сельсовет кыл уг куты, малы ке шуоно со жилищно-коммунальной хозяйстволэн арендаяз луэ».

«Ципьяысь МПП ЖКХ»-лэн кивалтӥсез Марат Кадимов сётэм юанмылы валэктӥз, жагез ӝуатӥллям, ӝуатэмлэн бервылъёсыз кылемын шуыса. Марат Тагирович пусйиз, жаг куян интыын тылпуэз кысыны капчи ӧвӧл шуыса, жаг музъем пушкын но луэ, соин сое вуэн кысыны пайдаез ӧвӧл — тылпу нош ик потоз. Та понна тылпуэз кысон ужрадъёс но техника кулэ. Нош со жаг куянние вторнике-средае вуиз.

— Нош тани ма тунсыко, — шуэ Марат Тагирович, — адямиос ӝожтӥсько, нош асьсэос отчы ик жагзэс нулло.

Озьы ик вань, шонер. Кылем воскресение ачим отчы ветлыкум (Н.Ж.), дас вить минут ӵоже гинэ кык машина лыктӥз. Одӥгез турнам модосъёсты ваем водитель, соосты сюрес дуре ик куштӥз. Нош со дыре полигон территориын ӵын сылэ, нош ӝуам зын трос иськеме кыстӥське на вал. Но сое (валамон мугъёсъя нимзэ уг вераськы) ӧз сюлмаськыты, дорысьтыз кыдёкын ик ӧвӧл журналист туспуктэме но видеое уськытыса сылэ шуыса.

Мар татын вераны луэ? Асьмеос дышимы ини котьку но котьмаин муртэз янгыше уськытыны. Юнме вераллямтэ ук, ӵын тылтэк уг луы. Нош тылэз асьмеос ик ӝуатӥськомы. Асьмеос ик собере курадӟиськомы.