Хезмәт

Зинаида Ивановна Уткина — Покчи Лӧзяысь клублэн заведующиез

Зинаида Ивановна1929-тӥ арын Покчи Лӧзя гуртын вордске. Школаын 10-тӥ классэз йылпумъя но, нокытчы кошкытэк, гуртаз ужаны кыле.

Дышетскыны пыре заочно Елабугаысь культурая училищее. Татын, кӧня ке ар дышетскыса, Зинаида библиотекарь ӧнеръя средней специальной образование басьтэ. Нырысь со интыяське ужаны сельсоветэ секретарь луыса, собере — библиотекае (азьло сямен изба-читальняе). Зинаида ужзэ валаса быдэстэм, соин кӧня ке дыр ортчыса солы колхозлэсь Покчи Лӧзяын интыяськем клубез оскемзы нокинэ но паймытымтэ. Библиотека но клуб одӥг юртын интыяськемын луэм, соин ужаны умой, каньыллыко луэм.

— Анае 62 арес тырмытозяз клубын ужаз, 40 арлэсь тросгес, — шуэ Зинаида Ивановналэн нылыз, Галина Денисовна Петрова, — вань улонзэ со гурт калыклы, сценалы, культуралы сӥзиз. Клубзэ но, библиотеказэ но ачиз эстӥз, утиз — дорез кадь шуныт но лякыт карыны быгатэ вал. Нагрузкаез бадӟым вал ке но, ваньзэ карыны вутскиз. Ӟуч но удмурт ансамбльёсын кивалтӥз, кӧня пол соосты телестудиын возьматӥзы...

Зинаида Ивановналэн улонэз ӵоже ужезлы сюлмыныз сётскыса ужамез сярысь верало солэн трос данъян грамотаосыз, таукарон гожтэтъёсыз. Адями сценаын чебер дӥськутъёсын кырӟась-эктӥсь коллективез, соослэсь кивалтӥсьсэс гинэ адӟе, нош со сяна но кӧня ужъёсыз вань вал клублэн кивалтӥсезлэн. Кивалтӥсь — со ик бусыын, фермаын, колхозын агитатор, со ик декоратор, со ик звукооператор, сценарист, завхоз...

Паймонэз но ӧвӧл, Зинаида Ивановналэн нылыз но анаезлэсь ӧнерзэ быръем шуыса.

— Пичи дырысеным анае сьӧры ветлӥ, ваньзэ адӟи, клуб атмосфераын будӥ. Мукет ӧнерын асме уг но адӟиськы мон, культуратэк улэме уг луы, — пальпотыса вера Галина Денисовна.

Реклама
Нравится
Поделиться:
Реклама
Комментарии (0)
Осталось символов: