Балтачта утырткан агачларны тар-мар иткәннәр

Агачлар утырту – изге гамәл, дип, юкка гына әйтмиләр. Әйләнә-тирәдә күпме генә агач булмасын, яшеллек беркайчан да артык булмый. Матурлык тудыруда гына түгел, ә биосферабызның саулыгын тәэмин итүдә дә аларга тиңнәр юк.

Балтачның «Салкын чишмә» паркында ел саен агачлар утыртыла. Кызганычка каршы, шушы тирәдә яшәүче хуҗалыклардагы маллар аларга үсәргә ирек бирми. Кеше хезмәтен бәяләмәү генә түгел, табигатькә зыян китерү дә бит бу. 

Шушы көннәрдә «Салкын чишмә» паркында тар-мар ителгән агачлар урынына яңалары утыртылды. Изге эштә районның чисталык комиссиясеннән Рәдиф Әхәтов, Балтач дәүләт тыюлыгы хезмәткәрләре һәм Балтач урта мәктәбе укучылары катнашты.