Кичтән бәйрәм озак булса...

25 ноябрь көнне өйләдән соң ЮХИДИ хезмәткәрләренең Норма авылы урамыннан баручы «Лада» җиңел машинасына игьтибарлары юнәлә. Эчке бер тоемлык белән, руль артындагы 1989 елгы ир-атны туктаталар. Документлары тикшерелә, аны махсус приборга да өрдертәләр. Прибор аның алкоголь кулланганын күрсәтә.

Шофер бу нәтиҗә белән риза булмый, прибор дөрес күрсәтми, дип бара. Аңа, медицина тикшеренүен үтәр өчен хастаханәгә барырга тәкъдим ясала, әмма ул моннан баш тарта. Соңыннан, аңлатма язганда, шофер кич белән 250 грамм тирәсе ак аракы кулланган идем, шуның калган парлары чыккандыр, дип фаразлый.

Әллә куллану 250 грамм гына булмаган, әллә бәйрәм итү бик озакка, төне буена сузылган, ничек булса да, организмда аракы парлары бар дигән сүз.

Бу эшне караган Балтач җәмәгать суды озак бәйрәм итәргә яратучы шоферга 30 мең сум штраф түләргә һәм транспорт белән идарә итүгә хокукын бер ел да сигез айга мәхрүм итәргә карар чыгарды.