Вашкалаос тазьы пумитало вал

Гуртысь пересьёс туж чаклаллям та уез. Юрт возьмасьсэс — пунызэс — ӟеч сюдыны тыршизы. Та уе пуны утэ ке, ар секытэн, пе, сётскоз. Пиналъёсыз кышкатъяллязы, коркась ӝытсэ потаны ӧз лэзе ни.

Вашкалаосмы Быдӟым нунал уе тылын пукылӥзы. Сюсьтыл вань ке, эшшо умойгес. Озьы ик нылъёс но нылкышноос, азьланяз кибашлы мед луозы шуыса, та уе вуриськыса потылӥзы.

Праздник нуналэ ваньзы вазь ӵукна султыны тыршо. Шунды ӝужан пала берытско но Инмарлэсь шуд, тазалык курыса вӧсясько. Ошмесысь ву но шур дурысь пучы вай ваё. Ӝӧк вылэ самовар пукто, гур эсто, табань пыжо. Нырысь куинь табанез ас семьяен гинэ сиёно, пе. Кӧтсы тырем бере ини юртъер котырын ужаны кутско. Воргоронъёс валэн ужало, нылкышноос пудо сюдо.

Ӝыт вӧсьнергеын шулдыръяськизы. Вӧсьнергее ветло ке, бӧлякъёс доры нырысь вылӥе тубоно. (Кисьтон дыръя юмшало ке, бӧлякъёс доры нырысь улӥе вамышто). Та нуналэ ченгешыны уг яра, шуо. Керетон быдэс арлы уродэн берытске.

Арлыдоос чаклаллям на гурт пудоосты но. Кылсярысь, та нуналэ чуньы вордске ке, кузё шудо но узыр лыдъяськылӥз. «Шудо» чуньыез корка пырталозы, пе, вал.

Е.Камашева

(«Азьлане», 18 оштолэзь, 1998 ар, №33)