Балтачта уӊайлы булсын... (+фото)

Балтач районы оешмалары язгы чорда үз мәшәкатьләре белән мәшгүлъ. Юл төзү һәм ремонтлау идарәсе эшчеләре инде ике атна дәвамында юлларда барлыкка килгән зур булмаган чокырларны битум кушылмасы белән ямыйлар. Идарә җитәкчесе урынбасары Дефак Әүхәтшин әйтүенчә, ремонт эшләре ул ел әйләнәсе бара торган эш. Вак чокырларны ремонтлауда ике бригада, шулай ук инде хәйран зурайган чокырларга вак таш катнашмасы салуда ике бригада эшли башлаган. Юл кырыйларындагы чүпләрне җыю, һәр төрле юл билгеләрен буяп, яӊарту эшләрен дә менә-менә башланырбыз, диде ул.

Район газ оешмасы егетләренә дә эш җитәрлек. Бистә юл кырыйларында кар эттергәндә ялгыш зарарланган билгеләрне төзәтү һәм буяу эшләре инде башланган.