27-тӥ куартолэзь — библиотекарьёслэн нуналзы

27-тӥ куартолэзе асьме шаерамы библиотекаослэсь но та удысын ужасьёслэсь нуналзэс пусъё. 8-тӥ арзэ ини та праздникез Покчи Лӧзя гуртысь библиотекарь Светлана Габидуллина но пусъе. Ма бордын библиотекарьлэн ужез, кызьы туала лыдӟисьёсын но гурт калыкен ужано — та сярысь библиотекарен асэныз вераськимы. Со сяна, кышномурт Покчи Лӧзя гуртысь библиотекаысь книгаослэн фондэз сярысь но вераз.

Библиотекарь луыны ноку малпанъёсыз луымтэ

Светлана Вениаминовна Габидуллина — Покчи Лӧзя гуртысь кышномурт. Татын со вордскем, дышетскем, улэ. Тунсыко: школаын дышетскыкуз ик, со лыдӟиськыны туж яратэм. Ӝытъёсы библиотекаын книгаос пӧлы ышем нылзэ анаез но ӵемысь утчаллям. Но лыдӟиськон Светлана Вениаминовна понна трос аръёслы хобби интыын гинэ кылем. Улонзэ со воксё мукет удысэн герӟам: визьнодасьлэсь ӧнерзэ басьтыса, лесничествоын тыршем, ГАИ-ын ужам. Библиотекае улонэз сое 2016-тӥ арын гинэ вуттэм.

— Тунсыко мынам улонэ, ог-огеныз воксё герӟаськымтэ удысъёсын ужаса ути. Но котькуд удыс ас сяменыз тунсыко вал ке но, библиотекаын ужан — самой матын луисез, самой яратоноез, дыр. Малы ке шуоно та удысын мон асме аслам интыям шӧдӥсько. Книга лыдӟыны кутски ке, мон произведение пушкы выйисько, ваньмыз сярысь вунэтӥсько — лыдӟиськись адямиослы та тодмо мылкыдъёс, дыр, — шуэ Светлана Вениаминовна.

Табере библиотека — солэн кыкетӥ юртэз

Светлана Вениаминовна библиотекаяз вань сюлэмзэ сётыса тырше: книгаос лад-лад ӝажыосын сыло, укно дуръёсын яркыт сяськаос калыкез шумпотто, котыр чылкыт но чебер, шулдыр но каньыл. Табере библиотека со понна — кыкетӥ юртэз.

Туннэ нуналэ Покчи Лӧзя гуртысь библиотекаын 8 сюрслэсь тросгес книга лыдъяське. Лыдӟонъюртын куинь ёзэт вань: нылпиослы, егитъёслы но бадӟымъёслы сӥзем ёзэтъёс. Тематикаосызъя но пуштроссыя учконо ке, книгаос пӧлын пӧртэмъёсыз вань: техникаен, инженериен, гурт удысэн, ож вакытэн но мукет темаосын герӟаськем книгаос.

Светлана Вениаминовна котькуд книгалэсь интызэ тодэ. Солэсь кыӵе ке книгаез курид ке, одӥг-кык шуытозь, со тыныд сое шедьтыса сётоз. Ужын луымтэ дыръяз но кыӵе ке книга курыса жингыртыкузы, со кема ик малпаськытэк вераны тодэ, вань-а сыӵе книга соослэн библиотекаязы, ӧвӧл-а.

— Шонерзэ верано ке, али лыдӟисьёс но, книгаосын тунсыкъяськисьёс но туж трос ӧвӧл ини. Но соос вань. Книга лыдӟыны гинэ ӧвӧл, курсовой, дипломной ужъёсты дасяны, проектной ужъёссылы информация утчаны, рефератъёсты гожъяны лыкто. Одӥг вакытэ Удмуртиысь «Донды Батырез» юаса жингыртӥзы — асьсэ дорын шедьтымтэзы, нош милям библиотекаямы со вань. Озьы, мон кулэ луись информациез интернет пыр соослы лэзи, — шуэ Светлана Вениаминовна.

Лыдӟонъюртэ удмурт произведениосын тунсыкъяськись лыдӟисьёс ветло

Али книга но газет-журналъёсты лыдӟыны лыктӥсьёс ӧжыт ке но, соос пӧлын нылпиос но, мӧйыос но вань вылэм. Покчи Лӧзяысь пиналъёс куспазы тросгес ӟуч кылын верасько, но со шоры учкытэк удмурт книгаосын но одӥг-ог тунсыкъясько вылэм. Нош мӧйыос Совето вакытэ потэм книгаосты яке али печатласькись газет-журналъёсты быръё. Вашкалаез, колхозъёс кылдон, Быдӟым Атыкай ож сярысь лыдӟиськыны ярато. Со сяна, шутэтскыны, капчи, чаляк лыдӟиськись литератураез басьяло, кылсярысь, нылкышно романъёсты.

Жаляса гинэ вераны кулэ, берло дыре библиотекае удмурт кылын выль книгаос ӧжыт вуыло вылэм. Огъя вераса, библиотекалэн фондаз арлы 150-200 книгаос вуо. Со пӧртэм жанрен книгаос. Тросэз соос пӧлысь — ӟуч кылын потӥсь книгаос. Вань бигер кылын потӥсьёсыз но. Удмурт кылын потӥсьёсыз сярысь верано ке, берло 2-3 аръёсы В. Ившин, В. Ар-Серги, В. Широбоков, Р. Николаева, А. Ельцов но мукет кӧня ке авторъёслэн произведениоссы вуэмын.

Библиотекаын пукыса книгаосты сётъянэн гинэ ужез уг йылпумъяськы

Лыдӟиськон но библиотекаысь кагаз ужъёсты нуон сяна, Светлана Вениаминовна мукет ужъёсын но выре. Кылсярысь, нылпиос понна пӧртэм тунсыко ужрадъёсты дася (со понна но интернетэн пайдаяськыса, ачиз дасяське), толэзьлы быдэ Вылын Ушма гуртэ книгаосын вуылэ.

— Нырысь Вылын Ушмае ветлыны кутскеме бере, калыклэсь азьвыл ик тунсыкъяськисько вал, кыӵе авторъёсты соос лыдӟыны ярато, кыӵе книгаосты соослы ваёно шуыса. Али котькуд лыдӟисьлэсь яратоно авторъёссэ, лыдӟоно газет-журналъёссэ тодӥсько ини — юатэк нуллӥсько. Калык шумпотэ, котькинлэн Покчи Лӧзяе лыктыны луонлыкез ӧвӧл ук, — мылкыдъёссэ вуттэ кышномурт.

Пӧртэм конкурсъёсы но Светлана Вениаминовна мыло-кыдо пыриське — видеороликъёсты дася, кылбуръёсты лыдӟись пиналъёсын выре, коррупциен герӟаськем темая сочинениосты гожъя. Со сяна, 20 арлэсь тросгес поселениысьтызы быръён комиссизылэн ужъёсазы мыло-кыдо пыриське.

«Котькуд гожтослэн аслаз лыдӟисез вань»

Ачиз Светлана Вениаминовна пӧртэм книгаосты лыдӟыны яратэ, тужгес классической литератураез. Матын каре зарубежной литератураез но.

— Котькуд произведенилэн бадӟым пуштросэз вань. Но озьы ик котькуд гожтослэн аслаз лыдӟисез но вань. Кылсярысь, одӥг веросэз, романэз яке повестез кызь аресэн лыдӟыса одӥг сямен валаськод, дас арскын — воксё мукет сямен. Соин котькуд книга, котькуд автор аслэсьтыз лыдӟисьсэ котьку шедьтоз. Мон ачим туж шумпотыса лыдӟысал трос книгаосты, трос авторъёсын тодматскысал — дыр гинэ шедьтыны уг луы. Гуртоосы но серекъяса верало, библиотекаысьтым вань книгаосме лыдӟи, дыр, ини шуыса. Ӧй, ӧй лыдӟы.., — азьланьтэ веранзэ библиотекарь.

Улонысь бадӟым шумпотонэз — пиосыз

Светлана Вениаминовна гуртысьтызы «Вуюись» ансамблязы но мыло-кыдо пыриське. Кырӟаны, эктыны со туж яратэ. «Крезьгурен урод мылкыдъёс, малпанъёс ортчо», — шуэ со. Со сяна, дырыз луыку кышномурт керттӥськыны, сяськаосын вырыны яратэ вылэм.

Туннэ нуналэ вордскем гуртаз со анаеныз Филиппова Марфа Петровнаен ӵош улэ. Кык пиоссэ будэтӥз, пыд йылазы султытӥз. Табере Данил но Тимур — Казаньын дышетскись студентъёс. Анайзы но ӵужанайзы сярысь соос уг вунэто, гуртазы бертыло.

— Огшоры улӥськомы — калыкен тупаса, керетытэк. Пиосы уг вунэто, дорам вуыло, талы мон пумтэм шумпотӥсько. Яратоно ужам тыршисько, самодеятельностен вырыны быгатӥсько — мар кулэ на мыным мукет? Лыдӟисьёсы но библиотекае ветлӥсьёсы гинэ тросгес мед луысалзы… Но библиотекаын лыдӟисьёслэн кулэсмемзы — со тенденция. Солэсь нокытчы уд пегӟы ни. Озьы ке но, ужмы уг кулэсмы милям — ми озьы ик кагаз ужъёсын выриськомы, калык понна пӧртэм ужрадъёсты дасяськомы — 50 адями лыктӥз ке но, 5-ез гинэ вуиз ке но. Учырен пайдаяськыса, ёросысьтымы вань коллегаосылы сӥземе потэ ваньзэ умойзэ — ужазы но, улоназы но, — йылпумъяса вераз библиотекарь.

Редакцилэн нимыныз ми но библиотекаын ужасьёсты ӧнер праздникенызы ӟечкыласькомы. Тросгес мед луозы тау карись лыдӟисьёсты!