Адями уженыз чебер

Азьло дыре фермаын ужам апайёсты туала фермаосы пыртӥд ке, «татын уж но кыльымтэ ук ини, ми дыръя тӥни со уж вал» шуыса вералозы кадь потэ.

Соос тусе куро тырыса, вуэз ведраен нуллыса, пызь пызьнаса, сурет но сёто вал, пудолэсь пыдулзэ но куръяса сузяло, котькуд скаллэсь йӧлзэ но ведра карнанэн нулло вал. Но табере фермаосын киын ужан туж ик кыльымтэ ни, туала мегафермаосын ваньмыз но уж компьютер пыр радъямын. Но туалаез но вужез вискы кылем фермаос но вань али ёросамы. Веранэ Улын Ушма ферма сярысь.

Фермалэн территорияз пырыку ик радысь пуктэм фермаос синэ йӧтӥзы. Татын кысконо скалъёс но кунянъёс гинэ сыло. «Скалъёслэн кунян ваён гидзы ӧвӧл, та гинэ секыт», — шуо скал кыскисьёс, малы ке шуоно скалъёс огшоры сылон интыязы кунян ваё, собере кунян анаез доры нимысьтыз висъетэ интыяське но 20 нунал отын улэ. Собере гинэ сое кунян гидэ выжто. Кунянъёслэн кулэмзы сярысь юакум, ваньзы ӵошен: «Тьфу-тьфу, вераны кышкаськом», — шуизы. Малы ке шуоно та ласянь соослэн шуг-секытъёссы вылымтэ. Кемалась дырысен фермаосын одӥгез валтӥсь проблема луись пыдгижы висёнъёс сярысь но юатэк кельтыны ӧй быгаты. Фермаен кивалтӥсь Айдар Исмагилев сыӵе висён али но вань, со тросгес йӧло скалъёслэн пумиське шуыса вераз, соин нюръяськемзы сярысь но мадиз. Фермае мыныкумы ужасьёс ӵемгес отысь кошкемын луо ини, татын ужан часъёссы мукетгес радъямын бере, ми ужанзылэн ӟырдыт дыраз тупамы. Нырысетӥез вераськем муртэ, Ирина Волкова, ужтэк пукисьёс пӧлысь вылымтэ, куке но со татын ужам ини, собере кошкем, нош тани ар талэзь азьло выльысен фермае берытскем. «Мон пудотэк улыны уг быгатӥськы, милям асьмелэн но гид тыр пудомы», — шуиз со. Волковъёс семьяенызы фермаын ужало вылэм. Ириналэн кузпалыз Николай возчик луыса тырше, нош Татьяна анайзыез 37 арлэсь кема ини татын скал кыске.

— Фермае лыктэм бере нырысетӥ ужмы — скалъёс азьысь сиёнэз эскерыса, сылал пызьнано, собере кысконлы дасяськоно, — ужан радлыкеныз тодматӥз кышномурт. «Нуналлы кыскем йӧлэн тунсыкъяськиськоды-а? шуыса юамме витем кадь, со шуиз: «Ӵукна кыскыку 500 литр луиз, ӝытазе 370 литр котыр люкаське. Скалъёс кунян вайыны кутскем бере, эшшо но будоз али». «Ужады мар тужгес секытэз?» — нош ик юан сётӥ мон. Нош кышномурт, кема малпаськытэк, пичи кунянъёсты утён шуыса вераз. Иринаен вераськыса сылыкумы, дорамы Николай кузпалыз но вуиз, аслэсьтыз ужзэ быдтыса, кышноезлы юрттыны дыртэ вылэм. Ӵошен ужаса капчигес шуыса веразы соос. Николай вылын луись ужъёс пӧлы пудо сиёнэ кулэ ватсэтъёс, фураж тырон, валэн куро, турын пыртон пыре. «Ас хозяйствояды но трос пудо вордӥськоды вылэм, секыт ӧвӧл-а?» шуыса юамелы со оскымон валэктӥз: «Гуртын пудо вордытэк улонэз син азе но пуктыны уг быгатӥськы, ми государстволэсь нокыӵе юрттэт басьтытэк, ас кужыменымы тыршыса улӥськом, мылкыд карем муртлы туала дыре ужаны луонлыкъёс вань».

23 ар «Сурнайын» скал кыскись луыса ужась, азьло но али дыръёсты ӵошатыны быгатымон опытэз луэм Галина Плотниковаен но вераськимы.

— Ужан дыръя трос пӧртэм воштӥськонъёсты адӟыны тупаз, али ведь киын быдэстоно уж туж ӧжыт. Пудо сиён асьмеос ум тыриське, йӧлэз ум нуллӥське. Ужмы кык поллы капчигес луиз, ӝожтӥськыны муг ӧвӧл. Эльвира Павловаен сменаен ужаськомы. 50 скал кыскиськом. Али скалъёс туж ӧжыт кунян ваё, май толэзе кунян ваёноосыз трос, соку уж но уногес луоз ини, кунянъёсты но асьмеос ик учкиськом ук, — вакчияк вераз Галина апай но люкиськыкумы котькинлы тазалык сӥзиз. Скал кыскисьёсын но кунян утисьёсын юн кусып возьыса ужась валтӥсь зоотехник-селекционерен Елена Торосянэн но ужез сярысь вераськимы.

— Мон дышетскемея мылысь-кыдысь ужасько, соин, дыр, контрольной лыдъян-чотан ужъёс мыным кельшо. Валтӥсь уже — отчёт радъяса, сое компьютере пыртон, собере, толэзяз одӥг пол котькуд скаллэсь контрольной кыскон басьтоно. Со йӧлэз Высокая Горае келяськом. Отын солы трос пӧртэм анализ лэсьтӥське, — вера кышномурт. «Кыкто кунянъёсты ӵем вордско-а?» — тунсыкъяськисько мон. «Ми дорын ар ӵоже кӧня ке кыкто кунян вордске, тани та нуналъёсы гинэ но Олеся Фёдоровалэн группаяз кык ош кунян вордскиз. Кыксы но умой будо. Та осеменатормылэн Пантелеймон Петровлэн тыршемез ини», — ӵош ужасьсэ ушъяз Елена.

Ферма ужасьёс понна кыкетӥ юртлы пӧрме. Татын кин кинлы кызьы быгатэ, озьы юрттэ. Бервылъёслы но ӵошен шумпото. Шуг-секытъёсты но ӵошен сэртто-пертчо, Улын Ушма фермаын ужасьёс но талэн примерез луизы.

P.S.: Улын Ушма гуртысь фермаын ужась нылкышноос сярысь — пыр-почгес вуоно номерын.