Афганистан — шуг-секытъёсын тырмем тодэ ваёнъёс

Нош ик «афган» батыръёсмы асьсэлэсь синпель нуналзэс пусйизы, бырем эшъёссэс буре вайизы. 

Котькуд кунлэн историяз вань учыръёс, кудъёсыз адямилэн йырысьтыз ӵушисько но пыраклы архив луыса гинэ кылё. Но вань сыӵе учыръёс, кудъёсызлэн пуштроссы аръёс ортчыса но асьсэлэсь кулэ луись тодметсэс уг ышто. Таӵе событиос тодэ кылё но поколениысь поколение выжо. Соос пӧлы пыро нимаз интыосын ортчись вачевуонъёс (столкновениос) но, туннэ нуналэ ортчись конфликтъёс но. 

Афганысь ожмаськон 1979 арысен 1989 арозь кыстӥськиз, та шимес вакыт эскерон луиз советской арми понна. Котькуд солдатлэн юн но оскымон луэменыз шаермы та вормонэ вуыны быгатӥз. Дорзэс сюрс иськемъёслы палэнэ кельтыса, егит пиосмы кошкизы Афганистан палъёсын улӥсь адямиосты утьыны но каньыл улонзылы дурбасьтыны.

1989 арын 15-тӥ тулыспалэ советской армилэн берпуметӥ колоннаосыз Афган музъемысь потӥзы. Со афган ожмаськонлы пум вуиз шуыса шумпоттӥсь тодмет луиз. Быдэс шаермылы бадӟым шумпотон ваем нунал! Но со дыре ик кӧня кайгу, мӧзмон пыӵамын та нуналэ. Кӧня егит пиослэн улонзы куспетӥ луэмын, кӧня анайёслэн сюлэмазы пиоссылэн кылъёссы вужер луыса кылемын, кӧня нылмуртъёслэн яратон тылгизьызы кысэмын... Яраосын тырмем улон бервылъёс каллен бурмизы ини, озьы ке но кышкыт дыръёсысь тодэ ваёнъёс али но сюлэмез бугырто.

15 тулыспал — шаермылэн палэназ дано ужзэ быдэстыса бырем афганец—интернационалистъёсты сӥлы карыса буре ваён нунал. Эшшо одӥг нунал, кудӥз возьматэ адями улонлэсь дунлыксэ но кулэлыксэ, зэмос патриотлэсь кужымзэ, солдатлэсь секыт ужзэ.

Трос егит пияшъёс туала дыре шаермы понна одӥг арзэс но жаляло, армиын ортчытэм дырзэс юнме быдтонэн лыдъяло, но пиосмуртлэн со валтӥсь ужпумез — матысьёсты утьыны дышетскон.

Афган ожысь ветеранъёсты сӥлы карыса, ёросын арлы быдэ пумиськон радъяло, концерт программаен шумпотто Балтась лулчеберетъя юртысь артистъёс но мукет мылкыд карисьёс. Та ваньмыз возьматэ калыклэсь ожгарчиосты сӥлы каремзэ но соосын данъяськемзэ. 

Шумпотымон, ожысь ветеранъёслэн туннэ нуналэ вань огинъёссы, мерлыко сетьёсын нимаз чатъёссы, отын соос ёросысь но котыр иворъёсты тодыны быгато, ог-огзэс праздникъёсын ӟечкылало, сюлмысь люкаськонъёс ортчытъяло. Матысь кусыпъёс возё асьмелэн удмурт-афганецъёсмы но. Соос яркыт кизилиос сямен гажано куноос луо школаосын, отын радъясько пӧртэм ужрадъёс. Ожгарчиос пыр дышетскисьёслы ас шаердэ но калыктэ гажан мылкыд пыӵато, зэмос патриот луон понна инъет кылдыто.

Сяме пыремъя, ёросысьтымы школаосын но тыршо афганец-интернационалистъёсын пумиськонъёс радъяны. Ветеранъёс ӧтемзылы шумпото, дырзы тупамъя лыкто, малпанъёссэс верало но пиналъёсын мылысь-кыдысь кенешонъёс нуо. 

14 тулыспалэ Ӟаны шоръёзо школаын нимысьтыз афганецъёслы сӥзем ужрад ортчытӥськиз. Татчы ӧтемын вал матысь гуртъёсын улӥсь Афган ожысь ветеранъёс — Николай Романов но Сергей Макаров. Геройлэсь нимзэ нуллӥсь школаын тросэз соосыз тодо ини, соин пумиськон но шуныт, эшлыко мылкыдэн ортчиз. 

Дышетскисьёс но, дано воргоронъёслы сӥзьыса, узыр концертной программа дасяллям: эктон-кырӟанъёс, историысь пӧртэм тодэ ваёнъёсын веранъёс. Нылпиос ожлэсь пуштроссэ мур ик уг ке но валало, син азязы кышкыт суредъёс пуксё, яркыт буёлъёс воштӥсько пеймыт тусъёсын.

Ужрадлэн кутсконаз дышетскисьёс азьвыл дасям юанъёссэс сётъязы. Соос пӧртэм пуштросо луизы: инкуазь, ожгарчиослэн кусыпъёссы, секыт дыръёс но мукет.

— Таза луэ, умой дышетске, дышетӥсьёслэсь одно ик кылзӥське, эн кышкалэ азьлань вамыштыны. Мӧйыосты но арлыдоосты гажалэ, шаермылэн зэмос патриот гражданъёсыз луыса будэ, — будӥсь поколенилы ӟечкыланъёссэ вераз Сергей Анатольевич Макаров.

Ожгарчиос туннэ нуналэ шудо но тынӥсь улонэн уло. Паймымон кадь: гурт калык пӧлын соос озьы ик ужало, мерлыко ужъёсы пырисько, пиналъёссэс будэто, пудо вордо. Арлэн одӥг нуналаз гинэ соослэн нунал радлыксы воштӥське, мылкыдъёссы бугырско но, нош ик кышкыт ож вакытъёсы вутто. 
Калык понна егит дырзылэсь люкетсэс сётэмъёс уло асьме пӧлын. Дыр ортчыса, соос но ӧжытгес кылёзы, соин нылпиослы ӵемгес верано пӧлысьтымы Геройёсмы сярысь, соослэн батырлыксы но кужымзы сярысь.