Акашка — тулыс бусы ужъёсты мытон праздник

Акашка («акаяшка» чуваш кылысен «геры ӝук» луэ) вашкала удмуртъёслэн тулыс бусы ужъёсты мытон праздниксы луэм.

Удмуртъёс христианствое пырем бере, со православной Пасхаен огазеяськем. Котькудӥз семья аслаз бусыяз яке ӵошен быдэс гурт Инмарлэсь ӟечлыксэ курыны потылэм. Акашка нунал, инкуазь шоры учкыса, гурт кенешын тупатэмын луэм. Кенешо, кин тулыс бусы ужез кутскоз.Тупатэм нуналлы буям курегпуз пӧзьто, луэ буямтэосыз но. Буям курегпузъёсыз ю тысен ӵош кизён кудые тыро. Быдэс гуртэн ураме валъёсты учкыны потылӥллям, уго таза валъёс бордын луэм кизёнлэн кызьы ортчонэз. Кырӟанын но озьы кырӟаллям:

Акашка, Акашка шуэм понна,

Валэд ке мотор но Акашка...

Сьӧразы тӧдьы бамкышет, табанянь, сукыри нянь, мукет пыжемъёс басьтыса, бусые мынӥллям. Ваем нянез вӧсяллям но вань лыктэмъёс со нянез веръялллям, ческыт шуыса ушъяллям. «Тынад киыд капчи» шуыса, гажано мӧйы воргоронлы кизьыны оскиллям. Пичияк гырем чураз ваем пыжемъёсты, няньныр, уксё, буямтэ курегпуз понӥллям. Буямтэ курегпуз Музъем-анайлы лыдъяськем. Оскем мурт, Инмарлы вазиськыса, шулдыр нуналъёс, шуныт зоръёс, асьсэлы но, пудолы но тазалык курыса, ю-нянь мед удалтоз, ю-тысь курегпуз кадь бадӟым но тыр мед луоз шуыса, курегпузъёсты ю-тысен ӵош бусые кизем. Пиналъёс но егитъёс тросгес курегпуз бичаны тыршиллям. Со сяна, та нуналэ кизьымтэзы ни. Бусыын я возь вылын пиналъёс но егитъёс курегпузэз питыратыса, бергатъяса, гурезь уллань лэзьылыса шудӥллям, шулдыръяськиллям. Песянае, Никитина Анна Кондратьевна, вордскемезъя Ӟаныысь, вералоз вал ана вылазы бызьылыса ӵошатскемзэс, нюръяськемзэс но. Нош мӧйыос ӝытлы куноосты кунояны дасяськиллям, пыжиськиллям, одно ик ӝук пӧзьтӥллям — кеньыр быртык мында шудбур, пе, мед пыроз. Егит пиос урам кузя вал вылын кырӟаса ветлӥллям, гидкуазязы гинэ ӧвӧл, корказязы ик пыро, пе, вал. Костя пиос (Починка гуртысь Константиновъёслэн ӵыжы-выжыоссы) задоресь, пе, вал шуыса кылэме вань.

Мӧйыос ӝыт выжыоссыя ветлӥллям. Нырысетӥ корка уллапалась вылэм (ву васькемъя), озьы ялан выллапала тубиллям. (Та сямез берло аръёсы но чаклаллязы на. Кисьтон дыръя нош вылысен улӥе васькыло вал). Котькуд коркан акашка гур кырӟаллям.

Табере Акашка дыръя пиналъёс коркасен корка ветло, «Христос улӟыса султӥз! Зэм ик улӟыса султӥз», — шуо. Курегпузэн шудон, Бибатлаын но Вукогуртын сяна, уг кылӥськы ни кадь.

Василий Никитин

Карек-Серма гурт

Фото: https://pixabay.com/