Александр Якимов — политинформатор, журналист, югдытӥсь, библиотекарь

Сюдэ-вордэ сое песянаез. Пичи дырысеныз Александр дышетсконэн тунсыкъяськем, визьмо пияш луэм. Но быгатонлыкъёсыз трос луыса но, Ципья школаез йылпумъямез бере, Александр нокытчы дышетскыны уг мыны. Соин солэн вылӥ тодон-валанэз но, шоро-куспо специальной тодон-валанэз но уг луы. Ма, дышетскытэк но со визьмо луэм. Усто, янгышъёстэк гожъяськыны быгатэменыз ваньзы пӧлысь висъяськем со котьку но. Армие кошкытозяз Александр Васильевич Новая Гора гуртысь Таисия нылэн семья кылдытэ. Нош ини армиысь бертэм бераз егитъёслэн куинь пиналъёссы вордско — Елена (Кушкетын улэ), Владимир (Карек-Сермаын улэ) но Валентина (Можгаын улэ).  

Александр Васильевич гумырыз ӵоже гуртаз туж гажамон, адӟем карымон пиосмурт луэм. Карек-Сермаын солэсь устогес, визьмогес адями но вылымтэ. Со доры кыӵе гинэ юанэн вуылымтэзы — со ваньзылы юрттэм: кинлы визь-кенешен, кинлы ужен. Луэм со политинформатор. Огшоры кылын вераса, политика иворъёсын калыкез, гуртысь партийнойёсты тодматэм. Кулэ луись кивалтэт ужкагазъёсын (правительственные документы) ужам. Луэм со журналист но. Толэзьлы быдэ бордгазетъёсты (стенгазетаосты) поттылӥллям соку. Веранэз но ӧвӧл, та газетъёсты калык лыдӟыны яратылэм. Со бордгазетъёсты поттонэз Александр Васильевичтэк син азе но пуктыны луымтэ. Азьмынӥсьёс но, начар ужасьёс но — ваньзы  та газетэ шедьылӥллям. Луэм со югдытӥсь но. Клуб луымтэысь, концертъёсты, праздникъёсты радъясез но шедьымтэ. Та уж борды но Александр Васильевич басьтӥськем. Василий Петрович Никитинлэн верамезъя, Александр Якимов котькуд праздникез дасян борды мылысь-кыдысь басьтӥськем. Пиналъёслэн, егитъёслэн юрттэменызы со быгатэм гуртын умой концертъёсты радъяны. Сценазэ но ачиз лэсьтэм.

— Санька агай туж визьмо вал. Трос ужаз гурт калык понна. Кыӵе уж борды ӧз басьтӥськы, ваньзэ умой пӧрмытӥз. Азьло урамын вывескаос (нимпулъёс) луыло вал. «Туэ котькуд скаллэсь 3500 килограмм йӧл кысконо» выллем гожъям призывъёсын плакатъёс вал со. Тӥни со плакатъёсты но Санька агай лэсьтылӥз. Фермаосысь бадӟым стендъёсты но со лэсьтӥз. Ачиз ведь ваньзэ ручкаен гожъяз. Быръёнъёс дыръя трос агитаторской ужъёсты но нуиз. Со сяна но макем трос ужъёс вал. Бюджет организациосын ужасьёс мар гинэ ӧз ужалэ — турын турназы, октӥзы, картофка бичазы, сенаж тыризы... Сыӵе вал со — Александр Васильевич — тыршись, ужась, — маде Василий Петрович.  

Луэм со библиотекарь но. Та юан вылэ пыр-почгес дугдомы, малы ке шуоно ӝыны улонзэ Александр Васильевич библиотекаын ужанлы сӥзе. Трос аръёс ӵоже Александр Якимов Карек-Серма гуртысь библиотекаын ужам. 1958-тӥ арын лыдӟонниын ужаны кутске. Ньыль ар ӵоже ужамез бере, 1962-тӥ арын, армие басьтӥське. Декабрьын 1965-тӥ арын бертыса, нош ик библиотекаын ужзэ азинтэ. Пенсие потэм бераз но али кӧня ке ар та интыужын тырше. 62 аресэз тырмыса гинэ дано шутэтсконэ потэм воргорон. Мазэ веранэз, азьло библиотекае трос адями ветлэм — калык яратылэм лыдӟиськыны, быдэн витен-куатен книгаосты люкаса лыдӟыны басьясьёс но луиллям. Соин библиотекалэн гурт калыклэн одӥгез тужгес яратоно интыез луэм. Нылпиос, бадӟымъёс — ваньзы библиотекаын луиллям. Адямиослэн библиотекае сыӵе кыстӥськемзы библиотекарь бордын луэ, дыр.

— Бабаймы (Александр Якимов — ред.) туж усто пиосмурт вал. Туж визьмо, ужась, тыршись но котькинлы юрттыны дась луись. Кыӵе ке кагаз ужъёс луизы ке, кылсярысь, заявлениос гожъян, гуртоос одно ик солы вазиськыло вал. Нокинлы отказ ӧз сёты, ваньзылы юрттӥз. Йырыз умой ужаз солэн. Газетъёсты трос лыдӟылэ вал, политикаен тунсыкъяськиз. Сыӵеен со мынам тодам кылемын, — тодаз вае Александр Васильевич сярысь солэн кенэз, Мария Якимова.

Нялтас вераса, Мария Анатольевна Якимова ачиз но Карек-Сермаысь библиотекаын ужа. 2001-тӥ арысен, Александр Васильевич дано шутэтсконэ потэм дырысен, та интыужын тырше. Кык ар талэсь азьло Александр Якимов сопал дуннее выжиз. Со Карек-Серма гуртын ватэмын.

Карек-Серма библиотекалэн архивысьтыз: Карек-Сермаын нырысетӥзэ библиотека 1930-тӥ арын усьтӥське. Со Петров Иванлэн коркаяз интыямын луэ. Библиотекалэн нырысетӥ кивалтӥсез луэ Ципьяысь Аркадий Чегаев. 1935-тӥ арын библиотекаез мукет азе, Ӟаные, выжто, малы ке шуоно отын гурт поселение интыяськемын луэ, нош аслаз библиотекаез со гуртлэн вылымтэ. Выльысен Карек-Сермаын библиотека 1954-тӥ арын усьтӥське. 1978-тӥ арысен клублы шуыса лэсьтэм юртын интыяське. Туннэ нуналэ но библиотека ужа. Соин Мария Якимова кивалтэ.