Анай кыллэн но калык сям-йылолъёслэн кӧкызы – семья

Туала дунне узыр пӧртэм технологиосын, тенденциос но ялан вошъясько, лулчеберет ӧрын но выль тӧлъёс пельто. Озьы ке но, туннэ нуналэ но пӧламы вань выжыоссылы, лулчеберетсылы, сям-йылолъёссылы оскымон кылись семьяос. Сыӵе семьяос пӧлы пыртыны луэ Кисаль (Сала Кушкет) гуртысь кык егит семьяосты — Камаевъёсты но Смирновъёсты, кудъёсыз туэ «Шудо-буро удмурт семья» элькун вожвылъяськонын Балтась ёрослэсь данзэ утизы. Утизы гинэ но ӧвӧл, Камаевъёс вормисе потӥзы, нош Смирновъёс кыкетӥ инты басьтӥзы. Ӟечокъёс! Сюлмысь соосты ӟечкыласьком! Кыкез ик та семья улэ но ужа гуртын, утьыса возе анай кылзэ, лулчеберетсэ но сям-йылолъёссэ.

Кисаль гуртысь Камаевъёслэсь семьязэс ёросамы тросэз тодо. Одӥгез но удмурт ужрад яке концерт Виктор Павлович Камаевтэк, солэн Михаил пиезтэк но Антон, Андрей внукъёсызтэк уг ортчы, шуыны кулэ. Соин «Гырон быдтон» улсын радъяськем «Шудо-буро удмурт семья» вожвылъяськонысь но соосты адӟыны чик паймымон ӧй вал. 

— Конкурсэ малпамтэ шорысь пыриськимы, — шуэ семьялэсь шунытсэ утись анай, Ирина Камаева, — «Гырон быдтонозь» одӥг нунал кылем бере организаторъёс жингыртӥзы, куризы пыриськыны, ченгешонъёс вал, но ваньзэ сэрттӥмы-пертчимы. Ӟеч творческой номер дасямы, жаль, праздник кутсконын аппаратураен шугъяськонъёс кылдэмен, сое быдэстыны луонлык ӧз усьы. Но ӵошен ми кужым. Милям вань туж умой юрттэтмы-пыкетмы — со песянай-песятайёсмы. Ми сюлмысь данъяськиськом семьяенымы.

Пичияк ивортодэт сётон вылысь: 

Камаев Михаил Викторович вордӥськемын Кисаль гуртын 1992-тӥ арын. Ужа Балтасьысь 110 номеро ПСЧ-ын (пожарно-спасательной часьтын), тылпу кысон машиналэн водителез луыса. Туж трос ужа, семьяез понна тырше. Крезьгурез яратэ, кылсярысь, арганэн шудыны. Техникалы яратонэз бадӟым, тужгес но трактор солы кельше. Со сяна, Михаил Ӟаныысь лулчеберетъя юртын концертмейстер но луэ.

Камаева Ирина Николаевна Марий Элысь Мари-Турек ёросысь Шихалеево гуртын 1991-тӥ арын вордскемын. Али дыре пиналэз утён понна сётӥськись декретной отпускын. Солэсь азьло Шор Кушкет гурт поселенилэн исполнительной комитетэзлэн кивалтӥсезлэн воштӥсез луыса ужаз. 
Ирина, крезьгурын быгатонлыкъёсы ӧжыт шуэ ке но, ас вакытаз со домбра классъя крезьгуръя школаез йылпумъям. Ваньмон дыръяз йырси ӵышконэн, причёскаосын, макияж лэсьтонэн выре.

— Михаилэн ми кык ар пумиськылӥмы но 13 июне 2014-тӥ арын кузпалъяським. Туннэ нуналэ куинь нылпиосты вордӥськомы. Бадӟымез пимы — Антон. Со 2015-тӥ арын вордскиз, 4-тӥ классэ выжиз. Крезьгурен тунсыкъяське, 2024-тӥ арысен Ишмурзина Татьяна Юрьевна доры баянъя но вокалъя дышетскыны ветлӥськом. Озьы ик спортын быгатонлыкъёсыз вань. Ваньмон дыръяз футболэн шудэ, волейболъя, тег-регбия ӵошатсконъёсы ветлэ. 

Кыкетӥез пимы, Андрей, 2017-тӥ арын вордскиз, туэ 2-тӥ классэ выжиз. Озьы ик крезьгур ӧръя кыстӥське, Татьяна Юрьевна доры ик вокалэ ветлэ. Ваньмон дыръяз яратэ футбол выллем чырткем шудонъёсын шудыны, суредаськыны.

Покчиез нылпимы — Мирослава нылмы. Солы али 8 толэзь гинэ. Туннэ нуналэ со ки вылын ветлыны яратэ (серекъя — ред.), озьы ик Антон агаезлэн баянэн шудэмезлы туж шумпотэ, — матысен семьяеныз тодматэ трос нылпиё анай.

Кызьы адӟиськом, Камаевъёслэн семьяязы крезьгур бадӟым инты басьтэ. Сям-йылолъёс но калык праздникъёс выллем ик, крезьгур но вордскем кылэз, лулчеберетэз утёнын бадӟым инты басьтэ шуыса малпало соос, асьсэ улоназы та малпанлэсь шонер луэмзэ юнмато но. Кырӟан-крезьгур уг чалмылы та семьяын. Со быгатонлык выжыысен-выжые кӧче: Виктор Павлович но, Михаил но мызганэн шудо, кырӟало, покчиос но кырӟало, пӧртэм конкуръёсы пырисько. Антон мызганэн но усто шудэ ини. Нялтас вераса, туэ «Гырон быдтонын» пияш, «Арган кырӟа» конкурсэ пыриськыса, 2-тӥ инты басьтӥз. Ӟечок! Ӟечкыласьком сое!

Калык лулчеберетлэсь сям-йылолъёссэ эскерон но утён мылкыд пыӵатонын, анай-атай сяна, бадӟым инты басьто песянай-песятайёс но. Камаевъёс бадӟым семья луыса, анай-атаен ӵош тупаса, ог-огзылы юрттыса уло. Озьы та семьяын нылпиос пичи дырысенызы вашкала удмурт кырӟанъёсты кылыса будо, семьяен калык праздникъёсы пырисько, ас калыксылэсь сям-йылолъёссэс гажаны но дунъяны дышетско. 

— Анай-атаен ӵош улонлэсь ми умой палъёссэ гинэ адӟиськомы. Нырысь ик, ог-огмылы юрттӥськомы, дорысь вань бадӟым ужъёсты ӵошен лэсьтӥськомы, ӵыжы-выжы кусыпъёсмы юнмало. Ми ужын луон дыръя, котьку нылпиосты учкись мурт вань. Бадӟым семьяын нылпи тупаса, эшъяськыса улонлэсь дунлыксэ валаса будэ. Нылпиос кылэз тодыса будо, дорамы ми анай кылын гинэ вераськиськом угось. Та ми понна тужгес но дуно. 

— Шудо семьялэн секретэз ма бордын луэ? Та юанлы кыӵе ответ сётысалды? — юасько егит анайлэсь.

— Кышно котьку «картэз сьӧрын» луыны кулэ шуыса малпасько мон. Семьяын валтӥсь мурт — карт, вань решениос со сьӧрын. Ченгешонъёс мултэс медаз пуроме шуыса, шӧдонлык, саклык луыны кулэ. Тупаса улоно, — шуэ Ирина.

(Азьланьтонэз вань).