Анай кыллэн но калык сям-йылолъёслэн кӧкызы — семья (азьланьтонэз)

— Мон вордӥськи Вукогуртын, кузпалэ — Кисальысь. Улон сюресъёсмы пумиськизы 2018-тӥ арын, Ципья лулчеберетъя юртын дискотекаын. Со арын ик улонмес герӟаны малпамы, кузпалъяськимы. Вордӥськиз Амалия нылмы, солы 7 арес, туэ со нырысетӥ классэ мыноз. Покчиез — Милана, со Ӟаны гуртысь нылпи садэ ветлэ. Ачим Ципьяысь социально-реабилитационной юрттэт сётонъя центрын медсестра луыса ужасько, кузпалэ сюрес лэсьтонъя «МДСУ-1» обществоын КамАЗ машинаен водитель луыса тырше, — семьяеныз тодматэ Светлана Смирнова.

— Кыӵе со семья улон? Мар воштӥськиз кузпалъяськемды бере? — юасько кузпалъёслэсь.

— Семьяен улон ваньмызлэн кадь, дыр, — сыӵе ик шумпотонъёсын, вормонъёсын но шугъяськонъёсын. Валче кариськеммы бере ог-огмы шоры учкон ӧжытак воштӥськиз — ог-огмы понна кылкутон, ог-огмы сярысь сюлмаськон кылдӥз. Ас поннад улыку, тросгес мылкыдъёсъя улӥськод кадь. Нош семья кылдытыса рос-прос улыны кутскем бере, улон шоры учкон но воштӥське, ачид но гань-ганьгес, лякытгес луиськод вылэм. Улон дышетэ, семья но нылпиос дышето, — шуэ Светлана Николаевна.

— Тӥ понна ӟеч семья — кыӵе со?

— Ми кузпалэным пӧртэмесь ке но, котьку огкылысь улыны тыршиськомы, вань ужъёсты ӵошен ужаськомы, ог-огмылы юрттыса но визь-кенеш сётыса. Котькыӵе нылкышно сямен, яратӥсько, куке семьяын лад-лад, ваньмыз дорын. Улонын нылпиос ми понна нырысетӥ интыын, — валэктон сётэ семьялэсь шунытсэ но югытсэ утись анай.

— Котькуд адями семьяяз ассэ шудоен лыдъя, семьяе бертэм потэ, сое утем потэ. Ми но валче туж шудоесь. Милям вань кык пичи шунды тылсиосмы, милям осконмы но яратоноосмы — Амалия но Милана нылъёсмы, — ватса яратӥсь кузпал но сюлмаськись атай, Александр Юрьевич. 

Смирновъёс но, Камаевъёс кадь ик, анай-атаенызы ӵош, атай юртсылэсь нэгыззэ утьыса уло. 

— Улӥськом кузпалэлэн анай-атаеныз — Ирина Анатольевна но Юрий Германович Смирновъёсын ӵош. Улӥськом тупаса. Бадӟым семьяен улыны туж шулдыр. Соос котьку но котьмаин юртто, визь-кенеш сёто, пиналъёсты но утё-вордо. Мон соослы котькуд ласянь тау карисько. Но озьы ке но, егит семьяос асьсэ понна улыны кулэ, дыр, шуыса малпасько. 

— Семьяяды кыӵе кылын вераськиськоды?

— Куспамы удмуртэн вераськиськом, тупа ӟуч сямен но вераськыны, озьы ик бигерзэ но тодӥськом.

— Маин тунсыкъяськиськоды?

— Ми туж яратӥськомы спортэн вырыны, эктыны но кырӟаны. Нылпиосмы эктонъя кружоке ветло, ми но соослэсь бере ум кылиське — Ӟаны гуртысь лулчеберетъя юртысь «Шулдыр ӝыт» ансамбле мылысь-кыдысь ветлӥськомы.

— Конкурсэ пыриськемды сярысь но вералэ вал. Та дырозь сыӵе конкурсъёсы пыриськемды вал-а?

— Та выллем конкурсэ нырысьсэ пыриськимы. Но удмурт концертъёсы ансамблен ӵош пыриськылӥськомы. Удмурт семьяослэн вожвылъяськоназы милемлы пыриськыны ӵектӥзы но ми шумпотыса соглаш луимы. Со кӧня ке люкетлэсь вал. Нырысь семьяен тодматоно вал, собере нылпиос, анайёс но атайёс понна нимаз конкурсъёс, визьсынан люкетэз но вал. Нылпиослэн вожвылъяськоназы бадӟымез нылмы, Амалия, пыриськиз. Соослы тысьёсты бырйыса октоно вал. Ми, анайёс, курегпуз шуккимы, кинлэн быг-быггес пӧрмоз шуыса. Атайёс пулысь кортӵогъёсты поттыны но шонертыны кулэ вал. Конкурс туж тунсыко потӥз милемлы, мылкыдмы ӝутӥськиз.

Кык удмурт семьяос — анай-атайёссэс гажаса, сӥлы карыса улӥсь удмурт семьяос. Кыказ но семьяын анай-атайёс нылпиоссылы анай кылзэс, лулчеберетсэс, сям-йылолъёссэс, яратон мылкыд пыӵатыны тыршо, песянай-песятайёссы выжыоссэс медаз вунэтэ, мед дунъялозы шуыса сюлмасько.

Камаевъёслэн но Смирновъёслэн семьяоссы — со гуртын азинлыко улӥсь но ужась семьялэн яркыт примерез. Соос нылпиоссэс вашкалазэс дунъяны, гажаны дышето, выжыоссэс утьыны мед быгатозы, вуоно поколениослы мед сётозы шуыса. Угось со кужмо но оскымон адямиез кылдытонлы инъет луэ, азинскон сюрес вылысь котькыӵе шуг-секытъёсты, могӟетъёсты вормыны быгатэ.

Ваньзэ умойзэ тӥледлы, шудо-буро удмурт семьяос! Семьяосты азьланяз но шудо, мукетъёслы адӟем карымон мед луозы, син медаз усьы тӥледлы!