Анайлэн нуналэныз ӟечкыласьком!

Анай, ӧвӧл тынэсьтыд дуноез...

Кыӵе чебер кылъёс шедьтом тыныд, анай?
Мар сӥзём мон тыныд та чебер нуналэ?
Дуннеысь вань чеберзэ анайлы кузьмасал,
Гадьысьтым сюлэмме но тыныд сётысал.
Тау тыныд улонэ понна, Анай!
Тау монэ ӟеч сямо вордӥд шуыса.
Тодӥсько: тынэсьтыд мусогес ӧвӧл адями,
Валасько: тынад люкетэныд мон тырмемын.
Яратон мылкыдме уз кысэ тӧлъёс,
Сое уз ӝегатэ секыт могӟетъёс.
Лу гинэ тон котьку таза, лу тон самой шудо,
Либатӥсь мылкыдо анае!
Мон уг тодӥськы, мар возиськод тон сюлмад,
Малпанъёстэ но уг лыдӟы дыраз,
Уйёстэ изьытэк сюлмаськид но возьмад,
Синкылиосы сюлмад пӧсь вирен киськизы.
Сӥзисько тыныд тылобурдо кадь поръяны,
Чагыр инмысь шунды кадь пиштыны,
Сӥзисько улонысь яркытсэ адӟыны,
Льӧль малпанъёсыд мед зэмалозы.
Ӵук лысву кадь чылкыт улыны,
Нуналысь иворъёслы шумпотыны.
Мон — тынад азинсконэд,
Тон — мынам весяклы кылчинэ!
Аръёс ортчозы... Дауръёс кошкозы...
Анайлэн данэз уз ышы ноку.
Тон гинэ сюлмез котьку шунтод,
Тон гинэ бордам небыт киыныд йӧтӥськод.

Юлия Щербакова

Мусое, Мамае!
Оло нош вераме, дыр, потэ...
Ӧвӧл, дыр, улонын
Чеберзэ сётӥсьсэ.
Тон сётӥд визьмозэ,
Нош туннэ нуналэ
Тыныд шуиськом ми «Тау!»
Верай ке ваньзэ,
Дуннеын кыл ӧвӧл вераны.
Тон огнад будэтӥд милемыз,
Осконо кылъёслы оскытӥд.
Туж секыт будэтӥд милемды
Нош аслыд номырзэ
Тон ӧд басьты ноку.
Секытсэ улонысь
Ас бордад тон возид,
Шундылэсь ӝужамзэ 
Ӧд но адӟы ноку.
Йыбырттом ми туннэ
Шумпотон мылкыдэн.
Синкыли поттытэк,
Чебересь малпанэн.

Людмила Раимова,
Вуж Кушкет гурт

Яратско анайме
Яратон анаелы
Сяська кузьмало.
Мусоясь шундымылы
Мед шумпотод тон.

Тон мусокай, чеберай
Анае мынам.
Ненег зарни шундымы
Мед пиштоз тыныд.

Уӵыос мед чирдозы
Мынам анайлы.
Паймымон векчи зоръёс
Мед усьылозы

Кузьмало анаелы
Мон шулдыр кырӟан.
Анайме мусокайме
Туж яратӥсько.

Елена Орехова
Берыктӥз Василий Никитин