Ӟаныос — Ижкарын (+фото, видео)

Ольга Плотникова, 5 декабрь 2022 - 16:11

628

«Даур куара» музейысь экспонатъёсын Ижкарысь калык но тодматскыны быгатэ.

Россиын улӥсь калыкъёслэн лулчеберет мерассылы сӥзем ар улсын Ижкарын 2-тӥ толсурысен Балтась удмуртъёслэн декоративно-прикладной устолыксылы но ӧнерзылы сӥзем адӟытон ужаны кутскиз. Удмурт Элькунысь декоративно-прикладной устолыкъя но ӧнеръя йӧскалык центрын радъям адӟытонын О.Н. Исаев нимо Ӟаны шоръёзо школаысь «Даур куара» музейысь экспонатъёс инты басьтӥзы. Адӟытон сӥё-дано усьтонэ Ӟаны школалэн коллективез но пыриськиз.

— Удмуртиысь декоративно-прикладной устолыкъя но ӧнеръя йӧскалык центрын милемыз туж шуныт пумитазы. Адӟытонэз усьтонэ вуиллям вал йӧскалык библиотекаысь куноос, этнографиен но историен тунсыкъяськисьёс. Ижкарын улӥсь Балтась удмуртъёс но лыктӥзы, та ужрад сярысь кылыса. Адӟытонэз усьтон ужрадын выступить кареммы бере, куинь группалы люкиськыса, мастер-классъёсы пыриськимы. Татысь ӧнерчиос милемыз дышетӥзы поскес куыны, куро мунё лэсьтыны, кызьпу туен ужаны.

Та ужрад милемлы но, декоративно-прикладной устолыкъя но ӧнеръя йӧскалык центрын ужасьёслы но туж пайдаё луиз шуыса малпасько. Ми выль кужым басьтӥмы, выль малпанъёсын бертӥмы. Отысь адямиос паймо, кызьы асьмеос со дэремъёсты, со экспонатъёсты утьыны быгатӥмы шуыса, малы ке шуоно Удмуртиын соосты ӵемысь музейёсысь гинэ шедьтыны луэ, пе. Ми синмаськимы декоративно-прикладной устолыкъя но ӧнеръя йӧскалык центрлы, кызьы отын пӧртэм ужъёсты нуо, куиськон, туен, куроен ужан амалъёсты азинто. Эшшо та адӟытонын ми Санкт-Петербургысь киужъёсъя усточиен тодматскимы. Со малпамтэ шорысь отчы лыктэм, азьвыл нуналаз, пе, пыри та центре но адӟи музейысьтымы нылмуртлэсь сюан камзолзэ. Сое учкыса сылӥсько дораз но синкылӥосы, пе, вияло: кыӵе, пе, со чебер, кызьы, пе, сое асьсэ киынызы ужаны быгатӥллям. Мукет нуналаз, удмурт дӥськутлэн чеберлыкезлы синмаськыса, со нимысьтыз лыктэм адӟытонэз усьтонэ. Туж шумпотымон, палэнысь адямиослэсь таӵе мылкыдъёссэс кылыны но адӟыны.

Мастер-классъёс бере Кузебай Герд нимо гимназие мынӥмы. Татын ми тодматскимы та дышетскон юртлэн ужаменыз, нылпиос асьсэлэсь проектъёс бордын тыршемзэс возьматӥзы, — ивортӥз милемлы О.Н. Исаев нимо Ӟаны шоръёзо школаысь удмурт кылъя но литературая дышетӥсь, дышетон ужпумъёсъя директорлэн воштӥсез Олеся Яковлева.

Адӟытон 2-тӥ толсурысен 23-тӥ толсурозь ужалоз. Солэн валтӥсь ужпумез — Балтась удмуртъёслэн улон сямъёсынызы но лулчеберетэнызы, историенызы но калык дӥсенызы тодматон. Ужрад Ватка сьӧр группае пырись удмуртъёслэсь (ӵапак сыӵе группае пыро Балтась удмуртъёс но) традиционной лулчеберетсэс утён но калык пӧлын вӧлмытон вылысь радъяське.