Арлы одӥг пол вуэ сыӵе вакыт!

5 куартолэзе быдэс дуннеямы православнойёс Акашкаез (Паскаез) пусйизы. Та выль улон кутсконлэн, сяськаянлэн но ӝужанлэн праздникез.

Иисус Христослэн улӟемез котькуд адямилы ӝутскем но яркыт мылкыдъёс кузьма. Котькуд адями тодэ: та вакытэз усьтэм но шуныт сюлмын пумитано.

Акашка матэктон вакытэ одно ик вань юртъер котырез радэ пыртоно но коркаез миськоно. Визь кутон вакытэ сюлмыд но, сямъёсыд но умой луыны кулэ, аслыд но ӟечезлы гинэ кыстӥськоно. Урод малпанъёслэсь, куашкам мылкыдъёслэсь палэнскыса, выль улон сюресэз вӧлдоно, ӟечезлы инъет пуктоно. Озьы вашкала дырысен пуктэмын, озьы ик сое азьланьтоно.
Малпасько, котькин Акашкалэсь радзэ пичи дырысеныз ик тодэ: ӵукна ик пиналъёс, чебер дӥсяськыса, чебермам корзинаосын коркась корка ветлыса, буям курегпузъёсты но чечымъёсты люкало. Та нуналэз копак семьялы но матысьёслы сӥзёно. Милям Вуж Кушкет гуртамы озьы сяме пыремын ни. Но туэ Акашкамы воксё мукет сямен радъяськиз. Куазь но мылкыдэз ӧз сӧры туэ: кезьыт тӧл пельтӥз ке но, зор вӧсьлыко нуналэз ӧз сантэма. Нош кызьы но малы та ваньмыз радъяськиз, улӥынгес валэкто.

Вуж Кушкет гурт 1958 арысен Янгул гурт поселение пыре. Гуртамы удмуртъёс но ӟучъёс уло ке, Янгул гуртын тросэз бигеръёс. Соин пумиськонъёс но туж шер шедё, праздникъёсты но нимаз ортчытъямы. Но татчы быземын гуртысьтымы вить нылкышноос, туннэ нуналэ «Яна тормыш» возёсын, Янгулысь амбулаториын, гурт ветеринарной больницаын гуртоос ужало, нош «Ива-мебель» организациын озьы ик мукет гуртъёсысь удмуртъёс но тыршо. Кин ке шуоз, удмуртъёс ужась киос шуыса гинэ. Пырак мукет сямен: амбулаториен гуртомы — Любовь Уланова — кивалтэ, гурт ветеринарной больницаен — Александр Уськеев, нош Янгулысь амбарын заведующий луыса тырше Иван Филиппов. Озьыен, калыкъёслэн эшъяськемзы уж вылын бадӟым но валтӥсь инты басьтэ. Удмурт тон яке бигер — пӧртэмлыкез ӧвӧл, ваньмы огазе луыса, тыршыса, бадӟымесь лёгетъёсы вуиськом.

Дыр ортчыса, бускель бигеръёсмы но православной осконысь праздникъёсын тодматскыны кутскизы. Соослы тунсыко вал котькуд люкетэз, асьсэос кутскизы гуртазы бызем удмурт нылкышноос доры ветлыса кунояськыны. Тау шуыны кулэ «бускельёсмылы», соос одӥг пол но чурыт кылзэс уг верало, шумпотыса ӟечкылало вань праздникъёсын. Нош Акашка соос понна нимысьтыз праздник луиз ни. Вань ужасьёс, покчиос кадь, буям курегпузъёсты возьмало. Таяз но та сямез ӧм тӥялэ. Возёсын ужасьёс но ӵукна ик ужъюлтошъёссылы саламъёс нуизы, куноязы.

Трос аръёс ӵоже Янгул гурт поселенилэн главаез луыса ужам Раниль Габдрахманов туэ аслэсьтыз ужзэ воштӥз, сое «Яна тормыш» акционер обществолэн председателезлэн интыужаз пуктӥзы. Озьыен, со вылэ трос гинэ шуг-секытъёс усизы, вылаз ик гурт поселенилэсь ужъёссэ но нуоно луиз. Сюлэм шунытэн вераны кулэ азьвыл председатель Магсумзян Сайфутдинов но ноку пумит ӧй вал праздникъёсты ортчытыны. Солэн бадӟым юрттэменыз ми кутским Гуртлэсь нуналзэ пусйыны. Раниль Фаритович но гурт поселенилэн главаез луыса ужакуз, котьку юрттыны дась вал. Та пумысен, малпасько, милемлы туж удалтӥз. 
Тулыспалэ Янгул гурт поселенилэн главаез воштӥськиз. Интыысь кивалтэтэ пуктӥзы Янгул гуртысь ик егит воргоронэз — Рамиль Гильфановез. Ӵапак та вакытэ со пӧртэм ужрадъёсын пумиськоно луиз: Россилэсь Президентсэ быръён, календарной праздникъёс, утялтӥськон, мусульман осконэн улӥсьёслэн Ураза-Байрам праздниксы. Шумпотымон, милям гуртмы сярысь но со ӧз вунэты. Ӵапак Ураза-Байрам ортчытэмзы бере ик кылдӥз малпан Акашкаез огазе пумитаны. Рамиль Равилевич но пумит ӧз луы: «Ортчытоно одно ик. Асьтэлэсь сям-йылолъёстэс ыштоно ӧвӧл. Аслым но туж тунсыко тӥляд праздник ортчытонъёсты, сям-йылолъёсты. Мон котьку юрттыны дась, мар кулэ, вазиське, юрттыны тыршо». Озьыен, выль адями гуртлы эшшо одӥг бадӟым праздникез ортчытонлы сюрес усьтӥз. 

Ми понна та ваньмыз нырысетӥзэ вал, соин ваньзэ валаса вуттоно ик ӧз луы. Рамиль Равилевич но Раниль Фаритович та понна котькуд паласен милемлы юрттэт сётӥзы. Туж бадӟым тау шуыны кулэ соослы. Котькуд нунал юалляськыса улӥзы, кулэ луись арбериосты соку ик вайизы, сӥль но сётӥзы, кеньырзэ но вуттӥзы, коньдонэн но ӧз люкетэ. Ужрадэ кык-куинь минутлы гинэ ӧз кыле, весяк огазе шулдыръяськизы но шудӥзы.

— Ноку ӧй малпа вал, таӵе яркыт праздник ортчытомы шуыса. Кинлы вазиським, нокин отказ ӧз сёты, юрттӥзы. Кин ке ӝокъёс вайиз, кин ке аратыны кӧс пу дасяз, кин ке клуб азез но территориез чебермаз. Огъя вераса, ваньзы туж шаплы ужазы, малпанэз улонэ выжтыны быгатӥм шуыса малпасько. Одӥг адями бадӟым ужрадъёсты дасяны но ортчытыны уг быгаты, таиз валамон ни. Но, мон малпамъя, ваньмыз шуныт но каньыл мылкыдо ортчиз. Куазь кезьыт вал ке но, ӧз зоры, мылкыдэз ӧз куашкаты. Ӝукмы но дыраз вуиз, самоваръёсын ческыт турыно чай но пӧзиз. Ваньзы огкылысь шулдыръяськизы, шудӥзы, нокин палэнэ ӧз кыльы. Усьтэм сюлмын лыктӥсь адямиез ужрадэ кысконо ӧвӧл, со ачиз котькытчы пыриське, ачиз шулдыръяське. Нимысьтыз вераны кулэ: Акашкамы йӧскалыккуспо луиз, бускель Янгул гуртысь но вуизы. Соослы ваньмыз тунсыко потӥз, асьсэды мултэсэн ӧз лыдъялэ, ӝук но сиизы, чай но юизы, шудонъёсы но пыриськизы. Магазинын вузкарисьмы — Тамара Соловьёва покчиослы мороженой басьтыса сётъяз. Ужрадэз радъясьёслы но юрттӥсьёслы ваньзылы бадӟым тау шуэме потэ, — ас малпанъёсыныз люкиськиз Вуж Кушкетысь клублэн заведующиез Светлана Щербакова.

Вань куноос понна туж ческыт ӝук пӧзьтӥзы гуртоосмы Антонида Самсонова, Олег Исаев, Василий но Екатерина Клеймёновъёс, Виталий Клеймёнов, Светлана Карабаева, Татьяна Исаева. Самоварен «кивалтӥзы» Константин Щербаков но Василий Клеймёнов. Ваньзы асьсэлэсь люкетсэс пыртӥзы. Одӥгез шутэтскыку, шуак мукетыз султэ, соин ваньзэс синйылтыса вуттыны но дыр ӧй вал. Тазьы ог-огедлы юрттыса ужан котьку шулдыр но шуныт ортче, огъя вераса, ужрадъёс ваньзэс огазеяло.

Ӝӧк сьӧрын кунояськыса, ӝӧксьӧр кырӟанъёсты быдэстыса, пичиос но бадӟымъёс огъя пӧртэм шудонъёсы пыриськизы. Азьло пичиос шудонъёсы пыриськизы, бадӟымгесъёс клуб сьӧрын интыяськем площадкаын футбол шудӥзы. Пичиос бере, бадӟымъёс но мыло-кыдо вань вожвылъяськонъёсы пыриськизы. Шудонъёслэсь шуг луэмзэс ас вылазы но шӧдӥзы кадь. 
Ужрадын самой умой акашка курегпузлы дизайн лэсьтӥсьёслы конкурс но ялэмын вал. Шумпотымон, пичиос тыршизы, пӧртэм пумо композициос но лэсьтӥллям, фантазизэс но уже кутӥллям. Ваньмыз шонер, ӟучъёс верамъя, объективно мед луоз шуыса, куноосмес йылпумъян лэсьтыны курим. Соослэн йылпумъянъёссыя, 1-тӥ интые потӥз Василиса Фадеевалэн композициез, 2-тӥ интыез люкизы Аделина Исаевалэн но Янгулысь Зарина но Камиль Ганиевъёслэн композициоссы. Озьы ик нимысьтыз кузьымъёсын тодмостӥськизы Дарья но Данил Клеймёновъёс, Ксения но Мирослав Филиповъёс, Юнона Фомина но Ратмир Петров.

Ӟучъёслэн «первый блин комом» шуэм веранзы та нуналэ ӧз быдэсмы. Жаляса вераны кулэ, гуртын улӥсьёслы но кӧня ке гажаса ужрадъёсы пыриськыны кулэ, дыр. Адямиос уйёссэс изьытэк, малпаськыса, тыршыса, сыӵе чебер но яркыт ужрад радъяны тыршо, сюлмасько, нош адями сое воксё уг малпа. Городысь бертэмъёс но ӟечокъёс, туж усто дасяськиллям. Городысь бертэмъёс но ӟечокъёс, туж усто дасяськиллям. Ужрад уд ке радъяськы — милям номыре уг ортчыто шуо, радъяськод ке — вӧзтӥз ортчо. Инмарен тупаса улӥсьёслы озьы кароно ӧвӧл. Макем трос тон умойзэ лэсьтӥськод калык понна, сокем умоез но тыныд кык поллы бадӟымаса берытскоз! Тае тодады возёно. Пуш сьӧсьтэс вормыса, калык пушкы итӥськыса шулдыръяськыны быгатыны кулэ. 

Нош мар уд вера янгулъёс сярысь. Мылкыд карыса, праздникез ортчытыны вуизы пичиосынызы бускельёсмы. Шумотэ Янгул школаын нимысьтыз ожгар операциын быремъёслы (Раиль Фазулзяновлы но Асгат Гизатуллинлы) мемориал пул усьтӥзы. Асгатлэн анаез — Гульшат Гизатуллина — сьӧраз одӥг бадӟым коробка пӧртэм ческыт сиёнъёс но ваем. Паймод талы! Тазьы тупаса азьланяз но огкылысь улӥмы ке, туж шумпотымон луысал, ужъёсмы но пайдаё луысалзы. 

Мылкыд карыса лыктэм бускельёсмы но ужрадлэсь шулдырзэ пуйизы. Сыӵе йӧскалык кусыпъёсмы котьку сыӵе ик шуныт, эшлыко мед луысалзы. Ведь туала вакыт но солэн бервылъёсыз троссэ матынъяськытэ но огазея. Ӟуч, бигер, удмурт яке пор праздник — ваньмы огазе луыса азьпалан но праздникъёсты пумитаны мед кылдоз. Озьыен, кусыпъёсмы но небӟозы, улонмы но сяськаяськоз, эшъёсмы но йылозы, ужъёсмы но быдэсмозы! 
Оскиськом азьланяз но таӵе шуныт пумиськонъёсмы луозы на шуыса.