Арлыдоосмылэн ымнырысьтызы пальпотон медаз кысы

Школаын бадӟым классъёсын дышетскон аръёсам одӥг проектной уж дасякум, Ципья гуртын улӥсь Сидоров Геннадий Александрович доры куное ветлӥськем вал. Ужзэ рос-прос валась, яратӥсь но ас ужезлэн зэмос патриотэз луись физкультурая но военной ужъя дышетӥсь вал со. Солэн кышноез Мария Степановна но гуртын гажамон адями, трос аръёс ӵоже со Ципьяысь больницаын ужаз. Вылаз ик, со вить нылъёслэн яратоно анайзы но луэ. Арлыдоослэн нуналзы азьын Мария Степановна доры мынӥ, вераськонмес Геннадий Александрович сярысь тодэ ваёнъёсын кутскимы.

— Генялэн кулэмез дырысен но тани дас арлэсь тросгес ортчиз ини, — кузпалзэ тодаз вайиз Мария Степановна. — Сое школаын но, гуртын но гажазы, яратӥзы. Геняен кема аръёс ӵоже тупаса улӥмы.

Мария Степановна Ципьяын улэ. Та гуртын ик со Карабаевъёслэн семьяязы 1947-тӥ арын вордскем, та гуртэ ик бызем, пересьмон даурзэ но татын пумита.

— Мон жугиськон бырем бере секыт аръёсы вордски ке но, улонмес начар вал шуыса вераны уг быгатӥськы. Семьяямы тямыс ӵошен улӥмы. Пӧртэм дыръёс луизы ке но, огъя луимы, — пичи дырыз сярысь вера Мария Степановна.

«Больницае малпамтэ шорысь ужаны интыяськи»

Школазэ йылпумъятозяз ик, Мария Степановна ужаны интыяське Ципьяысь больницае. Пенсие потытозяз но та ужын тырше со.

— Ципьяысь амбулаториын Карабаева Евдокия апаймы техничка луыса ужа вал, — азьланьтэ веранзэ Мария апай. — Ӵапак со ик ӵектӥз мыным татчы интыяськыны. Мон интые ужа али, пожалуйста, нокинэ шедьтэме уг луы, шуиз. Мон соглаш луи но озьы тӥни одӥг толэзь ӵоже гужем со интые ужай.

Со аръёс больницалэн гурласа ужан дыръёсыз луо. Горячкин кузпалъёслэн ужам аръёсаз ужзэ кутскем Мария Степановна соосты но тодаз вайиз, мукет врачъёсты но.

— Берлогес больницаын дезинфектор луыса ужась Абрамова Лиза интые ужаны кутски, малы ке шуоно Лиза Арчаысь вечерней школае медсестралы дышетскыны кошкиз. Монэ со интые тодмостӥзы. Тӥни озьы ик больницае ужаны кыли, — тодаз вае Мария апай.

Паласькись висисьёс доры дезинфекция карыны ветлон, шыр-комакъёслы пумит эмъюмъёс тырон — та ужъёс Мария Степановна вылын луо. Секыт но кышкыт ужын кышномурт дас ар ӵоже тырше, собере роддоме ужаны выже.

— Адями кулэ луиз но, роддоме ужаны потӥ. Санитарка луыса ужай, мукет отделение выжи. Отын но дас ар ӵоже тырши. Отысен ини нылпи отделение выжи. Пенсие отысен потӥ. 

Вить нылпиез луэмысь, Мария Степановна 50 аресэн пенсие потэ, но кӧня ке ар ӵоже ужзэ азьланьтэ али. Секытэзлы но соку уг ӝожтӥськы. Вылад басьтэм бере, ужано шуэ. Со али но сыӵе ик девизэн улэ.

Яратонзэ кыдёкысь ӧз утча

Вуоно кузпалэныз, Геннадий Александровичен, соос одӥг компаниын тодматско. Ма, одӥг гуртын улӥзы бере, ог-огзэс со дырозь но тодӥллям.

— Геняен вить нылъёсмес будэтӥмы. Туннэ нуналэ дас одӥг внуке но вань. Бадӟым нылмы Наташа Ижевскын аслаз семьяеныз улэ, солэн кык пиез вань. Кыкетӥез нылмы Ирина кузпалэныз Ципьяын улэ, соослэн одӥг нылзы но одӥг пизы вань. Куинетӥ нылмы Люда семьяеныз Балтасе интыяськиз, кык пизы вань. Ньылетӥез нылмы Оксана кузпалэныз Ӟаныын, соослэн но кык пизы. Покчи нылмылэн Элианамылэн куинь пиез вань. Шумпотӥсько, нылъёсы ваньзы улонын ас интызэс шедьтыны быгатӥзы шуыса, — маде кышномурт. 

«Яра али нылпиосы но внукъёсы вань»

Туннэ нуналэ Мария Степановна Ципьяын Элиана нылыныз, солэн Владимир кузпалэныз но соослэн куинь пиосынызы ӵош улэ. Со пумтэм шумпотэ, огназ ӧвӧл, матысь адямиосызлэн яратэмзы но гажамзы улсын мӧйымон даурзэ пумита шуыса.

— Вӧзам внукъёсы ке бергало, «песяй» шуыса ке вазьыло, мон асме туж шудо шуисько. Соосты школае келян, отысь сиён пӧзьтыса пумитан — ачиз бадӟым шумпотон ук, — шуэ Мария Степановна.

Внукъёстылэн куараоссы, нылпиостылэн гажамзы котьку ӟеч мылкыд мед кузьмалозы, улыны кужым мед сётозы, Мария апай. Праздникен!