Арлыдоосты сӥлы карыса

Возёсъёсысь но нимаз предприятиосысь кивалтӥсьёс, лулчеберет удысын ужасьёс, интыысь кивалтӥсьёс, дышетон учреждениосысь коллективъёс, арлыдоосты сӥлы карыса, узыр ӝӧк дасяло, концертной программа возьмато.

– Арлы быдэ милям гуртамы пересьёсты люкало гуртысь клублэн зданияз. Таяз аре но ми шумот нуналэ ужъёсмес куштыса ик ваським клубамы. Огъя 20-лэсь трос пересьёс люкаськимы. Клубен кивалтӥсьмы Светлана Щербакова шуныт сиёнэн кунояз, Алексей Павлов – воштонтэм мызганчимы – егит дырысь кырӟанъёсын но эктонъёсын мылкыдмес ӝутӥз, нош узыр ӝӧкен шумпоттӥзы «Яна тормыш» обществолэн кивалтӥсез Раниль Габдрахманов, йӧл люкась Алмаз Губайдуллин но «Авокадо» магазинлэн кузёез Ильдар Рафиков. Нош школаын дышетскисьёсмы милемлы туж шулдыр программа дасяллям вал. Соос кырӟазы но, сценка но пуктӥзы, шуныт кылбуръёсын но мылкыдмес буйгатӥзы. Вань радъясьёслы, юрттӥсьёслы бадӟым тау милемды сюдэмды-вордэмды понна, – ивортӥзы Вуж Кушкет гуртысь арлыдоос.