Ас ужезлэн патриотэз

Ужан сюрессэ медсестра луыса кутскем Екатерина Зайнуллина почта удысын но кызьы бен сыӵе усто луэм? Та сярысь берлогес, нырысь ик солэсь егит дырзэ вералом. Сырья гуртысь нылмурт пичиысен ик усьтэм сюлэмо, сайкыт ымныро, вераськыны яратӥсь луыса будэ. Школаез йылпумъяса но сямызлы тупась медсестралэсь ӧнерзэ быръе. Ижевскын медициная училищеын дышетскыса, республиканской больницае уже интыяське. Та луэ чебер, егит дырысь вань малпанъёслэн быдэсмон дырзы — дышетскыса ӧнер басьтон, умой интыын ужан, городын улон. Но... гожтэмлэсь уд пегӟы. Солэн шудбурез но городын ӧвӧл, гуртын луэ. Улонзэ со бигер пиен герӟа.

— Мон Сырья гуртысь, Роберт Вуж Ципьяысь, соин одӥг школаын, одӥг классын дышетским, — тодаз вае егит дырзэ Екатерина Ивановна.

Яратон тӥни со школаын дышетскон дыръязы ик вордске. Дӥсьтӥсь Роберт, чебер нылэз муртъёслы сётэмез, городэ лэземез потымтэеныз, одӥг нуналэ сое лушка. Чылкак мукет сямен, мукет осконэн улэм нылмуртлэн улонэз минутскын мукет ӧре выже. Анай-атаез пумит луо. Но собере атаез: «Кызьы гинэ ӧз луы, нылмурт милемын уз улы, пумит ум луэ, шудо мед луозы нылпиос» шуэ. Тӥни со бакель карон ик Екатериналэн шудо улоназ усьтон но луэ. Кузпалъяськемзы бере со Ципьяысь нылпи садэ медсестра луыса ужаны интыяське. Анайзыеныз-атайзыеныз но умой уло. Егит кенлы капчи уг луы, тыршыса дышетэ бигер кылэз но, сям-йылолъёссэс но. Гурт калык но ӝоген Екатеринаез матын каре.

— Ужан сюресэлэн мукет ӧре берытскемез азьвыл почтальонэн, Минзихан апаен герӟаське, — шуэ Екатерина Ивановна.

Анаез пыдзэ чигем бере Минзихан апай Екатериналы ас интыяз ужаны ӵектэ. Озьы со гуртоез понна ӝыны ар ӵоже ужа.

— Кивалтӥсьмылы, Рая апайлы: «Кык интыын ужаны секыт. Мынам интыям адями шедьтэ вал» шуыса вазиськеме бере, со мыным тазьы шуиз: «Ар шорын адями шедьтыны уг быгатӥськы, ачид ужа но ас интыяд адями утчаса улы». Почтальонлэн ужез уно ини, коньдонэз ӧжыт, но ваньмыз пичиысен кутске шуыса, кенеш но сётӥз. Тӥни со кенешез кылзыса ужаны кутскеме дырысен 22 ар ортчиз но ини. Уг ӝожтӥськиськы, ужме яратыса лэсьтӥсько. Адямиослы кулэ луэмелы шумпотэмысь уг дугдӥськы. Сайкыт ымнырын пумитамзы, тау карыса келямзы кӧня умой энергия сётэ, — вера ушъямон ужась.

Калыкен ас ужзэ сюлмысь быдъясь мурт гинэ ужаны быгатэ уга. Тужгес но арлыдо поколениысь адямиосын. «Яра лыктӥд али», «Туж ӝог кошкиськод», «Мукет дыръя кемагес улод, ява!», «Тонэ туннэ ӵукнаысен ик вити», «Тау ини тыныд, яра али тон вань» шуэм кылъёс Екатерина Зайнуллиналэн тыршемезлы тужгес вылӥ дунъет луо, мон сямен. «Яратоно ужам сӧл-таза луыса тыршыны мед кылдоз», — ачиз но мылкыд каре со.

Мылкыдыз ке каньыл ӧй луысал, семьяяз пыкет ке ӧй шӧдысал, быгатысал меда Екатерина Ивановна вань сюлмысьтыз ас ужзэ быдэсъяны. Нош со та ласянь туж шудо. Роберт кузпалэныз ӵош Рамзия нылызлы но Рамиль пиезлы шонер визьнодан сётыса, туннэ нуналэ соослэсь гажамзэс шӧдыса уло. Огезлэсь мукетыз ӟечесь внукъёссы будо. Рамзия Атня районэ быземын, Рамиль пизы анай-атай юртазы улэ. Роберт агай «Труд» обществолэн азьмынӥсь механизаторез. Кемалась ӧвӧл выль юрт пуктӥзы. Тӥни сыӵеесь, улонлэсь чеберзэ но ӟечсэ шӧдыса улон дыръёссы соослэн али.

Р.S.: Екатерина Зайнуллина почтальонъёс пӧлын районын ортчись конкурсъёсын но арлы быдэ шуымон вормисьёслэн радъёсазы луэ. Ципья почта ёзэсэн кивалтӥсь Альбина Яковлевалы но солэн ужамез туж кельше.