Асьме районэ Казаньысь православной осконэн улӥсь егитъёс вуизы

«Казаньысь Православной Доброволецъёс» — озьы нимаське Казань епархиысь егитъёслэн движенизы. Татчы 14 аресысен 35 аресозь нылъёс но пиос пырисько. Та движенилэн рамкаосызъя таӵе проектъёс улонэ пыӵало: егитъёслэн профессиональной хорзы, Татарстанъя но солэн палэназ паломнической но ужан ветлэмъёс, театральной студия, черкъёсты но монастырьёсты улӟытон ужен юрттон, пӧртэм мастер-классъёс, киноклубъёс, вӧсьчиосын пумиськонъёс но трос мукетъёсыз. Егитъёслэн Интернет вотэсбамын вань асьсэлэн группазы, кытын соос вуоно мероприятиос сярысь тодыны, ог-огенызы тодматскыны быгато.

Кыӵе муген соос Балтась районэ вуизы

Движенилэн кӧня ке представительёсыз (12 нылъёс но пиос) кылем шумотэ Балтась районэ куное вуизы. (Ма, куное шуыны шонер но уз луы, дыр, малы ке шуоно егитъёс районъёсы ӧжыт ке но ужаны юрттон понна, гурт калыкен, тужгес но егитъёсын тодматскон понна, соослэн улонэнызы тунсыкъяськон понна лыкто). Татын соос нырысь тодматскизы отец Рафаилэн но солэн семьяеныз, Покчи Лӧзя черкен, собере сюрес кутӥзы Ципьяе. Выль лэсьтӥськись черкен тодматскизы, ужаса но вуизы (нылъёс утялскизы, пиос лымы сузязы). Нош ӝытаз ньылез егитъёс службаын клиросын кырӟазы. «Сыӵе чебер кырӟады, егитъёс, сюлмез позыртымон», — таӵе кылъёсты синвуоссы пыр веразы та нуналэ черке ӝыт службае лыктэмъёс. Но ӝытаз службаын вӧсяськыса сылэм, нуназеяз черкын ужам егитъёсты озьы гинэ ӧз лэзе — татын вераськыны соосты витё вал ини Ципьяысь егитъёс. Казаньысь егитъёсын пумиськонэ вуизы бадӟым классъёсын дышетскись школьникъёс, кудъёсызлы тунсыко вал «Казаньысь Православной Доброволецъёс» движениысь егитъёс сярысь тодыны. «Тӥляд движениды кыӵе ужъёс быдэсъя», «Кемалась-а ни та ужен выриськоды», «Ӧнердыя кин луиськоды», «Уждылы та движение уг люкеты-а» — та но трос мукет юанъёс чузъяськизы кык час кузя. Артём Гаранин, егитъёслэн кивалтӥсьсы, юанъёслы пыр-поч ответ сётӥз, озьы ик та движенилы мылкыдтэм кылись котькуд дышетскисез соосын огазеяськыны ӵектӥз.

— Мон малпасько, адями осконтэк улӥз ке, со тыр улонэн уг улы. Зэм, со озьы ик дышетске, ужа, шутэтске, юлтошъёсыныз пумиське, но мар ке но солы уг тырмы — оскон. Оскон ке луиз, сюлмын но каньыл луэ. Соин куке но тӥледлы секыт луиз ке, малы ке но мылкыдды ӧз ке луы, тӥ котьку ми доры лыктыны быгатӥськоды. Ми егитъёсын пӧртэм ужрадъёсы пыриськиськом, мастер-классъёсты ортчытӥськом, черкъёсы юрттыны ветлӥськом — огъя вераса, ӟеч уж лэсьтыны тыршиськом, — шуиз Артём Гаранин. — Асьмеос ведь ваньмы одӥг корабльын, валче тупаса ваньзэ быдэстӥмы ке, улыны но трослы капчи луоз.

Та пумиськонэз радъямез понна бадӟым тау шуыны кулэ отец Рафаиллы — али Ципьяын кема уг ужа ке но, гурт калыкен рос-прос тодматскыса вуымтэ ке но, Казаньысь вуэм егитъёслы тодазы кыльымон нунал кузьманы быгатӥз.