Асьмеос дуннелы тунсыко!

«Кулӥ ке, та книгаез пылам мед понозы!»

2021 арын потэм «Кырӟалэ, эшъёс, кырӟалэ!» книга сярысь тазьы шуэм бускель Марий Элысь одӥг песянай.

Гумырыз ӵоже люкам ваньбурзэ, уксё-коньдонзэ мед понозы шуымтэ, сютэм-секыт аръёслы тупам егит дырзэ тодаз вайытӥсь кырӟанъёс котьмалэсь но дуногес потыса, озьы шуэм со. Быдэс бам тыр гожъям тодосчиослэсь дунъеткылзэс — рецензизэс — песянай одӥг чурен воштэм. Талэсь но бадӟым дунъет сётыны луоно на меда Книгалы?! Тӥни сокем дуноесь со — асьме выжыосмылэн дауръёс ӵоже люкам кырӟанъёссы! 

Та сярысь мыным мадиз Дубровкаысь Л. П. Сапарова. Лариса Павловна мынэсьтым югдурме валаса, та секыт ужме — книгаез калыке вӧлмытонэз (книга гожтонэз капчигес, сое калыке вӧлмытонлэсь!!!) — ас вылаз ныпъяз. Озьы тӥни сюлэсь трос книга ас кузёооссэ шедьтӥз. Пусйымон ик со кузёослэн адресъёссы — Владивосток, Челябинск, Башкирия, Удмуртия, Казань, Йошкар Ола, Москва.

Эшшо одӥгез юрттӥсе — А. Ю. Шмелёв. Алексей Юрьевич ӵектэмен ик вордскиз-потӥз та книга. ВК-ысь «Вужмем» группаысьтыз ялонзэ кунгож сьӧрын улӥсьёс но синйылтӥллям. Тӥни озьы асьме кырӟанъёсын книга вуиз Англиысь пияш Дантон Рэй (туспуктэмын) кие. Тодматски мон та пияшен ВК пыр 2021 арын. Соку солы 16 арес вал. Гожтэтъяськиськомы англи кылын, англи сямен пал кыл но уг ке но тодӥськы. Ог-огмес валаськом. 

Тодматскеммылэн кутсконэз таӵе луиз (англи кылын гожъяськеммес удмурт сямен возьматом): 

— Кин тӥ, ӟеч Адями?
— Ӟечбуресь, тау тӥледлы ӟеч кылъёсты понна. Мон Литваысь ӧвӧл, мон англичанин но ньыльмослы француз. Мон пушкын одӥг шапык но восточно-европейской вир ӧвӧл! Но кыӵе ке тодмотэм муген мон Шундыӝужан Европаысь пӧртэм калыкъёслэн сям-йылолъёссылы, лулчеберетсылы визьтэммытозь синмаськемын.

Дантонлэсь хоббизэ азинтыны юртто ВК-ысь эшъёсыз: Андрей Краснов, Андрей Прокопьев, Геннадий Макаров, Павел Александров но мукетъёс. Солэн ВК бамаз асьме бускель калыкъёслэн этнографиоссыя материалъёс: тусъёс, видеороликъёс, гожъямъёс... 

19 январе берло лэзем гожтэтаз — ассэ видеое уськытыса лэзем. Кубызэн шудыны дышыса вуэ ини шуыны луэ. Кубыззэ но шудэ со асьме сямен ик — пыдесаз поныса. 

17-19 дауръёсы, удмуртъёс гожтэт тодымтэ аръёсы, асьме доры Дантон Рэй выллем тунсыкъяськись тодосчиос вуылӥллям. Соос полын финнъёс — М. А. Кастрен, Ю. Й. Вихманн, Т. Г. Аминофф но мукетъёс (лыдӟе со сярысь А. Е. Загребин: «Финны об удмуртах» книгаысь), мадьяръёс — Бернат Мункачи, Ласло Викар но мукетъёс. Соос радэ ик пуктоме Трансильваниысь (Румыния) мадьяр калыклэсь дано пизэ кубызчи Миклош Дэметэрез. Эшшо одӥгез — егит поляк Петер Палган — «Узы-боры» но «Пузкар» удмурт фильмъёсты кылдытӥсь. Асьмелэсь улон-вылонмес югдытон-гожъян понна, соос кӧня апара-тузон сюресъёстӥ ортчизы, пӧсь-кезьыт куазьёсыз чидазы, секыт ныпъетъёссэс ӝутъяллязы, улон кесэгзэс сэразы. Кин тодэ, оло, куке но Англиысь визьпог Дантон Рэй но дорамы куное вуылоз!

Кабанмес йылсаса вераме потэ: асьмеос дуннелы тунсыко! Тунсыко-а асьмелы асьмеос?! Кырӟанъёсын пичи книга поттэмын 1000 штук. Дуныз али но 500 манет. Та дырозь вузаськиз на ог ӝыныез гинэ. Ваньмыз вузаськысал ке, эшшо 250 сюрс манет Бадӟым Книгаез поттыны юрттэт луысал. Басьтымтэ семьяос али туж трос. Дыртэ, эшъёс, книга ас кузёоссэ чидатэк вите!

Бадӟым Книга сярысь

Сое поттыны вырисько 2011 арысен. Ас дыраз потысал ке, та дырозь кыкетӥ томез но, оло, куинетӥез но вуысал ни. Районлэсь, Республикалэсь, Москвалэсь юрттэт сётонзылы осконэ быриз. Мӧйы бигер эшелэн — Тюнтерысь Зарипов Рафкат Шакуровичлэн — ӵектэмезъя, 2023 арын сӥзьыл но собере котыръяй «удмурт колхозъёсты». Куд-огъёсаз вуылӥ кык пол но, жингыръяй трос пол. 1 мартозь люкаськиз 880 сюрс манет. Кулэ на эшшо 690 сюрс манет. Та сярысь видеоролик вӧлмытэмын ВК но мукет мерлыко вотэсъёсысь группаосын. 5 мартэ кутскем уксё люкан уже пыриськиз туннэозь (17 март) 37 мурт/семья. Люкамын ини 114 530 манет уксё. Кыле на люканы 575 470 манет. 

Асьме сярысь таӵе мур пуштросъем книга ӧз потылы на. Удмуртъёсты азьпалтыса, видео вазиськонэя уксёен нырысетӥ юрттӥсе луиз бигер фотограф И. М. Камалов. Ильсур Мансурович книгалы видео-реклама но лэсьтӥз. Книга зэмзэ но уникальной шуыса вала со. Валалозы-а тае котырысь но палэнысь удмуртъёс, аслам Сырья гуртоосы, ӵош ужасьёсы, ӵош дышетскыса-шудыса будэм эшъёсы??? 

Гажано лыдӟисьёс, кылем номерысь вазиськонме, оло лыдӟиды, оло ӧд но валалэ. Тазэ лыдӟыса, сайкалоды шуыса оскисько. 752 бамъем Бадӟым Книгае пыремын 800-лэсь трос тусъёс, кырӟанъёс сётэмын нотаосын, эктон-шудонъёс возьматэмын суредъёсын, тусъёсы пыремъёслэн нимтулъёссы вунонтэм гожъямын. 2019 арын потэм та книгалы дунъет сётиз Н. Н. Лобанова (г. Нолинск) Нина Николаевналэн чуръёсыз: «Она стала настольной книгой для нашей семьи, хочется взять её в руки каждый день: изучать и узнавать новое, вспомнить прошлое и сравнить настоящее, поиграть и поплясать, а иногда попеть и поплакать! Хотя сборник называется „Песни, танцы и игры шошминских удмуртов“ в ней есть все: история и география, математика и грамота, музыка и искусство, литература и дизайн. Одним словом, новый сборник — это энциклопедия шошминских удмуртов. Книга настолько красочно оформлена, что даже хочется положить на вышитое полотенце, и носить её как свежеиспеченный каравай по улицам наших шошминских сёл и деревень...»

Юрттыны мылкыд карисьёс коньдондэс лэзьыны быгатӥськоды та номере: 89179348440 («Ак Барс» банкен герӟамын, капчигес луоз СБП пыр лэзьыны).

Леонид Сапожников, Сырья гурт клублэн кивалтӥсез, книгалэн авторез