Азьло озьы шудӥллям...

Нылпи дыр котькинлэн но луэ. Асьме песянай-песятайёсмы но, анай-атайёсмы но куке но пичи вал. Тросэзлэн нылпи дырзы секыт аръёслы тупам ке но, соослэн но асьсэ шудонъёссы луиллям. Котьку сямен, со чылкыт омырын чырмыт шудонъёс.

Жаляса верано, аръёс ортчемъя со шудонъёс вуно, соосты мукетъёсыз вошто: али дыре урамын шудӥсь нылпиосты шергес но шергес пумитаны луэ, тросэз гаджетъёсы, виртуальной дуннее выемын.

Дас кык ньӧр

Кытын ке та шудонэз «дас кык чарака» шуо.

Шудонлэн радэз таӵе. Ог кызь сантиметр пасьталаен но одӥг метр кузьдалаен пулэз из вылэ, кирпич, брусок яке зӧк боды вылэ пононо, одӥг пумыз музъеме мед йӧтоз, мукетыз вылэ мед ӝутскоз («катапульта» лэсьто). Доскалэн улӥ пумаз ог 20 сантиметр кузьдалаен 12 ньӧр пононо. Нырысь пус чӧлтыса, чимасез быръе. Со пуллэн буш пумаз пыдзэ шукке но, пу бодыос пӧртэм пала пазьгисько. Чимась бодыосты бичатозь, мукетъёсыз пазьгисько но пегӟо (бодыосты бичатозяз, чимась пегӟисьёсты уг эскеры). 12 ньӧръёсты бичам но пулъёс вылэ тырем бере чимась ватӥськемъёсты утчаны кутске. Со дыре ик чимасьлы чакланы кулэ, ватскем шудӥсьёсты утчан вакытэ нокин ньӧръёсын пул вылэ медаз шуккы шуыса. Нош чимась пегӟемъёсты утчаку, пегӟемъёс интыысьтыз потыса, пуллэн ӝутӥськыса улӥсь пумаз лёгыны, ньӧръёсты выльысь пазяны тыршо. Ньӧръёсты пазясь шудӥсь, чимась ньӧръёсты бичаса вуттытозь, син азьысь ӧз ке ышы, со чимась интые кыле. Вань шудӥсьёс шедьтэмын ке, нокин но пулэз ӧз ке шуккы, быръё выль чимасез – нырысетӥ шедьтэм шудӥсез. Шудон вань шудӥсьёс шедьыса йылпумъяське. Лыдъян-чотанъя быръё выль чимасез но шудон азьланьтӥське.

Сэрег басьтон

Шудон инты 4 сэрего луыны кулэ, нош шудӥсьёс – вить кузя. Вань сэрегъёсы пиналъёс султо, витетӥез – шораз. Сэрегын сылӥсьёс интыенызы вошъясько. Со куспын шораз сылӥсь но аслыз сэрег утча. Интызэ келям пинал возьмасе султэ.

Чипы-чипы кин киын?

Та шудонэн 4-5 муртлэсь ӧжытэн уг шудо. Одӥгез мукетъёсызлэсь люкиське но синъёссэ кыне. Мукетъёсыз со куспын ваче люкасько. Одӥг мурт, кыӵе ке пичи чаг яке мукет маке басьтыса, киосы сётъясько шуыса возьматэ но понэ одӥг муртлы гинэ. Ваньзы кизэс одӥг кадь возё. Собере чимам муртэ таӵе вазиськонэн ӧтё: «Чипы-чипы кин киын?» («чипы» шуыса нимаське со ватос). Чимась уг ке тоды, выльысь чиманы мынэ, нош тодэ ке, кин киын чаг, со сётъясь луэ, азьлоез сётъясь чиманы кулэ.

Ватскон

Та шудонэз котькин тодэ, дыр. Но азьло соин кӧня ке мукетгес шудӥллям. Али соин корка пушкын яке корка котыртӥ гинэ шудо. Нош азьло гурт пасьтана пазьгиськыса ватскылӥллям. Кӧня ке мурт чима, собере верасько вылэм, кин кытын утчалоз ватскемъёсты.

Тябыкен

Тябыкен шудон ваньмызлы тодмо. Шудо трос муртэн, ӧжытэн уродгес. Одӥг адями, кинэ ке уйыса, бордаз йӧтске но «тябык» шуэ. Соиз мукетъёссэ уйылэ но озьы ик «тябыка». Кинэ «тябыкалоз», соиз мукетсэ уйылэ.

Пишкан

Музъеме согыса юнматоно боды, отчы бышкаса тыроно пӧсьтэм кутъёсты. Шудӥсьёс пӧлысь быръёно кут возьмасез. Со калэн кутъёсты шудӥсьёслэсь возьмалоз, нош соосыз басьтыны туртто кутъёсты. Кин ке сюриз ке кут возьмась кие, со кут возьмась луэ. Нош кутъёсты ишкаса быдтӥзы ке, кут возьмась бызьыса кошке. Шудӥсьёс кутъёсын ыргытъяло сое. Кут бырем бере, кут возьмасез бырйыса, шудон выльысь кутске.

«Узы-боры бичаськом»

Огез – кион, со палэнынгес, мукетъёсыз – боры бичасьёс. Кӧня ке бичаськем карыса, соос шуо: «Узы-боры бичаськом, сьӧд кионлэсь кышкаськом. Тусьты-пуньымы тырмиз, сьӧд кион, пот!» асьсэос ӝог бызьыса кошко коркаосазы (корка интые гожен котыртэт пусйыло). Кион кинэ кутэ, со кион луэ. Уг куты ке, выльысь интыяз султэ. Шудон азьланьтӥське.

Пуйыен шудон

Люкисько кык командалы. Кыкезлы ик сёто быдэн пуйы. Нырысетӥосыз сылӥсьёс пуйыез кускозязы дӥсяло, киосынызы куто (куашкамлэсь) но азьвыл ик пусъем интыозь тэтчаса мыно, озьы ик берлань интыязы вуо. Озьы огзы бӧрсьы огзы ваньзы бызьыло. Кудӥз команда ӝоггес бызьылӥз, соиз ик вормись луэ.

«Парен бызьылон»

Шудӥсьёс огзы бӧрсьы огзы парен-парен султо. Огез пар соослэн пумитазы сылэ. Парен луэм муртъёс пумитазы сылӥсьёс дортӥ ӝог ортчо. Таос шудӥсьёсты кутыны кулэ. Кинэ кутӥзы, интыенызы воштӥськозы. Собере кутэм муртъёс уйылозы ни.

Редакцилэсь: котькуд гуртлэн, котькуд поколенилэн аслаз шудонъёсыз луиллям. Мӧйыос соосты вунэтымтэзы на ке, газет лыдӟисьёсмес но мед тодматозы вылэм.