Бадӟым кузьымен бертӥзы

Калык огазеяськон нуналэ элькунамы «Наш дом — Татарстан» шуыса нимаськись этнокультурной фестивалез ортчытон ӟеч йылоллы пӧрмиз ини. Арысен аре фестиваль эшшо но трос адямиосты герӟа но огазея. Асьмелэн кужыммы ог-огмес гажаса но ог-огмылы юрттыса улэммы бордын. Тынӥсь но тупаса улонэз утён, калыкъёслэсь кылъёссэс, лулчеберетъёссэс но сям-йылолъёсссэс азинтон — кивалтэт понна котьку азьпал планын луэ. 

Гала-концерт Муса Джажиль нимо операя но балетъя бигер академической кун театрлэн сцена вылаз ортчиз. Учкисьёс азьын 31 ёросысь 1500 пала артистъёс быгатонлыкъёссэс возьматӥзы. «Народов много — Родина одна!» лозунг улсын Татарстан Республикамы Россиысь одӥгез тужгес трос йӧскалыкъем элькун луыса шараяськиз.

Ужрадын ТР-ысь калыкъёслэн этнокультурной азинсконазы бадӟым люкет пыртэмъёсын данъетан луиз, нош творческой коллективъёслы ТР-лэн Раисэзлэсь — Рустам Миннихановлэсь — коньдонкузьымлы сертификатъёс сётӥзы.

Асьме ёросысь та фестивале Балтасьысь «Виво» коллектив (кивалтӥсез — Эллина Васинкина) но Ӟаны шоръёзо школаысь «Инвожо» ансамбль (кивалтӥсез — Виктор Камаев) пыриськизы. Удмурт егитъёслэн «Инвожо» фольклор-этнографической ансамблез 400 сюрс сертификатлэн кузёез луиз. Ӟечкыласьком! Азьланяз но таӵе ик задор мылкыдын калык лулчеберет азинтон ужез быдэстыны сӥзиськом!